Baalare Uullate Gananno Lolahe—Qullaawu Maxaafi Mayyaanno?

Alame woꞌmate, waajjishanno lolahi lowo manna gawajjanni no. Hanni aante noo odoo laꞌno:

• “Tenne lame, Chayinaho qaru katamira biite xeena ganino; mitu 140 diri giddo tenne gobbara kageeshshi xeena gane diegennino; . . . Qidaametenni Roowete geeshsha 744.8 milimeetire (29.3 inche) ikkanno xeena ganino.”—AP News, Woxawaajje 2, 2023.

• “Kaanuuni yinanni hombobalattenni kainohunni Jaappaanete gobbara Hamusete barra layinkimeeshsho biite xeena ganino hattono waajjishshanno bubbe bubbisino. Konninni kainohunni ajayi ajeenna lamu manni reyino. . . . Tenne hombobalattenni kainohunni ilaalaame mereerima Tayiwaanera xaphoomunni 0.6 meetire (2 haꞌruma) geeshsha ikkanno xeena gananno yine hendanni.”—Deutsche Welle, Woxawaajje 3, 2023.

• [Noova Iskoosha awuraajja] lolahu beeshshe amadinohu, Kanaadaho Atilaantikete qacce widoonni baatto bayidhannokki xeena ganino daafiraati; 50 diri giddo hakko kageeshshi xeena gane diegennino.”—BBC News, Maaja 24, 2023.

Togoo ikkito daafira Qullaawu Maxaafi mayyaanno?

‘Goofimarchu barri’ malaate

Qullaawu Maxaafi kulanno garinni, heeꞌnoommohu “goofimarchu barra” yinanni yanna giddooti. (2 Ximootewoosi 3:1) Yesuusi yannankera “waajjishshannoti jajjabba malaatta leeltanno” yee masaalino. (Luqaasi 21:11) Ayyarete gade soorramase albinni roore, waajjishshannoti kalaqamu dano hedeweelcho xaa xaa kalaqantanno gede assitanni no.

Hexxo noonke

Qullaawu Maxaafi, yannankera alamete aana ikkanni noohu waajjishanno coyi hexxo heedhannonke gede assannoha ikkinota kulanno. Hiitto? Yesuusi togo yiino: “Kuni coyi baalu ikkanna laꞌinanni yannara, Maganu gashshooti rahe noota affe.”—Luqaasi 21:31; Maatewoosi 24:3.

Yannankera ikkanni noori, muli yannara Maganu Gashshooti baattote kalaqama baala lawishshaho wayi doyicho woꞌmunni woꞌma aada assannota leellishannoho.—Iyyoobi 36:27, 28; Faarso 107:29.

Maganu Gashshooti baattote qarqara haaroonsannohu hiittoonniitiro ledde afate, “Baatto Gatisannohu Heeꞌrakka?” yaanno birxicho nabbawi.