Naazi Gashshooti Shiino Ayihudootanna Yihowa Farciꞌraasine—Qullaawu Maxaafi Mayyaanno?

Arfaasa 27, 2023 alamete deerrinni Naazi Gashshooti yannara shinoonni Ayihudoota qaagate qaaggote ayyaana ayirrinsanni. Mitu 75 dirira albaanni ikkitinoti tini biso shorodhi assitanno goofo, Maganu Ayihudete manna togo beebba assiꞌnanna sammi yiinohu mayiraatikka yite hedatto gede assitahera dandiitanno.

• Qullaawu Maxaafi tenne hajo daafira mayyaannoro ledde afate, “Naazi Gashshooti Lowo Manna Gudinohu Mayiraati? Maganu Tenne Hoolinokkihu Mayiraati?” yaanno birxicho nabbawi.

Naazi Gashshooti yannara lowo Ayihudoota beebba assiꞌnoonni. Lowo miliyoone ikkitannore shinoonni. Hattee yannara Ayihudootano agurranna wole mannano beebba assiꞌnoonni hattono shinoonni. Kuri giddo gamu Yihowa Farciꞌraasineeti; insa ammanansanni kainohunni beebba assiꞌnoonninsa.

• Ledde afate, “Naazi Gashshooti Yannara Yihowa Farciꞌraasine Ma Assinoonni?” yaanno birxicho nabbawi.

‘Hexxonna keere’

Batinyu manni lowoha Ayihudete manna gundi gede xaano hattoo goofo dagga ikka yee yaadanno. Maganoho galatu galona, Qullaawu Maxaafi albillitte togoo goofo heedhannokki yanna daggannota kulanno.

• “Kiꞌnera hedeemmore ani egennoommo; hedoꞌyano hexxonna albillittete ikkitannoꞌne gede, keerunnite ikkinnina bunshennita diꞌꞌikkitino.”—Ermiyaasi 29:11.

Maganu Yihowaa bunshe coꞌo asse hunanno woyitenna bunshe abbitino gawajjo dhaawanno woyite tini hexxo woꞌmitanno. Isi muli yannara:

• Woloota gawajjannoha busha manna gudanno.—Lawishsha 2:22.

• Qarrantenna shette saꞌinore baala hursanno.—Yohaannisi Ajuuja 21:4.

• Reyitinore uullate aana reyotenni kayisanno.—Yohaannisi 5:28, 29.

Qullaawu Maxaafi kulannota sheshifachishshanno hexxo addaxxa dandaatto. Addaxxa dandaattohu mayiraatiro ledde afate, Qullaawa Maxaafa woxe baaxxittokki ninke ledo xiinxalli.