Sayintistootu Baote Barri Saate Alba Qolte Haꞌrissino—Qullaawu Maxaafi Mayyaanno?

Sayinsete egennaammi Arfaasa 24, 2023nni Baote Barri Saatea hashshu taalooti widira qolte haꞌrissino; tini saate alamete goofimarcho kultannote.

• “Mannu ooso insa insaneeto galaaffattara kaꞌinota leellishshannoti ‘Baote Barri Saate’ Maakisanyote barra albinni roore hashshu taalooti widira higge shiqqi yitino; kuni ikkinohu Yukireenete gobbara kaino olinni, niyukileerete oli kaꞌꞌara dandaanno yine waajjatenni, hattono ayyarete gade soorramanni kainohunniiti.”—AFP International Text Wire.

• “Sayinsete egennaammi Maakisanyote barra, ‘Baote Barri Saate’ 90 sokonda hashshu taalooti widira higge shiqqi yitinota egensiissino; hatto yaa mannu sirchi albinni roore baote widira hige shiqqi yiino yaate.”—ABC News.

• “Mitte alamete doyichoti sayintistootu gaamo, mannu ooso wolu woyitinni roore xaa yannara insaneeto gudate qixxaabbe noota xawissino.”—Ze Gaardiyani.

Ikkina mannu oosonna baatto baꞌanno yanna muleeti? Albillitte ikkannore waajja hasiissannonke? Qullaawu Maxaafi tenne daafira mayyaanno?

Albillitte ikkannore

Qullaawu Maxaafi kulanno garinni, “kalqe (baatto) noowa heedhanno”; qoleno mannu ‘ise aana hegerera heeꞌranno.’ (Rosiisaancho 1:4; Faarso 37:29) Konni daafira mannu ooso baatto dihuntanno woy heeshshote kalaqami heeꞌra dandaannokkita diassitanno.

Ikkollana, Qullaawu Maxaafi goofimarchu daannota kulanno. Lawishshaho, “Alame . . . saꞌanno” yaanno.—1 Yohaannisi 2:17.

• Qullaawu Maxaafi alamete goofimarcho yaannohu maa kulateetiro afate, “Alame Baꞌaraati? Apokaaliypsi Maati?” yaanno birxicho nabbawi.

• Qullaawu Maxaafi alamete goofimarchi daanno yanna daafira mayyaannoro afate, “Alamete Goofimarchi Daannohu Mamooteeti?” yaanno birxicho nabbawi.

Albillittete yanna hexxotenni agadha

Xa alamete aana qarru batiꞌrinoha ikkirono, Qullaawu Maxaafi albillittete yanna hexxotenni agadhineemmo gede kaaꞌlannonke. Hiittoonni?

• Qullaawu Maxaafi heeshshonkera kaaꞌlitanno amaale aannonke. (2 Ximootewoosi 3:16, 17) Lawishshaho, Qullaawu Maxaafi qarru heeꞌreennanni dancha danchare hendeemmo gede kaaꞌlannonkehu hiittoonniitiro afate, “Yaaddo Gargadha Dandiinanni Gara” yaanno birxicho nabbawi.

• Qullaawu Maxaafi konni kaꞌira kaajja hexxo aannonke. (Roomu Sokka 15:4) Qullaawu Maxaafi yannankerano ikko albillitte mayi ikkannoro xawise kulannonke; tini qolte alamete aana baxiri ikkirono wodanaaꞌmineemmo gede assitannonke.

Qullaawu Maxaafi roore kaaꞌlannohe gede, woxe baaxxittokki ninke ledo techonni Qullaawu Maxaafi xiinxallo hanafi.