Hiikkonne Gashshaancho Doodhatto?—Qullaawu Maxaafi Mayyaanno?

Batinyu manni hiikkonne gashshaancho doodhannoro seekke hedanni no; kuni shaaꞌꞌa coye diꞌꞌikkino.

Qullaawu Maxaafi tenne daafira mayyaannolla?

Uullate gashshaasinera wolqansa shiimate

Qullaawu Maxaafi uullate gashshaasine baalanti assa dandiitannokkiri noota kulanno.

• “Mannu gatisara didandaannona, albisoota addaxxitinoonte. Insa reyitanno woyite bushsha eꞌanno; hakku barri hedonsa baalate gawalote.”—Faarso 146:3, 4.

Lowo dandoo noonsa gashshaasine nafa martuwa marte reyansa digattanno. Qoleno, insa hanaffinoha dancha coye insa gedensaanni daannohu umo fushshikki doogo hunara dandaanno.—Rosiisaancho 2:18, 19.

Wodancha hasiissannonke coyi, Qullaawu Maxaafi kulanno garinni, mannu ooso kalaqantinohu uminsa umonsa gashshitara horo diꞌꞌikkino.

• “Mannu heeshsho angasi nookkitanna, haꞌrinshosino mannu umisi qineessiꞌre dandaannokkita afoommo.”—Ermiyaasi 10:23.

Yannankera dancha gashshaancho ikka dandaannohu nooyya?

Maganu doodhino gashshaancho

Qullaawu Maxaafi, Maganu taalle nookkiha addaxxinanni gashshaancho shoominota kulanno; hakku gashshaanchi Yesuusa Kiristoosaati. (Faarso 2:6) Yesuusi Maganu Mangiste Mooteeti; tini Mangiste gordoho heeꞌre gashshanno gashshooteeti.—Maatewoosi 6:10.

Ati Yesuusi gashshaanchokki ikkara doodhatto? Qullaawu Maxaafi tenne doodha lowo geeshsha hasiissannota ikkitinohu mayiraatiro xawise kulanno:

• “Hanqisi rahe daye hunannoꞌnekki gedenna, kiꞌneno hedeweelcho baꞌinannikki gede isira [Yesuusi Kiristoosira] kumbuulle. Iso golo assidhannori baraadhinoreeti.”—Faarso 2:12.

Gashshaanchokki ikkannoha doodha hasiissannohe yanna xaati. Qullaawu Maxaafi masaalo, Yesuusi 1914nni moohinota hattono muli yannara Maganu Mangiste uullate gashshoote baala huntannota leellishshanno.—Daanieeli 2:44.

Yesuusi gashshooti wido ikkoottota leellisha dandaatto gara ledde afate, “Xaanni Maganu Mangiste Doodhi!” yaanno birxicho nabbawi.