Yaaddo Gargadha Dandiinanni Gara
Quwa saꞌino yaaddo manninatekkinna surrekki gawajjitara dandiitanno. Isinni togoo yaaddo, yaachishanni noohe qarrinni roorino qarra nafa abbitara dandiitanno.
Yaaddo ajishate kaaꞌlitanno amaale
Busha odoo macciishsha, laꞌꞌa, woy nabbawa batissooti. Alamete aana ikkanni noo qarri daafira mitto mittonka coye afa dihasiissannohe. Dadillissanno odoo batisse laꞌꞌattoha, macciishshattoha woy nabbawattoha ikkiro, roore waajjattonna hexxo mudhatto gede assitannohe.
Qullaawu Maxaafi biddishsha: “Dadillaamu wodani . . . mannimma maniissanno.”—Lawishsha 17:22.
“Haaro odoonna biso shorodhi assannore interneetete widoonni laꞌꞌa araado ikkitankera dandiitanno; kayi kuni busha rosichooti. Odoo batise laꞌꞌa agurummota, yaachishannoeri ajino.”—Jooni.
Heda hasiissanno xaꞌmo: Haarote fultanno odoo baalanta laꞌꞌa hasiissannohe?
Mittu gari pirogiraame heedhohe. Barru baala goxoottowiinni kaꞌꞌattota, sagale itattota, qaete mitore assiꞌrattotanna goxatto saate mittu garita assiꞌrate sharrami. Baalankare pirogiraametenni assiꞌrattoha ikkiro, roore wodanaaꞌmatto; hattono yaachishannoheri ajanno.
Qullaawu Maxaafi biddishsha: “Jawaatu manchi hedo jirotenni xaadissanno.”—Lawishsha 21:5.
“Koroonu fayya ubbu taaera, asseemmore baalankare facci asse agure roore yanna boohaaranni sayiseemmo. Yannaꞌya roore hayyotenni horoonsiꞌra hasiꞌroommo daafira, barru barrunku looseemmo loosira pirogiraame fushshiꞌroommo.”—Joosefi.
Heda hasiissanno xaꞌmo: Barru barrunku dancha coye assite hagiidhatto gede kaaꞌlitanno pirogiraame noohe?
Dancha danchare hedi. ‘Hatto assoommoro’ yitanni saino coyira quwa saꞌe gaabbanna albillitte ikkara dandaannoha busha coye illachisha roore yaadatto gedella assitannohe. Hatteentenni, galatatto gede assannoheha lame woy sase coye hedate woꞌnaali.
Qullaawu Maxaafi biddishsha: “Galatu mannano ikke.”—Qolasiyaasi Sokka 3:15.
“Qullaawa Maxaafa nabbawa, bushare macciishsheemmakki gedenna dancha danchare hedeemma gede kaaꞌlitinoe. Tini shiimare labburono, lowore kaaꞌlitanno!”—Liisa.
Heda hasiissanno xaꞌmo: Roore woyite heeshshokki giddo ikkannoha dancha coye agurte busha busha calla hedatto?
Wolootu daafira hedi. Yaaddo batidhannohe woyite mannunniwa gambo giwa rakkahera dandiitanno; kayi hatteentenni qarrantinore kaaꞌla dandaatto gara hedi.
Qullaawu Maxaafi biddishsha: “Mittu mittunku woleho woyyannore hedo ikkinnina, umisira woyyannore calla laoonke.”—Filiphisiyusi Sokka 2:4.
“Woloota kaaꞌlannore assa hagiidheemma gede assitannoe. Hatto asseemma woyite insano hagiidhanno, anerano yaachishannoeri ajanno. Isinni woloota kaaꞌlate diinaggaaweemma woyite, yaadeemma yanna nafa diheedhannoe.”—Maariya.
Heda hasiissanno xaꞌmo: Afootto manni giddo baxxitino kaaꞌlo hasiissannori ayeooti? Ati insa kaaꞌlate maa assa dandaatto?
Fayyimmakki agadhi. Ganyite ispoorte loosi, hattono dancha gede fooliishshiꞌri. Kiꞌanno sagale sagaꞌli. Ordu fayyimma agadhakki dadillaamo ikkattokki gedenna yaaddo gargadhatto gede kaaꞌlitannohe.
Qullaawu Maxaafi biddishsha: ‘Manninate kaajjishiꞌrate rosi shiimare kaaꞌlanno.’—1 Ximootewoosi 4:8.
“Aninna qaaqqiꞌya hasiꞌnummo gede gobba fulle ispoorte loosa didandiineemmo; hakko daafira ispoorte ganyine mine loonseemmo. Tini roore hagiirraamma ikkineemmo gedenna mimmitoho roore shaqqaddanna cincineemmore ikkineemmo gede kaaꞌlitinonke.”—Kateriini.
Heda hasiissanno xaꞌmo: Fayyimmakki agadhate, itatto sagalenna ispoorte loosatto gara roore woyyeessiꞌra hasiissannohekka?
Batinyu manni yaaddo gargadhate tenne amaale harunsano agurranna, Qullaawu Maxaafi kulanno hexxo daafira rosansano kaaꞌlitinonsa. “Maganu Mangiste Maa Assitanno?” yaanno birxicho nabbawi.