Qullaawu Maxaafiti Amanyootu Wodho Yannankerano Kaaꞌlitanno?

Batinyu manni, Qullaawu Maxaafi siimu xaadooshshinna adhamate daafira aanno biddishshi yannankera dikaaꞌlannoho woy dihasiisannoho yee hedanno; togoo manni giddo mitu isinni ninke Kiristaanaho yaannoho. Mite beetekiristaanna yanna ikkituta ikkineemmo yite, garanna gara ikkinokki coyi daafira rosiissanno roso soorritino. Ikkina Qullaawu Maxaafiti amanyootu wodho yannankera kaaꞌlitanno? Ee, kaaꞌlitanno. Hatto yineemmohu mayiraatiro hanni laꞌno.

Mannu oosora Maganu aanno wodho hasiissanno

Ninke mannu ooso kalaqammoommohu biddishsha Kalaqaanchinkewiinni afiꞌnammoraati. Qullaawu Maxaafi “haꞌrinshosino mannu umisi qineessiꞌre dandaannokkita” kulanno. (Ermiyaasi 10:23) Maganu Yihowaa uminke doorsha doodhineemmo dandoo uyinonkeha ikkirono, bushanna dancha ikkinore uminke afiꞌneemmo gede kayi silxaaneno dandoono diuyinonke. Danchunna bushu maatiro afate iso agadhinammora hasiꞌranno.—Lawishsha 3:5.

Maganu fushshinota amanyootu wodho Qullaawu Maxaafi giddo afiꞌneemmo. Tini wodho lowore kaaꞌlitannote yineemmohu mayiraatiro hanni lame korkaata laꞌno.

• Kalaqinonkehu Maganoho. (Faarso 100:3) Maganu Yihowa Kalaqaanchonke ikkino daafira, ordunna surrete fayyimma afiꞌratenna hagiirraamma ikkate hasiisannonkeri maatiro seekke afino. Isi wodhosi lashshi assinummoro mayi qarri giddo umbeemmorono afino. (Galaatiya 6:7) Qoleno Yihowa ninkera woyyinorella halchanno. Qullaawu Maxaafi, Maganu ‘woyyannonkere baala rosiisannonketanna haꞌneemmo doogo kulannonketa’ farciꞌrannohu iseraati.—Isayaasi 48:17.

• Yortonke doggankera dandiitanno. Batinyu manni wodaniꞌya halcho woy hasatto haꞌrunsummoro bushunna danchu maatiro bada dandeemmo yaanno. Ikkollana Qullaawu Maxaafi, “Mannu wodani baalunkurinni roore xagaraamoho; diinofayyannoho; giddosireno afannohu dino” yaanno. (Ermiyaasi 17:9) Wodaninke Maganu hayyo garinni hedannokkiha ikkiro, gedenaanni gaabbineemmore assineemmo gede assannonke.—Lawishsha 28:26; Rosiisaancho 10:2.

Ammaꞌnote murrooti Qullaawu Maxaafita amanyootu wodho maafe saꞌꞌa hasiissannonsa?

Dihasiissannonsa! Qullaawu Maxaafi Maganu daafiranna isi ninke hiittoore ikkinammora hasiꞌrannoro halaale xawise kulanno. (1 Qorontoosi 6:9-11; Galaatiya 5:19-23) Maganu konne halaale mannu afara hasiꞌranno. (1 Ximootewoosi 2:3, 4) Konnira Wongeellu soqqamaasine Maganu Qaali kulannore faajjete rosiisa hasiissannonsa.—Tito 1:7-9.

Qullaawu Maxaafita amanyootu wodho adhannokkihu batinyu manni, “macciishsha hasidhannore kultannonsa” gedeere ammaꞌnote murroota hasidhanno. (2 Ximootewoosi 4:3, lekkaalliidi qaagiishsha) Ikkollana Maganu Qaali togo yee qorophisiisanno: “Busha, danchaho; dancha bushaho; . . . yitannorira aanneꞌe!” (Isayaasi 5:20) Addanko, Maganu isi danchahonna bushaho yiino coye mannaho badde rosiissannokkire ammaꞌnote murroota qorichishanno.

Qullaawu Maxaafiti amanyootu wodho mannu manna okkanno gede assitanno?

Diassitanno. Magano hagiirsiisa hasiꞌranno manni Yesuusi lawishshanna roso haꞌrunsanno. Yesuusi rosaanosi mannaho yoo yitanno gede ikkikkinni baalanka baxxannonna ayirrissanno gede rosiisino.—Maatewoosi 5:43, 44; 7:1.

Yesuusi rosaanosi heeshshonsa giddo Maganu wodho haꞌrunsitanno gede rosiisino. Ikkollana insa, wolu manni wolu gari wodho haꞌrunsa doodhara dandaannota ammante adhitanno. (Maatewoosi 10:14) Yesuusi rosaanosira mannu Maganu seera haꞌrunsanno gede poletikunni woy wole doogonni giddeessitara silxaane diuyino.—Yohaannisi 17:14, 16; 18:36.

Qullaawu Maxaafite amanyootu wodhonni gala uyitannonketi mite kaaꞌlo hiitteeti?

Maganunnita amanyootu wodho haꞌrunsitannori xaano ikko hegerera lowo atoote afidhanno. (Faarso 19:8, 11) Kuri giddo mitu:

• Hagiirrinke lexxanno.—Lawishsha 29:6.

• Maganu ledo muli jaaloomi heeꞌrannonke.—Lawishsha 3:32.

• Qarru yannara Maganu kaaꞌlo afiꞌneemmo.—Lawishsha 11:8.

• Baattote aana hegerera heeꞌrate hexxo heedhannonke.—Faarso 37:29.