Yihowa Farciꞌraasine Ikkinokki Fiixanke Kaaꞌla Dandiineemmo Gara

1-2. Umo halaale ronseemmo woyte fiixinke ledo noonke aante baꞌanno gede assannori maa ikkara dandaanno?

Yesuusi haꞌrunsaanchosi ikka hasiꞌrinohu mittu manchira “Qaera hadhe Yihowa assinohere baala . . . fiixikkira kuli” yiino. (Maq. 5:19) Yesuusi hatto yaasi mannu ooso dancha coye macciishshituro hakkonne coye fiixinsara kulate hasatto noonsata afinota leellishshanno.

² Umo dancha duduwo macciishshitto woyte hiitto ikkoottoro qaagatto? Rosoottore fiixikkira kulate lowo geeshsha quqquxamoottoha ikkara dandaanno! Kayinni fiixikki rossanni noottore baxinokkiha ikkara dandaanno. Woy insara halaale kulootto gari hanqisinonsaha ikkara dandaanno. Hatto ikkiro, Yihowara ammanante heedhenni fiixikki ledo noohe aante baꞌannokki gede assiꞌra dandaattohu hiittoonniiti?

3. Konni birxichira maa xiinxallineemmo?

³ Konni birxichira aane noore xiinxallineemmo: (1) Mararro Yihowa Farciꞌraasine ikkinokki fiixinke kulleemmonsare macciishsha giwiro nafa insara hendeemmo gede kakkayissannonkehu hiittoonniiti? (2) Insa xissiisannonkere coydhanno woy assitanno woyte ma assa dandiineemmo? (3) Cincanna hexxo mudha hooganke fiixinke halaale macciishsha hasiꞌranno gede assitara dandiitannohu hiittoonniiti? (4) Banxeemmonsata leellisha dandiineemmohu ma garinniiti?

MARARTINANNINSATA LEELLISHSHE

4. Yesuusi mannu sokkasi macciishsha giwita ma assino?

⁴ Yesuusi mannu sokkasi macciishsha giwita muddame hexxo dimudhino. Yesuusi isonooto, guma laala gibbinota balasete haqqicho guma laaltanno gede assate sharraminohu woynete irsha loosanno manchi ledo heewisiisino. (Luq. 13:6-9) Yesuusi konne lawishsha coyiꞌri yannara Ayhudete manni iso ammananno gede kaaꞌlate sase diro saꞌanno yanna sharramanni keeshshino. Isi insa kaaꞌlate togo sharraminohu mayraati? Yesuusi manna mararannoho; tini insa cince kaaꞌlanno gede assitinosi.

5. Yesuusi Ayhudete manna mararanno gede kakkaysinosiri maati?

⁵ Yesuusi Ayhudete manna mararinohu ammaꞌnote massagaano kuni manni halaalaancho Magano afanno gede kaaꞌlitukkinni gattino daafiraati. Yesuusi “mannu allaalaanchu nookki geꞌreewi gede ikke” nooha laino. (Maq. 6:34) Yesuusi reyara shiima yannara albaanni, Yerusaalamete quchuma lae wiꞌlino; isi wiꞌlinohu hakko heeꞌranno manni ammana hoogansanni kainohunni reyannota afino daafiraati. (Luq. 19:41-44) Ninkeno fiixanke konni garinni mararreemmoha ikkiro insa kaaꞌlate kaꞌneemmo.

6. Yihowa Farciꞌraasine ikkinokki fiixanke cinca hasiissannonkehu mayraati? (Galaatiya 6:9)

⁶ Galaatiya 6:9 nabbawi. Fiixinke Yihowa daafira rosa hasiꞌra hoogiro nafa, cincineemmore ikka hasiissannonke hattono “hexxo mudhine dancha looso loosa agurroonke.” Mittu manchi hundinni adhe dayno ammana aguratenna Yihowa ammanannota leellishate yanna hasiissannota anfoommo. Atino alba ‘hexxo noohekkihanna Magano afoottokkiha’ ikkara dandaanno. (Efe. 2:12) Hatto ikkiro kaaꞌlinohehu nooti dihuluullissannote. Tini atino dandaamannoha ikkiro fiixikkita ayyaanaamittete hasatto wonshatto gede dikakkayissannohe?

FIIXINKE XISSIISANNONKERE COYIꞌRANNO WOY ASSANNO WOYTE

7. Yesuusi roduuwi iso ammantannokki gede assinonsari maa ikkara dandaanno?

⁷ Yesuusi roduuwi isi Galiilaho loosino maalale macciishshitinoha ikkara dandaanno. (Luq. 4:14, 22-24) Ikkirono umo insa iso diammantino. (Yoh. 7:5) Mayra? Qullaawu Maxaafi tenne daafira kulannori dino. Kayinni mitu Ayhudete manni Yesuusi rosaano ikkannokki gede assinonsaha ajanni ajeenna lame korkaata kulanno. Mitootu mannu giwannonke yite waajjitino. (Yoh. 9:18-22) Wolootu qolte Yesuusa anjesinni kayisse affinohura, Maganu soyenna daynoha ikkinota ammana qarra ikkitinonsa. (Maq. 6:1-4) Yesuusi roduuwirano qarra ikkinonsahu togoo coye ikkara dandaanno. Ate fiixino halaale macciishshannokki gede assinonsahu togoo coyeti ikka?

8. Fiixinke xissiisannonkere coyiꞌrannohu woy assannohu mayra ikkara dandaanno?

⁸ Insa xissiisannohere coydhanno woy assitanno gede assinonsari maatiro hedi. Yesuusa “wodana difayyino” yiino fiixisi giddo gamu roduuwasi ikkitara dandiitanno. (Maq. 3:21) Insa hatto yitinohu mayra ikkara dandaanno? Qullaawu Maxaafi Yesuusi sabbakanninna dhiwamino manna hursanni sagale itanno yanna nafa hooginota kulanno. (Maq. 3:20) Fiixisi iso quwa saino yee hedino ikka? Hedinoha ikkara dandaanno. Ninke fiixino ammaꞌnonkera quwa saꞌnoommohu gede asse hedara dandaanno. Hatto yee hedannoha ikkiro coyiꞌneemmorinninna assineemmorinni quwa saꞌneemmokkire ikkinoommota leellisha dandiineemmo.

9. Fiixinke ninke daafira noonsa lao biddi assiꞌranno gede kaaꞌlansara dandaannori maati? (1 Pheexiroosi 3:1, 2) (Misillano lai.)

⁹ Danchu amanyooti heeꞌroꞌne. Shaqqillunni coyiꞌneemmorinna assineemmori fiixinke ninke daafira noonsa lao biddi assiꞌranno gede kakkaysansara dandaanno. (1 Pheexiroosi 3:1, 2 nabbawi.) Yihowa Farciꞌraasincho ikkinokki minaanni, minaamasi gambooshshe woy soqqansho hadhanno woyte facci assite agurtinosihu gede asse hedara woy hanqara dandaanno. Ise togoori macciishshamasira hasidhannokki daafira ledosi roore yanna saysate ayyaanaamittete coye assitanno yanna biddi assiꞌra dandiitanno. Lawishshaho ise soqqansho isi mine heeꞌrannokki woyte woy wolere assanno yannara fula dandiitanno. Kiristaancho ikkitino minaama konni garinni pirogiraamese biddi assidhe minaannise ninke daafira noosi lao biddi assiꞌranno gede kaaꞌla dandiitanno.

10. Minshanninke woyte Yesuusi lawishsha haꞌrunsa dandiineemmohu hiittoonniiti?

¹⁰ Fiixinke mishannonke woyte mito woyte sammi yaa danchate. Yesuusi mannu iso kokkaamohonna agoho wojji yaannoho yee beebbate suꞌmasi hunita, tini kapho ikkitinota kulate diwoꞌnaalino. Hatteentenni mannu loososi lae halaale ikkinore huwatanno gede assino. (Mat. 11:19) Qoleno isi quwa saꞌꞌannokkihanna hagiirraamo ikkinota heeꞌranno heeshshonni leellishino. (Yohaannisi 2:2, 6-10 ledo heewisiisi.) Hatteente gede atino fiixikki coyiꞌranno coy baalaho dawaro qola hasiissannohehu gede assite heddooti. Hatteentenni quwa saꞌꞌattokkihanna hagiirraamo ikkoottota assootikkinni leellishi. Tini insa ninke daafira coyiꞌnanni kapho ammantannokki gede assitansara dandiitanno.

CINCANNA HEXXO MUDHA HOOGA

11. Yesuusi roduuwasi ma garinni amadino?

¹¹ Wongeelluwate giddo noo xagge Yesuusi roduuwasi cincinonsata leellishshanno. Lawishshaho Yesuusi Qaanaho umi maalale loosi woyte insano laꞌinoti dihuluullissannote. (Yoh. 2:11, 12) Aleenni qummi assininte gede roduuwisi iso diammantino. Ikkirono Yesuusi insara taysiꞌre diagurino. Yesuusi Qaanaho umi maalale loosihunni sasu diri gedensaannino roduuwasi shaqqillunni hasaawisino.—Yoh. 7:5-8.

12. Fiixinke giddo mitu halaale macciishshannota hexxineemmo gede kaaꞌlannonkeri maati?

¹² Yihowa maaro albinni roore huwatanke fiixinke halaale macciishshannota hexxineemmo gede kaaꞌlitannonke. Kaphu ammaꞌno baꞌanno woyte fiixinke tenne bao daafira kulloommonsare qaagara dandaanno.a (Aju. 17:16) Quuxxote qarri gedensaanni insa ledonke Yihowa magansidhara nafa dandiitanno. Qoleno xaa yannara fiixinkera qarru iillinsaro insa kaaꞌlate dandiinummore baala assineemmoti egennantinote. Insa addinta banxeemmonsata huwatturo Qullaawu Maxaafi halaale rosate sumuu yitara dandiitanno.

BAXXINANNINSATA LEELLISHSHE

13. Yihowa loosi batiꞌrannonkeha ikkirono maa qoropha hasiissannonke?

¹³ Yihowa loosi batiꞌrannonkeha ikkirono, fiixinke insa ledo yanna saysa hasiꞌneemmokkihu woy banxeemmonsakkihu gede asse hedara dihasiꞌneemmo. (Mat. 7:12) Ikkina insa daafira hendeemmota leellisha dandiineemmohu hiittoonniiti? Hanni mite doogga laꞌno.

14-15. Yihowa Farciꞌraasine ikkinokki fiixanke banxeemmota leellinsheemmoti mitte doogo hiittenneeti? Lawishsha kuli.

¹⁴ Ganyitine insa ledo hasaabbe hattono baxxinanninsata kullensa. Ganyine insa ledo hasaambe banxeemmonsata leellisha dandiineemmo. Lawishshaho silke bilbillammonsara, sokka borreessinammonsara hattono wallo haꞌnoommowa woy jaallanke ledo yanna sayinsanni kaꞌnoommo fotta sonkammonsara dandiineemmo. Insara mitore aa woy borrote sokka borreessine soyano aantenke kaajjishshara dandiitanno. Konni garinni banxeemmonsata affanno gede assa dandiineemmo.

¹⁵ Hanni Armeeniyaho heedhannote Ana yinanni rodoo woꞌnaalsha laꞌno. Maatese roorenkanni ilamate barranna ayyaanna ayirrissanno woyte mitteenni lowo yanna sayissanno. Ana Yihowa Farciꞌraasincho ikkituta, fiixise aantenke baꞌanno yee yaadino. Qoleno insa, tini qarru giddo tuggannose yee waajjino. Ikkina Ana yaaddonsa ajishate ma assitino? Ise togo yitino: “Fiixaꞌya laꞌꞌammara haꞌreemma woyte heeshshoꞌya daafiranna maa assanni sayseemmaro kuleemmansa. Qoleno miniꞌyara koyseemmansa hattono jaallaꞌya ledo egensiiseemmansa. Hakko daafira fiixiꞌya giddo rooru jaallaꞌya seekke egennino hattono insa baxino. Fiixiꞌya giddo rooru ani hagiirraame ikkoommatanna xaate anera yaadannokkita kulinoe.”

16. Yesuusi rodiisira Yaaqoobira hedannota leellishinohu hiittoonniiti? (Lekkaalliidi qaagiishshano lai.)

¹⁶ Insara heddinannita leellishshe. Yesuusi reyotenni kaihu gedensaanni Yaaqoobira leelle isira hedannota leellishino. (1 Qo. 15:7) Yaaqoobi Yesuusi hexxo mudhinosikkita huwatiti hiitto ikkinoro hanni hedi. Yaaqoobi Yesuusi Buuraminoha ikkinota ammaninohu tenne yannara ikkara dandaanno. Hakkunni gedensaanni Yaaqoobi wolu fiixisino Yesuusi ayimma afanno gede kaaꞌlinoha ikkara dandaanno.b—Soq. 1:14.

17. Rooma 12:15 nooha xintu seera haꞌrunsa dandiineemmohu hiittoonniiti? (Misileno lai.)

¹⁷ Rooma 12:15 nabbawi. Fiixinkera roorenkanni qarru woy faffote yannara hendeemmonsata leellinsheemmoha ikkiro, insa ninke daafira noonsa lao biddi assidhara dandiitanno.c Lawishshaho, insa ooso ilturo hawalle hagiidhitini yaa hattono ledonsa hagiidhinoommota leellishate mitore aa dandiineemmo. Qoleno fiixinke shiiꞌriro jawaachishannonsare coyiꞌra, mitore assine kaaꞌla hattono sheshifachishannore borreessine soya dandiineemmo. Roorenkanni insara qarru iillannonsa woyte ganyine xaꞌmineemmonsati egennantinote.

18. Rosaanchu Indiriyaasi lawishsha haꞌrunsa dandiineemmohu hiittoonniiti?

¹⁸ Ammanate roduuwiꞌne ledo egensiissensa. Rosaanchu Indiriyaasi Yesuusi Buuraminoha ikkinota huwatiti rodoosi Pheexiroosi Yesuusi ledo baychonkonni egensiisino. (Yoh. 1:40-42) Ninkeno hatto assa dandiinammo ikka? Lawishshaho, saꞌne saꞌne fiixanke gambooshsheho koysa woy jaallanke sagalete koyinseemmo woyte insano koysa dandiineemmo. Fiixanke ammanate roduuwinke ledo egensiinseemmo woyte, insa Yihowa Farciꞌraasine wolu manni gedeerenna dancha manna ikkitinota huwattara dandiitanno.

19. Fiixinke ammanneemmoha mito coye woꞌmunni woꞌma huwata hoogiro nafa insa ma garinni amada hasiissannonke? (1 Pheexiroosi 3:15)

¹⁹ Umi Pheexiroosi 3:15 nabbawi. Fiixinke mito coye assineemmokkihu mayraatiro woꞌmunni woꞌma huwata hoogara dandaanno; kayinni danchare assineemmonsatanna ayirrinseemmonsata woꞌmanka woyte qaaganno. Insa ledo ayyaanna ayirrinseemmokkiha woy mitu budira karsammeemmokkiha ikkirono ledonsa yanna saysate sharrammeemmo woyte hagiidhitara dandiitanno. Lawishshaho, marre laꞌnammonsara, sagale ledonsa intammora hattono wole yannara mitore uynammonsara dandiineemmo.

FIIXIꞌNERA HORO HEXXO MUDHITINOONTE

20. Yaaqoobi lawishshi jawaachishannonke yineemmohu mayraati?

²⁰ Yesuusi uullate aana soqqami woyte Yaaqoobira Yesuusi ledo soqqamate faro gatte baꞌinosi; ikkirono isi gedensoonni Yesuusi rosaancho ikkino. (Gal. 1:18, 19; 2:9) Isi Yesuusa umonni hanafe haꞌrunsinokkiha ikkirono, Yesuusi rosiisinoha batinye roso rosinoti dihuluullissannote. Lawishshaho iso qullaawu ayyaani massageennasi Yesuusi ilaalaho heeꞌre rosiisino rosi ledo sumuu yitanno sokka borreessino.d

21. Yihowa Farciꞌraasine ikkinokki fiixinkera hexxo mudha hasiissannonkekkihu mayraati?

²¹ Fiixinke insara hendeemmota leellishatenna insa kaaꞌlate dandiinummore baala assinoommoha ikkirono halaale macciishsha giwaranna ayirrinye xeinore assankera dandaanno. Insara hexxo mudha hasiissannonkekkihu mayraati? Korkaatuno fiixinkera shaqqille leellinshummo kiiro maaranno Magani Yihowanna Beettisi Yesuusi lawishsha haꞌrunsineemmo. (Luq. 6:33, 36) Leellinsheemmonsa baxilli gale hose insa ninke daafira heddannore biddi assidhanno gede kakkaysansara dandaanno. Qoleno insa ammananke daafira kulloommonsare qaaggara nafa dandiitanno. Insara hexxo mudhineemmokkiha ikkiro, fiixinke giddo mitu ninke ledo Yihowa magansidhanna laꞌne hagiidhineemmoha ikkara dandaanno!