Yihowa ‘Kaansoonninkewa Lanteemmo’ Gede Kaaꞌlinonke

Maatisinna Aani Katiriini 1979 Giliyaadi Rosi Mine rosino; hattono lowo diro Iraanete, Morisheesi, Miyanimaari, Taanzaaniyaho, Ugaandahonna Zayeri soqqantanno gede “kaansoonninsa” woy gaammonninsa. Giliyaadi Rosi Mini rosiisaanchi Jaaki Rediford amaalino amaale insa duucha hinge addi addi bayicho gaamminsa yannara kaaꞌlitinonsa. Hanni insa woꞌnaalshansa kultanna macciishshino.

Maatisi, hanni balaxxe halaale macciishshootto gara kulattonke ballo.

Maatisi: Layinkihu Alamete Oli yannara anniꞌya Poolaandete heeꞌre, Kaatoolikete ammaꞌno giddo noohu batinyu manni lawisiisaano ikkinota huwatino. Ikkirono isi duucha woyite, “Addu ammaꞌno wolewa dihoogganno” yaanno. Gedensoonni tini halaale ikkase huwatoommo. Batinye akkala maxaaffa hidhoommo. Tenne maxaafi giddo mittu gordu gedee kuula afiꞌrinoho Hegere Heeshshowa Massanno Halaale yaanno maxaafaati. Konni maxaafi cuꞌmo lowo geeshsha baxoommo daafira, hidhanni heeꞌrenni mittu hashshinni nabbawe gudoommo. Soodo halaale afiꞌroommota huwatummo!

Dotteessa 1972 hanafe, Yihowa Farciꞌraasine qixxeessitinota batinye borro nabbawoommo hattono xaꞌmuwaꞌyara Qullaawu Maxaafi giddonni dawaro afiꞌroommo. Yesuusi lawishshunni kulino manchi assinore assoommo yaa dandiinanni; kuni daddalaanchi “ayirrado uduunnicho” afiꞌrihu gedensaanni konne uduunnicho hidhate noosire baala hirino. Anino afiꞌroommoha halaalunniha “ayirrado uduunnicho” hidhammora yee yuniversite eꞌꞌe rose akimicha ikkate mixoꞌya “hiroommo” woy aguroommo. (Mat. 13:45, 46) Hakkiinni Sadaasa 10, 1972 cuuamoommo.

Mittu diri giddo anniꞌyanna amaꞌya hattono maaꞌnu rodiiꞌya halaale rose cuuamino. Hakkiinni Maaja 1973 woꞌma yanna soqqansho hanafummo. Songonkera noori diinaggaabbe soqqantanno suwisaano giddo xumanna Yihowa baxxannoti Aani Katiriini yinanni rodoo no. Ise ledo baxamme 1975 adhammummo; hakkiinni shoolu diri geeshsha Siwiidinete Istireemisendi yinannihu biifadunna mannu Qullaawa Maxaafa rosa hasiꞌranno katamira soqqammoommo.

Aani Katiriini: Anniꞌya halaale macciishshinohu Istookiholmi yinanni katamira yuniversitete roso gudara kae heeꞌreeti. Hakkawaro anera sase aganalla ikkannoe; ikkirono anniꞌya gambooshshe haꞌranno woyitenna soqqansho fulanno woyite haaꞌre haꞌrannoe. Amaꞌya tenne baxxinokki daafira Yihowa Farciꞌraasine digaraho yite tenne leellishate woꞌnaaltino. Ikkirono didandiitino; hakko daafira iseno cuuantino. Tonaa sasu diriꞌyanni anino cuuamumma hattono 16 diro ikkieta suwisaancho ikke soqqama hanafumma. Sabbakkannori roore hasiissannowa Uume yinanniwa haꞌre soqqamummahu gedensaanni baxxitino suwisaancho ikkumma.

Maatisinna ani adhammummohu gedensaanni lowo manni halaale rosanno gede kaaꞌline hagiidhinoommo. Konni manni giddo mitte Maaveri yinanni wedellitteeti; ise baxxannota ispoortete godoꞌle agurte maaꞌne rodooꞌya ledo suwisaancho ikkite soqqantino. Insa 1984 Giliyaadi Rosi Mine eꞌꞌe rose Ikuwadoorete misiyoone ikke soqqamanni no.

Addi addi gobbara misiyoone ikkitine soqqantini yannara “kaansoonnihewa lati” yitanno amaale haꞌrunsitinoonnihu hiittoonniiti?

Maatisi: Duucha hinge addi addi gobbara soqqammeemmo gede gaammoonninke. Ikkirono roorenkanni umo heeshshi assate Yesuusi lawishsha haꞌrunsine isi aana ‘rumuxxine’ heeꞌrate dandiinummore baala assinoommo. (Qol. 2:6, 7) Lawishshaho marreemmo qooxeessira heedhanno roduuwi ninke assineemmore rossanno gede agadhantenni insa assitannore rosate woꞌnaalleemmo. Heddanno garanna budensa huwata hasiꞌnoommo. Yesuusi lawishsha haꞌrunsinummo kiiro, ‘way gama kaansoonni’ haqqicho gede gaammoonninkewi ikkiwano ikkiro lantanni heeꞌnoommo yine hendeemmo.—Fa. 1:2, 3.

Aani Katiriini: Mitte haqqicho kaansihu gedensaanni lophate arrishshote iibbilli hasiisannose. Hatteente gede Yihowa ninkera lowo geeshsha baxxannonkere ammanate roduuwa uyinonke. (Fa. 84:11) Lawishshaho Iraanihu qaru katamira Teeraani shiima songora heeꞌnoommo yannara roduuwu wosinsidhinonke gari Qullaawu Maxaafi giddo kulloonnita wosina adhino manni xagge qaangeemmo gede assinonke. Iraani gobbara soqqama banxoommoha ikkirono Maaja 1980 gashshootu Yihowa Farciꞌraasine looso agawino daafira 48 saate giddo hatte gobbanni agurre fulleemmo gede kulloonninke. Hakkiinni Afirikaho Zayeri (xaa yannara Kongo Dimokiraatiki Rippaabilike yinanni) soqqammeemmo gede gaamminke.

Afirikaho soqqammeemmo gede gaammoonninketa afummati umi qara wiꞌloomma. Afirikaho noo hamasinna dhibbi daafira macciishshoommari waajjeemma gede assinoe. Kayinni hakkiicho lowo diro soqqantinori lame muli jaallanke togo yitinonke: “Waajjitinoonte! Hakkira hadhine diegentinoonni; ikkirono baxxinannita dihuluullammeemmo.” Insa yitinori garaho! Hakko heedhanno roduuwi manna baxxannoreetinna faasiiqootaho. Isinni lewu diri gedensaanni loosonke agamboonni daafira Zayerenni haꞌra hasiissunketa, “Yihowa ballo Afirikaho keeshshineemmo gede assinke” yee huucciꞌranni noommata wodanchummati muushshi yoomma.

Yihowara soqqantine afidhinoonni atooti maati?

Maatisi: Addi addi gobbarinna addi addi budi noonsa misiyoonooti ledo kalaqiꞌnoommoha kaajja jaalooma qummi assa dandeemmo. Qoleno gaammoonninkete mite gobbara batinye manna Qullaawa Maxaafa xiinxallinse afiꞌnanniha baxxino hagiirre afiꞌnoommo. Mito woyite mittu mittunku 20 meddi yaanno manna xiinxallinseemmo. Afirikaho heedhanno roduuwi wosina adhitanno garanna roduuwa baxxanno gara horo dihaweemmo. Taanzaaniyaho noo songuwa towaantummo yannara gallanniwa afiꞌrino makeenanke roduuwu minna mule uurrisiꞌneemmo; hatte yannara insa ninke wosinsiꞌrate “wolqansara aleenni” ikkinore nafa assitino. (2 Qo. 8:3) Ninkera lowo geeshsha baxxitinoti barru hoshshonke daafira hasaambeemmo yannaati; tenne yanna xagge hasaambeemmo yanna yineemmo. Tenne yannara aninna Katiriini barru baala hawarro hawarro hoshshonke daafira hasaambeemmo; hattono ledonke ikkino daafira Yihowa galaxxineemmo.

Aani Katiriini: Ane lowo geeshsha hagiirsiissannoeti alamete doyichohu roduuwu maamari giddo heeꞌraꞌyaati. Addi addiha batinye qaale ronsoommo; lawishshaho Faarsi afoo, Faransayete afoo, Lugaandu afoonna Siwahiili afoo ronsoommo hattono baxisannoha addi addi bude ronsoommo. Haaro rosaano kaaꞌlinoommo, addu jaalla kalaqiꞌnoommo hattono insa ledo “mitteenni” Yihowara soqqammoommo.—Sof. 3:9.

Qoleno dhagge ikkannoha biifadonna addi addiha Yihowa kalaqino kalaqama laꞌnoommo. Soqqammeemmo gede addi addi gobbara gaamminke kiiro, massagannanke Yihowa ledo haꞌnanni heeꞌnoommohu gede assine hendeemmo. Isi uminkenni horo afiꞌra dandiineemmokki woꞌnaalsha afiꞌneemmo gede assinonke.

Iillinoꞌne qarri maati? Dandiitine saꞌinoonnihu hiittoonniiti?

Maatisi: Mito woyite addi addi dhibbi lawishshaho shekkeere waaddannonke. Mitte yannara Aani Katiriini hedeweelcho dhiweennase darre xaginsoonnise. Geedhitino annuwinkenna amuuwinke daafirano yaandeemmo; hakko daafira roduuwinke insa haja assite towaattinonsa daafira galanteemmonsa. Insa annuwankenna amuuwanke ammanante, cincatenni, baxillunninna hagiirrunni towaattinonsa. (1 Xi. 5:4) Mito woyite kayinni, annuwankenna amuuwanke xeertote heeꞌne kaaꞌlatenni sainore assa dandiineemmoti gattino yine ninkeneeto bushiinsheemmo.

Aani Katiriini: Zayeri soqqammanni heeꞌneenna 1983 koleeru dhibbi baasa waadinoe. Akimichu Maatisira “Ise tenne gobbanni rakke haadhe haꞌri!” yiino. Layinki barra, Siwiidine haꞌrannohu uduunne hogowanno horophilla calla ikkino daafira konni horophillinni haꞌnummo.

Maatisi: Misiyoone ikkine soqqama agurrammoraati yine hendoommo daafira hururamme wiꞌlinoommo. Akimichu yiino gede ikkikkinni Aani Katiriinira woyyinose. Mittu diri gedensaanni galagalle Zayeri hingoommo; tenne yannara Lubumbaashi yinanniwa noote Siwahiili afiinni massangannite shiima songora soqqammoommo.

Aani Katiriini: Lubumbaashi heeꞌnoommo yannara umo kaoomma. Ooso ilate hendoommokkiha ikkirono, godowa noo qaaqqo shiiꞌra lowo geeshsha xissiissinonke. Ikkirono hattenne dadilline heeꞌnoommo yannara Yihowa hendoommokki elto uyinonke. Albinni roore lowo manna Qullaawa Maxaafa xiinxallisa hananfoommo. Mitto diro ikkitinokki yanna giddo halashshaanote kiiro 35 kaꞌe 70 iillitino hattono gambooshshe daanno manni kiiro 40 kaꞌe 220 iillitino. Albinni roore diinaggaambe soqqammoommo hattono Yihowa atooti lowo shesho afiꞌreemma gede assinoe. Xaa geeshsha mito woyite qaaqqinke daafira hendeemmo hattono hasaambeemmo. Yihowa wodaninke xisso woꞌmunni woꞌma hursanno yanna quqquxamme agadhineemmo.

Maatisi: Mite yannara Aani Katiriinira wolqa shaqqishinose. Anera lowo deerra iillitinoti godowu giddi kaansere nooetanna darre xaginsannieta kullie. Ikkirono xaa yannara danchu noommo; Aani Katiriinino Yihowara soqqamate dandiiture baala assitanni no.

Fonqolu iillanni noonkeri ninke calla ikkinoommokkita huwantoommo. Ruwaandaho 1994 sircho bade gudate ola kayinsihu gedensaanni kaampete noore lowo jaallanke haꞌne towaantoommo. Insa ammana, cincansanna woꞌmanka woyite wosina adhitannore ikkansa laꞌꞌanke aye qarri iillinsarono Yihowa mannisira wolqa aannonsata huwanteemmo gede assitinonke.—Fa. 55:22.

Aani Katiriini: Wolu fonqoli iillinonkehu 2007 Ugaandunnita sinu biiro maassiisate haꞌnummo yannaraati. Pirogiraame gooffuhu gedensaanni misiyoonootunna Beetelete soqqantannori ledo mitteenni gamba yine 25 ikkine Keeniyaho nooha Naayiroobi haꞌnanni heeꞌnoommo. Keeniyu danna iillinammora kaꞌne heeꞌneenna hogowu makeeni daye hedeweelcho ninke heeꞌnoommo makeena kibbi. Makeenu oofaanchinna onte jaallanke bayichonkonni reyitino; mitte rodoo hospitaale hadhuhu gedensaanni hakko reyitino. Insanni galagalle xaadate lowo geeshsha quqquxammoommo!—Iyo. 14:13-15.

Sunu sununni anera mada woyyitinoe. Ikkirono Maatisinna ane hattono woloota danotenni kainohunni yaaddo waaddannonke. Ani hashsha mase kaeemma qoleno wodanu dhibbi amadino manni gede assannoe. Tini lowo geeshsha waajjishshannote. Kayinni Yihowa eeggifate huucciꞌranna banxeemmo qummeeshshuwa nabbawa shesho afiꞌneemmo gedenna qarra dandiine saꞌneemmo gede kaaꞌlitinonke. Akimootunniwano haꞌnoommo; insa assitinonkeri kaaꞌlinonke. Xa dhibbinkenni woyyaamboommo; hattono togoo qarri iillanni noonsare sheshifachisha dandiineemmo gede kaaꞌlankera Yihowa huucciꞌneemmo.

Iillinoꞌne qarra dandiitine saꞌinoonni gara kulitto woyite Yihowa “rainokki quuphi gede” asse amadinoꞌneta coyiꞌroottona hatto yoottohu mayyaateeti?

Maatisi: Tini yaatto Siwahiili afiite; tenne yaatto “Tumebeebiwa kama mayai mabichi” woy “Rainokki quuphi gede assine amandoonninke” yinanni. Mittu manchi rainokki quuphe hiiqqamannokki gede qorophe amadannonte gede, Yihowano gaammoonninkewa baalankawa shaqqillunni kaaꞌlinonke. Woꞌmanka woyite hasiisannonkere hoonge diegenninoommo; isinni hakkiinni sainore afiꞌneemmo. Yihowa baxannonketanna kaaꞌlannonketa buunxeemmo gede assitinonke doogga giddo mitte Aliidi Bisi leellishinonke shaqqilleeti.

Aani Katiriini: Yihowa shaqqille leellishannoha mitto lawishsha kuleemmahe. Mitto barra silke dowwolle Siwiidinete noohu anniꞌya baasa dhiwaminota kullie. Hatte yanna Maatisira shekkeerete dhibbi xaalla woyyaawe noosi. Qaera haꞌrate horophillu tikkeette hidhate ikkanno woxi dinonke; hakko daafira makeenanke hirate murciꞌnummo. Hakkiinni lamu manni silke dowwolinke; konni manni giddo mitte silke dowwolinori heeꞌnoommo gara afino minaannanna minaamaati; insa mittu manchi tikkeetera ikkanno woxe uyitankera dowwoltino. Layinki silke dowwoltinoti kayinni mitte jawa rodooti; ise ‘qarramino mannira ikkanno’ yite maaxxino woxe uyitankera dowwoltino. Shiimu daqiiqi giddo Yihowa daye iillinonke!—Ibi. 13:6.

Woꞌma yanna soqqansho soqqantinoonnihu 50 diri giddo rossinoonniri maati?

Aani Katiriini: Jawaante afiꞌneemmohu ‘wodanaaꞌmine Yihowa addaxxinummoro’ ikkinota rosoomma. Yihowa addaxxineemmoha ikkiro isi ninke daafira olamanno. (Isa. 30:15; 2 Du. 20:15, 17) Gaammoonninkewa baalawa Yihowara soqqamate dandiinummore baala assinoommo daafira wolu aye garinnino afiꞌra dandiineemmokki atoote afiꞌnoommo.

Maatisi: Rosoommo coyi giddo qaru aye coyi giddo heeꞌre Yihowa addaxxatenna isi ane daafira qaafo adhanno gara laꞌꞌate. (Fa. 37:5) Isi qaale einonte gede woꞌmanka woyite kaaꞌlinoe. Xaa yannara Miyanimaari Beeteelera soqqammanni tini halaale ikkase laꞌnanni heeꞌnoommo.

Soqqanshonsa halashshiꞌra hasidhannori batinyu wedelli Yihowa ninkera leellishinoha ammanamino baxille laꞌanno yine hexxineemmo. Insa kaansoonninsawa woꞌmunni woꞌma lattanno gede Yihowa kaaꞌlansara maahoyye yituro konne atoote afidhannota dihuluullammeemmo.