Nabbawaano Xaꞌmitanno Xaꞌmo

Lawishsha 30:18, 19 borreessaanchi, ‘meyatinna labbaahu baxillunni xaadanno gari lowo geeshsha maalaꞌlinanni coyeti’ yiino. Isi hatto yiinohu mayyaateeti?

Konni qummeeshshira noo hedo batinyu mannira, wole agurina mitu Qullaawu Maxaafi egennaammira nafa hibbo ikkitino. Haaro Alame Tirora konni qummeeshshiti woꞌma hedo togo yitanno: “Hedoꞌyara aleenni ikkinohu [woy, “lowo geeshsha maalale ikkannoehu,” lekkaallo] sasu coyi no; leellannoekkihuno shoolu coyi no: Iima allamurchu buuwanno garaati, hamashshu kinchu aana haꞌranno garaati, markaawe baaru aanaanni hadhanno garaatinna labbaahu meya beetto ledo haꞌranno garaati.”—Law. 30:18, 19.

Konni albaanni, “labbaahu meya beetto ledo haꞌranno gara” yitanno yaatto busha assoote kultannote yine ammanneemmo. Mayira? Qooxeessaho noo hedo “ikkinonke” yaannokkihu bushu coyi daafira kultanno. (Law. 30:15, 16) Qoleno kiiro 20 mitte bunsheno diassoomma yite coyidhannote ‘foora mancho’ daafira kultanno. Hakko daafira iima allamurchu buuwanno gara, kinchu aana hamashshu haꞌranno garanna baaru aana markaawe hadhanno gara afa dandiinannikkinte gede, kuni manchi ayino afikkinni hasiꞌrino coye assannota leellishshanno yine hendeemmo. Konnira, “labbaahu meya beetto ledo haꞌranno gara” yitanno yaatto busha assoote yaano xagaraamu manchi affinori nookki beetto doge soꞌrisiisannoseta kultannote yine huwantoommo.

Ikkollana, tini hedo danchare kultannote yineemmo gede assannonke korkaati no. Borreessaanchu, dhagge ikkinosi coyella kulanni no.

Hunditi Ibiraawootu afii borrono kuni qummeeshshi danchare kulannoha ikkinota leellishshanno. Tiolojikaali Lekiskeni ovi ze Oldi Testamenti yinanni maxaafi kulanno garinni, Lawishsha 30:18 “hedoꞌyara aleenniiti” yine tirroonnihu Ibiraawootu afii qaali “lowo geeshsha baxxino coye, ikkannokkire, woy dhagge ikkannore” yitanno tiro afiꞌrinoho.

Yunayitidi Isteetisete Harvardi Yuniversite Pirofeesere ikkinohu Kirofard Toy yinanni manchino tini Qullaawu Maxaafi hedo bushare kultannota ikkitinokkita xawisino. Isi, “Kulloonni coyi dhagge ikkannoha ikkasi leellishshannote” yiino.

Hakko daafira, Lawishsha 30:18, 19 noo hedo addinta dhagge ikkannoha, isinni hedonkera aleenni ikkino coye kultannote yine ammana garaho. Konni Qullaawu Maxaafi borreessaanchi gede ninkeno, iima allamurchu buuwanno gara, lekka afiꞌrinokki hamashshi kinchu aana haꞌranno gara, jawa markaawe baara tayisse hadhanno garanna aju beetti mitte beetto ledo baxame mitteenni hagiirru noo heeshsho heeꞌranno gara laꞌneemmo woyite dhagge assiꞌneemmo.