Woyyitino Yanna Daggara Mule No!
“Bushuullu shiima yannalla keeshshitanno . . . Shaqqaddu kayinni baatto ragidhanno; atootenna keere afidhe hagiidhitanno.”—FAARSO 37:10, 11.
TINI masaalo woꞌmitanna laꞌꞌa halchatto? Halchattoti dihuluullissannote. Tini masaalo muli yannara woꞌmitannota ammanneemmo gede assitannonke taje no.
Saꞌu birxichuwara, heeꞌnoommohu “goofimarchu barra” ikkinota xawisse leellishshannote Qullaawu Maxaafi masaalo giddo mitella laꞌnoommo. (2 Ximootewoosi 3:1-5) Maganu qullaawu ayyaanisinni tenne masaalo borreessinanni gede assinohu hexxo heedhannonke gedeeti. (Roomu Sokka 15:4) Qullaawu Maxaafi masaalo woꞌmase xa noo qarri baalunku muli yannara baꞌꞌannota leellishshannote.
Goofimarchu barri gedensaanni mayi ikkanno? Maganu Mangiste alame woꞌma gashshitanno. (Maatewoosi 6:9) Hanni Qullaawu Maxaafi hatte yannara uullate aana heeshsho hiittoota ikkitanno yaannoro laꞌno:
● Hude diheedhanno. “Baatto gide laashshito; ilaallate aana jajju woꞌmo.”—Faarso 72:16.
● Dhibbu diheeꞌranno. “Tsiyooni heeꞌranno manni giddo, ‘Dhiwamoommo’ yaannoha dianfanni.”—Isayaasi 33:24.
● Baatto haarooꞌmitanno. “Molo baatto hagiidhitanno; halalli baattorano daraaro fultanno.”—Isayaasi 35:1.
Muli yannara woꞌmitannote Qullaawu Maxaafite jawaachishshanno masaalo giddo kuri gamatella. Yihowa Farciꞌraasine muli yannara woyyitino yanna daggannota huluullantannokkihu mayiraatiro kultannohe gede mayira dixaꞌmatto?