ROSO 58
Yihowara Ammanante Heeꞌri
Addu Kiristaani aye manchino woy aye coyino Yihowa magansiꞌrannokki gede guficho ikkansara diwodhanno. Atino guficho ikkahera wodhattokkiti dihuluullissannote. Ammanamakki Yihowa albaanni lowo waaga afidhino. (1 Duduwo 28:9 nabbawi.) Yihowara ammanama qarra ikkitannohe gede assanno coyi maati? Togoo coye qeelte saꞌꞌa dandaattohu hiittoonniiti?
1. Wolu manni Yihowara ammanama qarra ikkitannonke gede assara dandaannohu hiittoonniiti?
Mitu manni Yihowara soqqammeemmota hoolate woꞌnaalanno. Tenne busha assitannori ayeooti? Halaale agure fulinohu mitu manni, ammananke baꞌanno gede assate Maganu dirijjite daafira kapho coyiꞌranno. Insa kaadaasinete yinanni. Qoleno mitu ammaꞌnote murrooti, qoropha bushshinori halaalu mininni fultanno gede assate ninke daafira kapho tareessitanno. Konni daafira kaadaasinete ledo hasaawa, maxaaffansanna webisayitensa aana fushshitannore nabbawa, woy viidiyonsa laꞌꞌa gawajjitannonke. Yesuusi, mannu Yihowara ammaname soqqamannokki gede assate woꞌnaaltannori daafira togo yiino: “Insa illiweelte heedhe illiweeloota massaggannoreetina agurre. Illiweelu illiweelo massagiro lamunku balete ubbanno.”—Maatewoosi 15:14.
2. Doodhineemmo coyi Yihowara ammanammoommotanna teꞌee leellishannohu hiittoonniiti?
Yihowara noonke baxilli, kaphu ammaꞌno ledo hili xaadooshshino heeꞌrannonkekki gede qorophineemmo gede kakkayisannonke. Loosinke woy miila ikkinoommo dirijjite woy assineemmohu aye coyino kaphu ammaꞌno ledo xaado afiꞌrinoha ikka dihasiissannosi. Yihowa “Mannaꞌya ballo, . . . [Bayira] Baabilooninni fulle!” yee qorowisiisinonke.—Yohaannisi Ajuuja 18:2, 4.
LEDDE XIINXALLI
Aye manchino Yihowara ammanamattokki gede assannoheta hooꞌla dandaatto gara rosi. Qoleno Bayira Baabiloonenni fulte ammanamoottoha ikkoottota leellisha dandaatto gara wodanchi.
3. Kaphaano rosiisaano qorophi
Yihowa dirijjite daafira gara ikkinokkire macciishshinummoro maa assa hasiissannonke? Lawishsha 14:15 nabbabbe; hakkiinni tenne xaꞌmo hasaabbe:
Macciishshinoommore baala adda assiꞌra hasiissannonkekkihu mayiraati?
Layinki Yohaannisi 9-11 nabbabbe; hakkiinni kuri xaꞌmuwa hasaabbe:
Kaadaasine ma assa dihasiissannonke?
Kaadaasine xaande hasaawinseemmokkiha ikkiro nafa, qoropha hoongummoro rosonsa hiittee doogganni macciishshinammora dandiineemmo?
Yihowa isi woy dirijjitesi daafira gara ikkinokkire coyiꞌnanna haja assine macciishshinanna laꞌꞌanno woyite hiitto ikkannoha lawannohe?
4. Mittu rodii cubbo loosanno woyite Maganoho ammanante heeꞌri
Songote giddo mittu manchi jawa cubbo loosinota anfummoro maa assa hasiissannonke? Hanni Maganu hundi Israeelera uyino Seerinni ronseemmoha xintu seera wodanchi. Leewaawoota 5:1 nabbabbe.
Konni qummeeshshira kulloonninte gede, mittu manchi jawa cubbo loosinota anfummoro anfoommore cimeeyyete kula hasiissannonke. Balanxe kayinni, hakku manchi umisi cubbosi cimeeyyete kulanno gede jawaachishanke danchummate. Kula giwiro kayinni, Yihowara ammanammoommore ikka hasiꞌneemmo daafira cimeeyyete anfoommore ninke kula hasiissannonke. Tenne assanke . . .
Yihowara ammanamino baxilli noonketa leellishshannohu hiittoonniiti?
cubbo loosi manchira ammanamino baxilli noonketa leellishshannohu hiittoonniiti?
songote ammanamino baxilli noonketa leellishshannohu hiittoonniiti?
Ammanate rodiikki qarru giddora eiro kaaꞌlisi!
5. Bayira Baabiloone ledo hili xaadooshshino heeꞌroonkehe
Luqaasi 4:8 nna Yohaannisi Ajuuja 18:4, 5 nabbabbe; hakkiinni aante noo xaꞌmuwa hasaabbe:
Xaano kaphu ammaꞌno ledo miiloomu nooe?
Noommohu wole ammaꞌno ledo xaadooshshe afidhino dirijjite giddooti?
Looseemmo loosi kaphu ammaꞌnora kaaꞌlanno?
Agura hasiissannoehu kaphu ammaꞌno ledo xaadisannoehu wolu coyi nookka?
Kuri xaꞌmuwa giddo ee yee qoleemmoti heedhuro, biddi assiꞌra hasiissannoeri maati?
Duuchante doogonni, keeraanchu tiiꞌꞌi heeꞌrannohe gede kaaꞌlannoherenna Yihowara ammanamoottoha ikkoottota leellishannore doodhi.
Mitte ammaꞌno dagooma kaaꞌlate loossanno loosira woxe fushshi yituhero ma assatto?
MITU MANNI TOGO YAANNO: “Halaaleho gaarama dandeemmo gede, kaadaasine Yihowa Farciꞌraasine daafira mayitannoro afa hasiissannoe.”
Hatto yee heda gara labbannohe? Mayira?
XAPHISHSHA
Yihowara ammanamme heeꞌrate, soˈrisiissankera woˈnaaltannoriwiinni xeertiꞌra hasiissannonke. Qoleno kaphu ammaꞌno ledo hili xaadooshshino heeꞌrannonkekki gede qoropha hasiissannonke.
Kageeshsha Rosoottore
Kaadaasinete roso macciishsha hasiissannonkekkihu mayiraati?
Mittu rodii jawa cubbo loosinota anfummoro, maa assa hasiissannonke?
Kaphu ammaꞌno giddonni fulle yine hajanjoonninke hajajo agadha dandiineemmohu hiittoonniiti?
EGENNO LEXXI
Wolu manni Yihowa Farciꞌraasine daafira kapho tareessanno woyite maa assa hasiissannonke?
“Halaale Seekkite Buuxootto?” (Agarooshshu Shae, Woxawaajje 2018)
Mitte dirijjite woy mittu loosi Bayira Baabiloonera kaaꞌlannohoronna teꞌee badde afa dandaattohu hiittoonniiti?
Gibbannonkeri giddo mitootu ammananke shoshshoggishate maa assitino?
“Anjeꞌyanni Kayise Magano Hasiꞌranni Keeshshoommo” yitannote heeshshote xagge giddo, Shinto yinanni ammaꞌno qeesichi kaphu ammaꞌno giddonni fulino gara nabbawi.
“Qullaawu Maxaafi Heeshsho Biddi Assanno” (Agarooshshu Shae, Maaja 1, 2011)