Buutote Qarri Iillannoꞌne Wote

Maateꞌne hagiirraame assiꞌrate dandiitinannire baala assitinirono, hagiirreꞌne hunannohu hedeweelchu coyi tuncu yaaꞌnera dandaanno. (Mekibibi 9:11) Qarru tuncu yaannonke wote Maganu baxillunni kaaꞌlannonke. Aane nooha Qullaawu Maxaafiha xintu seera harunsitinanniha ikkiro, kiꞌnenna maateꞌne buutote qarra nafa qeela dandiitinanni.

1 YIHOWA ADDAXXE

QULLAAWU MAXAAFI MAYYAANNO? “Yaachishannoꞌne coye baalanka isi aana tuqqe, korkaatuno isi kiꞌnera assaawanno.” (1 Pheexiroosi 5:7) Iillannoꞌne fatana abbannohu Magano ikkinokkita woꞌmanka wote qaagge. (Yaaqoobi 1:13) Maganunniwa shiqqinanniha ikkiro, isi baalunkunni woyyino garinni kaaꞌlannoꞌne. (Isayyaasi 41:10) “Wodaniꞌneta fushshitine isira kuꞌle.”—Faarso 62:8.

Qullaawa Maxaafa barru baala nabbawanna xiinxallano shesho afidhinanni gede assitannoꞌne. Konni garinni, Yihowa “qarrinke baalunku yannara sheshifachishannonke” gara umiꞌne heeshshonni laꞌꞌa dandiitinanni. (2 Qorontoosi 1:3, 4; Roomu Sokka 15:4) Isi ‘wodancha baalanta roortanno salaamesi’ aaꞌnera qaale eino.—Filiphisiyusi 4:6, 7, 13.

MAA ASSA DANDIITINANNI?

• Wodanaaꞌmitinanni gedenna garunni heddinara kaaꞌlannoꞌne gede Yihowa huuccidhe

• Nooꞌne doorsha baalanka seekkitine laꞌine woyyannore doodhe

2 KIꞌNENEETONNA MAATEꞌNE TOWAAXXE

QULLAAWU MAXAAFI MAYYAANNO? “Wodanchanno manchi wodani egenno afiꞌranno; hayyichu manchi maccano egenno hasidhanno.” (Lawishsha 18:15) Woꞌma mashalaqqe afiꞌrate woꞌnaalle. Maateꞌne miillara mayi hasiisannoro huwatate woꞌnaalle. Insa ledo hasaabbe. Coyidhanno wote macciishshe.—Lawishsha 20:5.

Shiidhinanni wotena? Waajjitine xissoꞌne fuqqitinoonte. Yesuusi nafa “wiꞌlinota” qaagge. (Yohaannisi 11:35; Mekibibi 3:4) Qoleno dancha gede fooliishshiꞌranna goxa hasiissanno. (Mekibibi 4:6) Hatto assaꞌne iillinoꞌne qarra dandee saꞌꞌate kaaꞌlitannoꞌne.

MAA ASSA DANDIITINANNI?

• Maateꞌne ledo hasaawa roso assiꞌrate qarru iillaꞌne geeshsha agartinoonte. Togoo rosichi heeꞌriꞌnero, qarru yannara kiꞌne ledo hasaawa shota ikkitannonsa

• Kiꞌnera iillinoꞌnehu gedee qarri iillinonsarira hasaaphe

3 HASIISSANNOꞌNE KAAꞌLO XAꞌMIꞌRA FOKKIFATTINOONTE

QULLAAWU MAXAAFI MAYYAANNO? “Halaalaanchu jaali ayewoteno baxillaanchoho; isi qarru barrira ilamanno rodooti.” (Lawishsha 17:17) Jaallaꞌne kaaꞌlitaꞌnera hasidhannoha ikkirono, maa assitannoꞌnero kayinni afa hooggara dandiitanno. Hasiisannoꞌneri maatiro kullensa ikkinnina fokkifattinoonte. (Lawishsha 12:25) Hattono Qullaawa Maxaafa seekkite affinori ayyaanaamittetenni kaaꞌlitannoꞌne gede xaꞌmidhe. Insa Qullaawu Maxaafi giddonni kultannoꞌne biddishshi kaaꞌlannoꞌne.—Yaaqoobi 5:14.

Magano addaxxannonna isi uyino hexxo ammananno manni ledo ganyitine gamba yitinanniha ikkiro hasiissannoꞌne irko afidhinanni. Qoleno jawaante hasiissannonsare kaaꞌlitiniro lowo shesho afidhinanni. Yihowara nooꞌne ammananna isi uyino hexxo kullensa. Qarrantinore kaaꞌle, hattono baxannoꞌnenna kiꞌnera assaawanno manniwa aana agurtinoonte.—Lawishsha 18:1; 1 Qorontoosi 15:58.

MAA ASSA DANDIITINANNI?

• Muli jaaliꞌnera giddoꞌneta hasaaphe, hattono kaaꞌlannoꞌne wote maahoyye yiiyye

• Hasiisannoꞌnere maaxxinikki baddine kulle