Qaaqqoꞌne Rosiisa Dandiitinannihu Hiittoonniiti?

Yihowa maate xinti yannara annuwahonna amuuwaho oosonsa towaatate looso uyinonsa. (Qolasiyaasi 3:20) Qaaqqiꞌne Yihowa baxannonna sirnyaataamo ikke lophanno gede rosiisa kiꞌne loosooti. (2 Ximootewosi 1:5; 3:15) Qoleno qaaqqiꞌne woy qaaqqoꞌne wodanita afa hasiissannoꞌne. Oosoꞌnera lawishsha ikkaꞌneno lowo geeshsha hasiissannote. Balaxxine kiꞌne Yihowa Qaale wodaniꞌnera wodhaꞌne, oosoꞌne dancha gede rosiisate kaaꞌlitannoꞌne.—Faarso 40:8.

1 OOSOꞌNE KIꞌNE LEDO HASAAWA WAAJJITANNOKKI GEDE ASSE

QULLAAWU MAXAAFI MAYYAANNO? ‘Macciishshate rakkinoonnire, coyiꞌrate muddantinannikkire ikke.’ (Yaaqoobi 1:19) Oosoꞌne giddonsata fushshite kultaꞌnera hasidhinanniti egennantinote. Insa coyiꞌra hasidhanno wote kiꞌne macciishshate qixxaabbinoonnita affanno gede asse. Hedonsa waajjitukkinni coyidhanno gede kaaꞌlannore asse. (Yaaqoobi 3:18) Oosoꞌne godowa kaajjadda woy russitinannire ikkitinoonnita hedduro, giddonsata fushshite dikultannoꞌne. Oosoꞌne lossitinanni wote cincaaleeyye ikke; hattono baxxinanninsata ganyitine kullensa.—Maatewoosi 3:17; 1 Qorontoosi 8:1.

MAA ASSA DANDIITINANNI?

• Oosoꞌne ledoꞌne hasaawa hasidhanno wote hasaawissensa

• Qarru kalaqamanno wote calla ikkikkinni oosoꞌne ledo ganyitine hasaabbe

2 YAATE HASIDHINORE HUWATATE WOꞌNAALLE

QULLAAWU MAXAAFI MAYYAANNO? “Coye xiinxalle laꞌꞌannohura assannori seyannosi.” (Lawishsha 16:20) Mito wote oosoꞌne hedo huwatate coyidhannore calla laꞌinoonte. Wedellu coye iibbishansa woy wodaninsara nookkire coyiꞌransa haaro coye diꞌꞌikkitino. “Mittu manchi noo coye macciishshikkinni dawaro qolannoha ikkiro, tini gowwimmate.” (Lawishsha 18:13) Konni daafira oosoꞌne coyidhanno coyira hanqate muddantinoonte.—Lawishsha 19:11.

MAA ASSA DANDIITINANNI?

• Oosoꞌne coyidhannori baxireno ikkiro coyidhe guddukkinni mereero eꞌinoonte woy coye batissinoonte

• Kiꞌne insa geeshshiri heedhinoonni waro heddinanni gara qaagate woꞌnaalle; hattono hakkawaro kiꞌnera lowore lawannoꞌneri maatiro hedde

3 LAMUNKURA MITTU GARI HEDO NOOꞌNETA AFFANNO GEDE ASSE

QULLAAWU MAXAAFI MAYYAANNO? “Beettoꞌya annikki seejjo macciishshi; amakki rosiissannohereno deꞌooti.” (Lawishsha 1:8) Yihowa annuwahono amuuwahono oosonsa aana silxaane heedhannonsa gede assino. Oosoꞌne ayirrissannoꞌnenna hajajantannoꞌne gede rosiisa hasiissannoꞌne. (Efesooni 6:1-3) Annahonna amate “woꞌmunni woꞌma hedote mittimma” noonsakkiha ikkiro ooso tenne wodancha dandiitanno. (1 Qorontoosi 1:10) Sumuu yitinoonnikki coyi heeꞌriro, oosoꞌne albaanni coyiꞌrantinoonte; tini oosoꞌne ayirrissannoꞌnekki gede assitara dandiitanno.

MAA ASSA DANDIITINANNI?

• Oosoꞌne seejjitinannihu hiittoonniitiro hasaabbine xaadisidhe

• Oosoꞌne rosiisa lainohunni babbaxxitino hedo heedhuꞌnero, galteꞌne hakko garinni heddinohu mayiraatiro wodanchate woꞌnaalle

4 SOMA FUSHSHIDHE

QULLAAWU MAXAAFI MAYYAANNO? “Beettu haꞌra hasiissannosi doogo haꞌranno gede rosiisisi.” (Lawishsha 22:6) Ooso qajeelsiꞌne dancha guma afiꞌra, iimi uullanni kae ikkannore diꞌꞌikkino. Oosoꞌne hiittoonni qajeelsitinanniro soma fushshidhe; konni garinni qajeelsate insa seejjano hasiissannoꞌne. (Faarso 127:4; Lawishsha 29:17) Seejjate yaa qorichisha calla diꞌꞌikkitino; oosoꞌne fushshitinoonni higgera hajajama hasiissannonsahu mayiraatiro affanno gedeno kaaꞌlensa. (Lawishsha 28:7) Qoleno Yihowa Qaale baxxanno gedenna xintu seerasi badde affanno gede rosiissensa. (Faarso 1:2) Tini keeraanchu tiiꞌꞌi heeꞌrannonsa gede kaaꞌlitannonsa.—Ibiraawuyaani 5:14.

MAA ASSA DANDIITINANNI?

• Oosoꞌne Maganu nooha ikkinota affe addaxxitannosi gede kaaꞌlensa

• Oosoꞌne interneetetenna dagoomittete aante kalaqiꞌnanni webisayitera heeꞌrannoha maaeela coye gibbanno gede rosiissensa. Qaaqquulle doge bushiishanno manna qorophitanno garano rosiissensa