Maganu Jaalla Gannate Ikkitanno Uulla Aana Heedhanno

Gannate xa heeꞌneemmo alamenni baxxitinote. Uullate aana buutote qarri, dadillunna xisso woꞌmitara Maganoho hasatto dinosi. Maganu konni albira uulla gannate assanno. Gannate maricho labbanno? Hanni Qullaawu Maxaafi yaannota laꞌno:

Dancha manna. Gannate Maganu jaalla teesso ikkitanno. Kuꞌu koꞌonnira danchare assitanno. Maganu qullaambete fushshino seeri garinni heedhanno.—Lawishsha 2:21.

Intanniri woꞌmanno. Gannatete giddo hude diheedhanno. Qullaawu Maxaafi, “Uullate aana gidu woꞌmanno” yaanno.—Faarso 72:16.

Biifado minenna hagiirsiisanno looso. Gannate ikkitanno uullara, mitte mittente maatera minu heeꞌrannonsa. Mittu mittunku manchi loosanno loosinni hagiirre afiꞌranno.—Isayyaasi 65:21-23.

Alamete doyichora keere ikkanno. Olunni mimmito qasannohunna reyannohu diheeꞌranno. Maganu Qaali, “[Maganu] ola uurrisanno” yaanno.—Faarso 46:8, 9.

Dancha ordu keere. Qullaawu Maxaafi, “[Gannatete] heedhannori giddo mittuno ‘Xissinoe’ yaannohu dino” yaanno. (Isayyaasi 33:24) Ledeno laanshaawa, ballicha, duuddichanna babbicha ikkannohu diheeꞌranno.— Isayyaasi 35:5, 6.

Xisso, dadillunna reyo diheedhanno. Maganu Qaali: ‘Hindiiddo duucha illensa aaninni feyanno; reyo woy dadillu woy wiꞌla woy dhibbu konni kaꞌira diheeꞌranno. Hakkuno mayiraati? Albi coyi budi sainohuraati’ yaanno.—Ajuuja 21:4.

Bunshe assitannori diheedhanno. Yihowa, “Bunshe giddonsa woꞌmitinori uullate aana diheedhanno; cubbaataammuno uullate aaninni xoqolantanno” yitanno hexxo uyino.—Lawishsha 2:22.

Mannu baxamannonna mimmito ayirrisanno. Albillitte halaalaancho yoo hooga, gadadaaꞌma, honqooqimmanna mimmito giwa diheedhanno. Mannu mittimmatenninna Maganu fushshinohu qullaambete seerinni sumuu yee heeꞌranno.—Isayyaasi 26:9.