Maganunnire Rosa Dandaatto Doogo

Qullaawa Maxaafa nabbabbe Yihoware rosa dandaatto. Maganu seeda yanna albaanni hasiꞌrino manna doore hedosi borreessitanno gede assino. Tini borrono Qullaawa Maxaafa yaamantanno. Yannankera Maganunnire rosa dandiineemmohu Qullaawa Maxaafa nabbambeeti. Qullaawu Maxaafi Yihowa Qaale woyi sokka amadino daafira Maganu Qaale yaamamanno. Qullaawu Maxaafi yaannore ammana hasiissannonke, korkaatuno Yihowa horontanni dikaphanno. Qullaawu Maxaafi Yihowa “kaphannokki Magani” yaanno. (Titoosi 1:2) Maganu Qaali halaale amadino.—Yohaannisi 17:17.

Qullaawu Maxaafi Maganu uyinote muxxe ikkitino elto giddo mittoho. Baxanno anni beettisira soyiino sokka gedeeti. Maganu tenne uulla gannatete soorre heeꞌrate biiffinotanna dhaggennita assannota coyiꞌranno. Saꞌu yannara assinore, yannankera assanni noorenna albira ammanantino oososira maricho assannoro coyiꞌranno. Ledeno mitiinsannonkerinni hiittoonni fulleemmoronna hagiirre afiꞌneemmo gara kulannonke.—2 Ximootewosi 3:16, 17.

Yihowa Farciꞌraasine Maganu jaallaati; Qullaawu Maxaafi yaannota wodanchatto gede kaaꞌlitannohe. Qullaawa Maxaafa rosa hasiꞌrattota kulinsa. Konnira baatisiissannoheri dino. (Maatewoosi 10:8) Leddeno, gambooshshensa haꞌri. Magansiꞌrate gamba yitanno base Yihowa Farciꞌraasineta Gambooshshu Addaraashe yinanni. Konne gambooshshe haꞌrattoha ikkiro, Maganoho noohe egenno mulenni lophitanno.

Maganu kalaqinorinni isire rosa dandaatto. Lawishshaho, Qullaawu Maxaafi: “Maganu iimanna uulla kalaqi” yaanno. (Kalaqo 1:1; Ibiraawuyaani 1:10) Yihowa “iima” kalaqi yannara arrishshono ledo kalaqino. Kuri Maganunnire maricho rosiissannonke? Yihowara lowo wolqa noosita egensiissanno. Arrishshote gedeere wolqa afiꞌrinore kalaqara dandaannohu iso callaati. Ledeno arrishshote gedeeta iibbillenna xawaabba uyiitannota hattono xoꞌannokkita, kalaqara dandaannohu xiinxallunna hayyichu, Yihowa ikkinota leellishshannonke.

Yihowa kalaqinori baxannonketa leellishanno. Hanni batinyu dani laalcho uullate aana nooha hedi. Yihowa mittu dani laalcho calla aara woy horonta hoꞌlara dandaanno. Yihowa togo assantenni babbaxxino dani, geeshshi, kuulinna coommilli noonsa laalo uyinonke. Kunino Yihowa baxannonketa calla ikkikkinni lowo geeshsha shaqqado, mannu oosora danchare hedannohanna shooshaqa ikkasi leellishanno.—Soqqamaanote Looso 17:24.