Yesuusi Xiwantinore Hursino

YESUUSI mariwa baala, xiwantinore hursino. Isi assino maalale duduwi qooxeessaho noo olliiranna katamma baalate duduwami. Konni daafira mannu naafoota, balloota, danqootanna xiwantinore wole lowo mannoota Yesuusiwa abbi. Yesuusino baalanka hursinsa.

Yohaannisi Yesuusa cuuinku sasu diri saino. Yesuusi hawaariyaatesira mulenni Yerusaalame haꞌrannota, hakko shinannisitanna hakkiinnino reyotenni kaꞌꞌannota kulinsa. Haꞌra geeshsha kayinni xiwantinore hursanni keeshshi.

Mitto barra Yesuusi Sambatunni rosiisanni no. Yihudu mannira Sambatu fooliishshote barraati. Tini laꞌꞌatto mancho lowo geeshsha xiwantino. Ise 18 diro woꞌma ukkite keeshshitino; hossi yite uurrite diaffanno. Konni daafira Yesuusi angasi aanaho woreenna hurte hossi yite uurritu!

Kuni coyi ammaꞌnote cimeeyye hanqisi. Insa mereerinni mittu hanqe, gamba yiino manna togo yii: ‘Loosiꞌnannihu lewu barri no. Konni daafira xiwaniꞌnenni hura hasiissannoꞌnehu hakko barra ikkiina Sambatunni ikka dihasiissannosi!’

Ikkollana Yesuusi togo yee qoli: ‘Kiꞌne bushuullu, mereeriꞌnenni Sambatunni harrichchosi tire waa hayikkisannokkihu no? Ikkina tini buxichcho mancho 18 diro woꞌma xiwantinoti hura dihasiissannose?’ Yesuusi qolino dawaro konne bushuulle manna saalfachchishshu.

Yannate gedensaanni Yesuusinna hawaariyaatesi Yerusaalame hadhu. Hadhanni Iyyaarkote katama saꞌuta, lamu ballootu huucciꞌraano Yesuusi saꞌꞌanni noota macciishshitu. Hakkiinnino qoonqonsa gotti assite, ‘Yesuusa kaaꞌlinke!’ yitu.

Yesuusino balloota woshshe, ‘Marichcho assammoꞌnera hasidhinanni?’ yee xaꞌminsa. Insano, ‘Mootichcha, illenke faninke’ yitu. Yesuusino illensa amammadi; insano hakkawotenni laꞌu! Yesuusi tenne hagiirsiissanno maalale baala assinohu mayiraatiro afootto? Korkaatuno manna baxanno daafiraatinna mannu iso ammaꞌnanno gede hasiꞌreeti. Qoleno isi Nugusa ikke moohanno yannara uullate aana layinkita mittuno xiwamannokkita afa dandiineemmo.