Yesuusi Rosiisino Gara

MITTO barra Yesuusi mittu manchira jaalasi baxa hasiissannosita kulisi. Manchuno Yesuusa, ‘Jaaliꞌya ayeeti?’ yee xaꞌmi. Yesuusi kuni manchi ma hedinoro afino. Kuni manchi, ‘Ane jaali sirchoꞌya ikkinohonna ammanaꞌya harunsanno mannaati’ yee hedino. Yesuusi iso mayinoro hanni laꞌno.

Yesuusi mito wote xagge coyiꞌre rosiisanno. Konne manchono hatto asse rosiisaraati. Yesuusi mittu Yihudu manchinna Samaariyu manchi xagge coyiꞌri. Lowohu Yihudu manni Samaariyu manna baxannokkita albaanni ronsoommo. Yesuusi coyiꞌrino xagge konni woroonni noote.

Mitto barra Yihudu manchi ilaalaame doogo tayise Iyyaarko haꞌranni no. Ikkollana mulqidhannori qalxite amaddusi. Woxesi mulqidhe isono gante heeshshotenna reyote mereero tugge hadhu.

Kuni coyi ikki gedensaanni mittu Maganu mini kakkalaanchi hatte doogo dayi. Isi ganneenna doogote uwino mancho lai. Kuni kakkalaanchi marichcho assannoha lawannohe? Konne mancho afiti wirri yee wole doogo hige haꞌri. Hakkiinnino Magano lowo geeshsha ammaꞌnino yinoonnihu wolu manchi hakkaa hige dayi. Isi Leewaawichchaho. Isina gannoonni mancho kaaꞌlara uurriyya? Deeꞌni, diuurrino. Kuueeti kakkalaanchunna Leewaawichchu doogote faffe hadhanna lai.

Ikkollana gannoonni manchi ledo noohu ayeetiro lai. Isi Samaariyu manchooti. Yihudu mancho kaaꞌlanni no. Madasira xagichcho gananni no. Hakkunni gedensaanni konne Yihudu mancho fooliishshirannowanna woyyaawannowa massisi.

Yesuusi tenne xagge gudihu gedensaanni xaꞌmo xaꞌmisi mancho togo yii: ‘Kuri sasunku mannooti giddo ganamino manchi jaali hiikkonneeti? Kakkalaanchohonso, Leewaawichchahonso Samaariyu manchooti?’

Manchuno togo yee qoli: ‘Samaariyu manchooti. Kuni manchi ganamino manchira danchare assino.’

Yesuusi qole togo yii: ‘Halaale yootto. Atino hadhe wolootaho hatto assi.’

Yesuusi rosiisino gari didanchaho? Yesuusi Qullaawu Maxaafi giddo yiinore macciishshineemmoha ikkiro lowore danchare ronseemmo; dihattooti?