Yihowa Farciꞌraasine Osonsa Insa Ammaꞌno Harunsitanno Gede Giddeessitannoni?

Digiddeessitanno; Magano magansiꞌra annu annu doorshaati. (Roomu Sokka 14:12) Yihowa Farciꞌraasine qaaqqullinsara Qullaawu Maxaafi seera rosiissannoha ikkirono, mittu mittunku qaaqqi lophihu gedensaanni Yihowa Farciꞌraasincho ikkannoronna teꞌee umisi doodhanno.—Roomu Sokka 12:2; Galatiyu Sokka 6:5.

Wolu anninna amante gede, Yihowa Farciꞌraasineno oosonsara seekkansara hasidhanno. Insa oosonsa kaaꞌlanno yite heddannore rosiissanno. Lawishshaho, kaaꞌlitannonsa ogimma, dancha amanyootenna ammaꞌnote roso rosiissannonsa. Yihowa Farciꞌraasine, Qullaawu Maxaafi rosi heeshsho seekkannota ammantanno; konni daafira, insa Qullaawa Maxaafa xiinxallissenna gambooshshe ledonsa hadhanno gede assite Qullaawu Maxaafi rosi wodaninsara qaꞌmanno gede assitanno. (Marro 6:6, 7) Tini, mittu mittunku qaaqqi lophihu gedensaanni, annisinna amasi ammaꞌno harunsannoronna teꞌee doodhate kaaꞌlitannosi.

• Yihowa Farciꞌraasine muꞌre qaaqquulle cuuꞌannoni?

• Yihowa Farciꞌraasine oosonsa cuuama gibburo fiile hooꞌlitannoni?

• Yihowa Farciꞌraasine sabbakkanno woyite oosonsa haadhe fultannohu mayiraati?

• Yihowa Farciꞌraasine ayyaanna ayirrissanno?

• Yihowa Farciꞌraasine ikkite lophitinorira mayi macciishshamannonsa?

Yihowa Farciꞌraasine muꞌre qaaqquulle cuuꞌannoni?

Dicuuꞌanno. Muꞌre qaaqquulle cuua Qullaawu Maxaafi rosi ledo sumuu diyitanno. Lawishshaho, Qullaawu Maxaafi umi xibbi diri Kiristaani cuuamara albaanni kulloonninsa sokka hagiirrunni “macciishshe” adhe maaro einota kulanno. (Soqqamaasinete Looso 2:14, 22, 38, 41) Konnira mittu manchi cuuamate, Qullaawu Maxaafi roso seekke huwata, ammananna rosino garinni heeꞌra hasiissannosi daafira, qaaqqimma gudinoha ikka hasiissannosi. Muꞌru qaaqqi qole tenne assa didandaanno.

Qaaqquullu lophituhu gedensaanni cuuama doodhitara dandiitanno. Ikkollana, assitanni noori shaaꞌꞌare ikkinokkita huwata hasiissannonsa.

Yihowa Farciꞌraasine oosonsa cuuama gibburo fiile hooꞌlitannoni?

Dihooꞌlitanno. Yihowa Farciꞌraasine oosonsa insa ammaꞌno harunsa hoogguro dadillitannoha ikkirono, oosonsa baxxanno, hattono insa Yihowa Farciꞌraasine ikka gibbinohura calla fiile dihooꞌlitanno.

Yihowa Farciꞌraasine sabbakkanno woyite oosonsa haadhe fultannohu mayiraati?

Sabbankeemmo woyite qaaqquullenke haaꞌne fulleemmo gede assannonkehu duuchu korkaati no.a

• Qullaawu Maxaafi annuwunna amuuwu oosonsara Maganu daafira rosiisanna iso magansidhanno gede qajeelsa hasiissannonsata kulanno. (Efesooni Sokka 6:4) Ammananke mannu albaanni farciꞌra magansiꞌra ikkitinohura, annuwunna amuuwu oosonsa qajeelsate farcidhanno garano rosiisa hasiissannonsa.—Roomu Sokka 10:9, 10; Ibiraawoota 13:15.

• Qullaawu Maxaafi ooso “Mootichu suꞌma guwissanno” gede xawise kulanno. (Faarso 148:12, 13, Kingi Jeemsi Vershiini) Magano guwinseemmoti qara doogo isi daafira wolootaho kulate.b

• Qaaqquullu anninsanna amansa ledo sabbakansa lowore kaaꞌlitannonsa. Lawishshaho, insa duuchunku gari manni ledo hasaambanni gara rossanno; hattono kaajja akatta lawishshaho, shaqqille, danchumma, manna ayirrisanna baxille leellisha rossanno. Ammanansara xinta ikkitino qummeeshshuwano seekkite egentanno.

Yihowa Farciꞌraasine ayyaanna ayirrissanno?

Yihowa Farciꞌraasine Magano hagiirsiissannokki ayyaanna diayirrissanno.c (2 Qorontoosi 6:14-17; Efesooni Sokka 5:10) Qullaawu Maxaafi aana xintantinokki ayyaanna lawishshaho, ilammoonni barra woy Ganna diayirrinseemmo.

Ikkollana maatenke ledo yanna sayisanna qaaqquullinkera mitore aa hagiirsiissannonke. Ninke ayyaana agarre calla ikkikkinni woꞌmanka woyite maatenke ledo gamba yineemmo hattono mimmitoho mitore uyineemmo.