Maganu Addi Addiha Heeshshote Kalaqama Kalaqinohu Suutu Soorronniiti?
Qullaawu Maxaafi mayyaanno?
Deeꞌni. Maganu manna, hattono addi addi “gari” woy “dani” saadanna muꞌro kalaqinota Qullaawu Maxaafi xawise kulanno.a (Kalaqama 1:12, 21, 25, 27, Haaro Alame Tiro; Yohaannisi Ajuuja 4:11) Mannu sirchi baalunku umi anninna amanke yaano Addaaminna Heewani ooso ikkinota Maganu Qaali kulanno. (Kalaqama 3:20; 4:1) Maganu addi addi gariha heeshshote kalaqama kalaqinohu suutu soorronniiti yitanno hedo Qullaawu Maxaafi yaannori ledo sumuu diyitannote. Hige sayinsete fullahaano, mitto gara woy mitto wido ikkino kalaqami mereero badooshshu noota coyidhanno; tini hedo Qullaawu Maxaafi rosi ledo xaada gibbannota diꞌꞌikkitino.
Mitu manni mayyee ammananno?
Maganu addi addi kalaqama kalaqinohu suutu soorronniiti yitannorira, tenne hajo lainohunni babbaxxitino lao noonsa. Insayikilopiidiya Biritaanika yaanno garinni, mitootu “Maganu kalaqama qineessanno doogga giddo mitte kalaqamu doorshaati (nachuraali sellekshiini)” yite ammantanno.b
Maganu addi addi kalaqama kalaqinohu suutu soorronniiti yitannori togo yiteno ammantanno:
Heeshshote kalaqami baalunku biꞌre birqiiqa heeꞌrinohu mittu dani kalaqaminni soorramanni dayinoho.
Mittu dani kalaqami suutunni soorrame wole baxxino kalaqama ikkanno.
Tenne baala haꞌrinsho illaallisannohu Maganoho.
Suutu soorro Qullaawu Maxaafi yaannori ledo sumuu yitanno?
Maganu suutu soorro horoonsiꞌrino yitanno hedo, Qullaawu Maxaafi giddo Kalaqamu maxaafira noota kalaqamu xagge soꞌro labbanno gede assitanno. Ikkollana, Yesuusi Kalaqamu maxaafira noo xagge halaale ikkitinota buuxisino. (Kalaqama 1:26, 27; 2:18-24; Maatewoosi 19:4-6) Qullaawu Maxaafi kulanno garinni, Yesuusi uullara daara albaanni gordoho Maganu ledo heeꞌrino; qoleno Maganu ‘baalankare’ kalaqi woyite ledosi loosino. (Yohaannisi 1:3) Konni daafira, Maganu addi addiha heeshshote kalaqama kalaqinohu suutu soorronniiti yaa Qullaawu Maxaafi rosi ledo sumuu diyitannote.
Muꞌronna saada heedhanno qooxeessa rosate soorramansa suutu soorro halaale ikkitinota leellishshanno?
Mittu gari kalaqami mereero mageeshshi badooshshi heeꞌrannoro Qullaawu Maxaafi bade dikulanno. Ikkirono, Maganu kalaqinoti addi addi muꞌronna saada sirtanno woyite, woy heedhanno qooxeessa rosate soorrantara dandiitanno yitanno hedo soꞌro diꞌꞌikkitino. Mitootu togoo soorrama suutu soorrooti yiturono, wolu baxxino kalaqami kalaqamanno yaa kayinni diꞌꞌikkino.
a Qullaawu Maxaafi giddo borreessinoonnihu “gara” woy “dana” yaanno qaali, sayinsete fullahaano horoonsidhannohu “sircho” yaanno qaalinni roortino tiro afiꞌrinoho. Mito woyite sayinsete egennaammi suutu soorronni haaru sirchi kalaqamino yitanno; noore coyiꞌniro kayinni, haaro sirchooti yitannohu wolu gari kalaqama ikkikkinni, (Kalaqamu maxaafi kulannonte gede,) mittu gari kalaqami wido ikke shiimare baxxino kalaqamaatilla.
b “Kalaqamu doorsha” yinanniti, mitto bayicho noo saada woy muꞌro giddo dandaa hoogihu goofeenna, dandiihu heeꞌrannonna siranno yitanno hedooti.