“Ille Huninohura Ille” Yaa Mayyaate?

Qullaawu Maxaafi mayyaanno?

“Ille huninohura ille” yitanno wodho, Maganu Muse widoonni hundi Israeelera uyno Seeri giddo noote; Yesuusino Ilaalu Sibkatesi yannara tenne wodho qummi assino. (Maatewoosi 5:38; Fulo 21:24, 25; Marro 19:21) Tenne wodho garinni, bunshe assino mancho qorichinshanni woyte, qorichunna loosino jaddo taalo ikka hasiissannose yaate.a

Tini wodho mittu manchi manna afanni heeꞌrenni gawajjanno woyte haꞌrunsinannite. Afanni heeꞌrenni manna gawajjino manchi daafira Muse Seeri togo yaanno: “Wolu manchi miqicho hiiqqiro, isi miqichono hiiqqinona; ille huniro, illesi hunnona; hinko hiiqqiro, hinkosi hiiqqinona; wole gawajji gede assine isono gawajjinona.”—Leewaawoota 24:20.

“Ille huninohura ille” yitanno wodho uynoonnihu maa hendeeti?

“Ille huninohura ille” yitanno wodho uynoonnihu mannu uminsa rabbisiꞌrara hende diꞌꞌikkino. Hatteentenni, moohinsoonni gashshaasine quwa saꞌukkinni malino qoricha sayissanno gede kaaꞌlitanno gedeeti.

Qoleno tini wodho affanni heedhenni woloota gawajjitannore woy gawajjate heddannore ittisate kaaꞌlitino. Seeru togo yaanno: “Wolu mannino [taashshote qaafo adhinanna laꞌꞌanno manni] konne coye macciishshe layinkimeeshsho hattoo coye assa waajjanno.”—Marro 19:20.

Kiristaanu “ille huninohura ille” yitanno wodho haꞌrunsanno?

Deeꞌni, Kiristaanu tenne wodhonni digalanno. Tini wodho Yesuusi reyonni shaaraminohu Muse Seeri widooti.—Rooma 10:4.

Ikkirono, tini wodho Maganu hedo anfeemmo gede kaaꞌlitannonke. Lawishshaho, Maganu taashsho baxannota huwanteemmo gede assitannonke. (Faarso 89:14) Qoleno taashshosi hiittootero leellishshanno; isi wodho garinni, cubbo loossinori ‘halaalunni seejjama’ yaano hasiisanno deerrinni seejjama hasiissannonsa yaate.—Ermiyaasi 30:11.

“Ille huninohura ille” yitanno wodho lainohunni mannu hedannota soꞌrote hedo

Soꞌrote hedo: “Ille huninohura ille” yaa kakkachimmate woy godowa kaajjate.

Halaale: Tini wodho taashsho abbate yine kakkacha coye assinanni gede woy quwa saꞌne kaajjinanni gede jawaachishshannota diꞌꞌikkitino. Hatteentenni, garunni haꞌrunsiniro, tini wodho shoomantino daanyooti malino qoricha sayissanno gede kaaꞌlitannote; insa konne assitannohu, hakkawoyte noo coyenna hunihu magey geeshsha afanni heeꞌrenni assinoro balaxxe seekkite buuxxuhu gedensaanniiti. (Fulo 21:28-30; Kiiro 35:22-25) Konnira “ille huninohura ille” yitanno wodho deerra saino qoricha qorichinshannikki gede agarooshshe ikkitanno.

Soꞌrote hedo: “Ille huninohura ille” yitanno wodho mannu mimmito rabbisiꞌranni baaddaancho ikke heeꞌranno gede assitanno.

Halaale: Muse Seeri umisi togo yaanno: “Ayeno rabbissinoonte; woy koma amaddinoonte.” (Leewaawoota 19:18) Muse Seeri mannu uminsa rabbisiꞌranno gede jawaachishannoha ikkikkinni, Maganonna isi taashsho halashshate fushshinoha yoote seera addaxxanno gede kaaꞌlannoho.—Marro 32:35.

Yesuusi soꞌrote hedo taashshino

Yesuusi “ille huninohura ille” yaanno seera mitu manni doogimale tidhannota afino. Hakko daafira togo yee hedonsa taashshino: “‘Ille huninohura illesi hunnona; hinko hiiqqinohura hinkosi hiiqqinona’ yinoonnita macciishshitinoonni. Ani yeemmoꞌneti kayinni: Bushu manchi ledo giwantinoonte; qiniiticho baqqaalla qawaadannohehura guracho baqqaallano qolisi.”—Maatewoosi 5:38, 39.

Yesuusi, “yinoonnita macciishshitinoonni” yiinota wodanchi. Isi hatto yiinohu rabbisiꞌnanni gede rosiissannore mite Ayhudete ammaꞌno rosiisaano hede ikkara dandaanno. Qullaawu Maxaafi egennaami Adem Kileerk togo yiino: “Ayhudootu konne seera [ille huninohura ille yaannoha] . . . mannu mimmitoho koma amadanno gedenna rabbisiꞌrate yee bunshe baala assanno gede fajjate horoonsidhannoha ikkikkinni digatino.” Kuri ammaꞌnote massagaano rabbisiꞌnanni gede jawaachishansa, Maganu Seera doogimale horoonsiꞌnanni gede assitino.—Maarqoosi 7:13.

Yesuusi kayinni Maganu Seerira xintu baxille ikkinota luphi assino. Togo yiino: “‘Maganokki Yihowa . . . baxi.’ Baalanta roortannotinna umi hajajo tenneeti. Tenne labbannoti layinki hajajo, ‘Olliichokki umikki gede assite baxi’ yitannote. Seerunna Masaalaanote rosi baalu xintaminohu tenne lamente hajajo aanaati.” (Maatewoosi 22:37-40) Yesuusi addu rosaanosi bande anfannihu rabbatenni ikkikkinni baxillunni ikkinota rosiisino.—Yohaannisi 13:34, 35.

a Tenne yoote wodho mito woyte Laatinete qaalinni leks talioniis yinanni; biꞌree waro heedhinoti mite mite wole dagano yoo yitanno woyte tenne wodho haꞌrunsitannota buunxoonni.