Ninke Kiristaanaho Yitannori Batidhinohu Mayiraati?
Qullaawu Maxaafi mayyaanno?
Mannu Yesuusi Kiristoosi roso irkiꞌre “Kiristaanaho” yinannita addi addi ammaꞌno xintiꞌrino. Ikkollana, Qullaawu Maxaafi kulanno garinni addunniti Kiristaanu ammaꞌno mitte callate. Togo yineemmo gede assannonkeha hanni sase coye calla laꞌno.
Yesuusi “halaale” rosiisannota coyiꞌrino; hundi Kiristaanino ammaꞌnonsa “halaalu doogo” yitanno. (Yohaannisi 8:32; 2 Pheexiroosi 2:2; 2 Yohaannisi 4; 3 Yohaannisi 3) Tenne yaattonni huwata dandiineemmonte gede, Yesuusi rosiwiinni baxxino roso rosiissannori addu Kiristinna harunsitannore diꞌꞌikkitino.
Qullaawu Maxaafi Kiristaanu “mittu wodanirenna mitte hedore” ikka hasiissannonsata kulanno. (1 Qorontoosi 1:10) Ikkollana, ninke Kiristaanaho yaannohu batinyu manni wole agurreenna Kiristaanu ayeooti yitanno hajora nafa sumuu diyaanno. Insa insaneewa sumuu yitannokkiri kuri baalunku hiitto ikkite adda ikkitanno?—1 Pheexiroosi 2:21.
Yesuusi, batinyu manni ninke Kiristaanaho yaanni heeꞌrenni isi hajajo wonshannokkitanna isino insa diegennoommoꞌne yaannonsata balaxe masaalino. (Maatewoosi 7:21-23; Luqaasi 6:46) Mito manna dogginori uminsa qiniitira yite halaalu magansiꞌra booreessitannore ammaꞌnote murrootaati. (Maatewoosi 7:15) Mitu manni kayinni, Qullaawu Maxaafi halaale ikkikkinni insa macciishsha baxxannore kulannonsa daafira kaphu Kiristinna harunsa doodhanno.—2 Ximootewoosi 4:3, 4.
Yesuusi qamadetenna boddoonu lawishsha coyiꞌri yannara, addunnite Kiristaanu ammaꞌno giddo lowo finqille (kaadaasine) fultannota masaalino. (Maatewoosi 13:24-30, 36-43) Lowo diro, addu Kiristaananna kaphu Kiristaana bada qarra ikkitanno. Yesuusi masaalinonte gede, soqqamaasinesi reyitu gedensaanni kaadaasine fultino. (Soqqamaasinete Looso 20:29, 30) Kaadaasine rosiissanno rosi addi addiha ikkara dandaanno; ikkirono, suꞌmu Kiristinna harunsitannoti babbaxxitino ammaꞌno baalanti ‘halaaluwiinni faffinote.’—2 Ximootewoosi 2:18.
Qoleno Yesuusi addu Kiristaaninna kaphu Kiristaani baxxe leellanno yanna daggannota masaalino. Konni heeꞌnoommohu “alamete goofimarchira” tini masaalo woꞌmitino.—Maatewoosi 13:30, 39.