Isi Maganu No?

Qullaawu Maxaafi mayyaanno?

Ee no; Qullaawu Maxaafi giddo Maganu noota buuxissannoti ammansiissanno taje no. Maganu no yine ammana hasiissannonkehu mulla taje nookkiha woy ammaꞌnonke hatto yitino daafira diꞌꞌikkino; hatteentenni Qullaawu Maxaafi, baalanka coye ‘fonqolle laꞌneemmo’ gedenna ‘wodanchate’ dandoonke horoonsiꞌneemmo gede jawaachishannonke. (1 Teselonqe 5:21; 1 Yohaannisi 5:20) Hanni Qullaawu Maxaafi kulannota aante noota ammansiissanno taje huwati:

• Amanyootunni qinaabbinotinna heeshshote kalaqami nooti kalqete alame Kalaqaanchu noota leellishshanno. Qullaawu Maxaafi togo yaanno: “Baalunku mini minannoha afiꞌrino. Baalankare loosinohu kayinni Maganoho.” (Ibiraawoota 3:4) Batinyu lowo roso rosino manni, huwatate qarrissannokkiti tini hedo ammansiissannota ikkitinota huwatino.a

• Ninke mannu oosora, kalaqamunni heeshshote yaa mayyaateronna heeꞌneemmohu mayiraatiro afate hasatto noonke; manninatinkera hasiisannori heeꞌrinkero nafa, tini hasattonke woꞌma hoogguro harshammi diyineemmo. Qullaawu Maxaafi ayyaanaamittete hude daafira kulannohu iseraati; tenne giddo mitte, Magano afatenna iso magansiꞌrate noonke hasattooti. (Maatewoosi 4:4; Yohaannisi Ajuuja 4:11) Tini ayyaanaamittete hasattonke, Maganu noota leellishshanno taje calla ikkitukkinni isi tenne hasattonke wonshiꞌnammora hasiꞌrannoha shaqqado Kalaqaancho ikkinota leellishshanno.

• Qullaawu Maxaafi giddo kulloonniti mitto mittonka coye tittirte kultanno masaalo lowo xibbi diri gedensaanni woꞌmitino. Masaalote giddo kulloonnihu mittu mittunku coyi gatikki woꞌmasi, tenne masaalo coyiꞌrinohu mannunnita roortino wolqa noosi Magani noota leellishanno.—2 Pheexiroosi 1:21.

• 

  Qullaawa Maxaafa borreessituri hakkawaro noohu wolu manni huwatinokkiha sayinsete coye huwattino. Lawishshaho hundi waro noohu batinyu manni baatto daaniichu, manchaame woy bootu duhe amadino yite ammantanno. Qullaawu Maxaafi kayinni Maganu ‘baatto mulla darga rarraasinota’ kulanno. (Iyyoobi 26:7 ) Hatteente gede, Qullaawa Maxaafa umo borreessinoonni qaalinni Isayaasi 40:22 baatto qunqumado ikkitinota kultanno. Batinyu manni, Qullaawu Maxaafi borreessaano togoota baxxitino egenno afidhinohu Maganu kulinonsa daafiraati yee ammananno.

• Qullaawu Maxaafi batinye qarrissanno xaꞌmuwara dawaro qolanno; mittu manchi tenne xaꞌmuwara duushshitanno dawaro afiꞌra hoogiro Maganu dino yee hedara dandaanno. Lawishsha: Maganu baxillaanchonna woꞌmanka dandaannoha ikkina, alamete aana qarrunna bunshe togo batidhinohu mayiraati? Ammaꞌno duucha woyite mannu danchare ikkikkinni bushare assanno gede xixxiibbannohu mayiraati?—Tiito 1:16.