Isi Addanka Daawuloosi No?

Qullaawu Maxaafi mayyaanno?

Ee, Daawuloosi no. Isi ‘tenne gobba [alame] gashshaanchooti’; kuni ayyaanu kalaqami busha sokkaancho ikke Maganoho finqilinoho. (Yohaannisi 14:30; Efesooni Sokka 6:11, 12) Qullaawu Maxaafi Daawuloosi ayimma kulate aante noo suꞌmuwa horoonsiꞌranno:

• Sheexaane; hatto yaa “Hettisamaancho” yaate.—Iyyoobi 1:6.

• Daawuloosi; hatto yaa “Suꞌma hunannoho” yaate.—Yohaannisi Ajuuja 12:9.

• Hamashsho; kuni qaali Qullaawu Maxaafi giddo “Soꞌrisiisaancho” yitanno tiro afiꞌrino.—2 Qorontoosi 11:3.

• Jifannoho.—Maatewoosi 4:3.

• Kaphaancho.—Yohaannisi 8:44.

Busha hedo woy akata diꞌꞌikkino

Mitu manni, Sheexaanu Daawuloosi mannu giddo noote busha hedooti woy akataati yee hedanno. Ikkollana, Qullaawu Maxaafi Sheexaanu Maganu ledo hasaawinota kulanno. Maganu guuta ikkino daafira, giddosi noote busha hedo ledo hasaawara didandaanno. (Marro 32:4; Iyyoobi 2:1-6) Qoleno, Sheexaanu cubbu noosikkiha Yesuusano jifino. (Maatewoosi 4:8-10; 1 Yohaannisi 3:5) Hakko daafira, Qullaawu Maxaafi Sheexaanu mannu giddo noota busha hedo ikkikkinni addanka nooha ikkinota kulanno.

Batinyu manni Sheexaanu addanka noota ammana hoogansa dhagge ikkitannonke? Diꞌꞌikkitannonke; mayira yiniro, Qullaawu Maxaafi Sheexaanu hedinore wonshiꞌrate manna dogannota kulanno. (2 Teselonqe 2:9, 10) Isi manna dogannote qara doogga giddo mitte, batinyu manni Sheexaanu dino yee hedanno gede wodanansa beeshshate.—2 Qorontoosi 4:4.

Mannaho Daawuloosi daafira noonsata wole soꞌrote hedo

Soꞌrote hedo: Maganu, manna qorichishate Sheexaane horoonsiꞌranno.

Halaale: Daawuloosi Maganoho baarigaaraho ikkinnina soqqamaancho diꞌꞌikkino. Sheexaanu Daawuloosi Maganoho soqqamanno manna giwanno hattono beebbate kassasanno.—1 Pheexiroosi 5:8; Yohaannisi Ajuuja 12:10.