Maganu Maa Assammora Hasiꞌranno?

Qullaawu Maxaafi mayyaanno?

Maganu seekkine anfammosira, isiwa shiqqi yinammora, hakkiinni woꞌmu wodaninkenni banxammosiranna soqqammammosira hasiꞌranno. (Maatewoosi 22:37, 38; Yaiqoobi 4:8) Yesuusi heeꞌrino heeshshonna rosiisino rosi, Maganu fajjo wonshatto gara afate kaaꞌlannohe. (Yohaannisi 7:16, 17) Yesuusi Maganu fajjo maatiro rosiisinoha calla ikkikkinni, heeshshosinni Maganu fajjo wonshino. Isinni Yesuusi dayinohu ‘soyinosihu hedinore wonshate ikkinnina, umisi hedo wonshate ikkinokkita’ coyiꞌrino.—Yohaannisi 6:38.

Maganu hedinore woy fajjosi ajuujatenni, qoonqotenni, woy wole baxxitino doogonni kulannoe?

Deeꞌni; Maganu mannu oosora kulara hedino sokka Qullaawu Maxaafi giddo no. Qullaawu Maxaafi, ‘guuta ikkatto gedenna dancha coye assate qixxaawoottoha ikkatto gede’ kaaꞌlannohere kulannohe. (2 Ximootewoosi 3:16, 17) Maganu, isi fajjo maatiro afate Qullaawa Maxaafanna wodanchate dandookki horoonsiꞌrattora hasiꞌranno.—Roomu Sokka 12:1, 2; Efesooni Sokka 5:17.

Kayi Maganu fajjo wonshe afeemmo?

Ee, wonshite afatto. Mayira yiniro, Qullaawu Maxaafi, ‘Maganu hajajo kaajjado diꞌꞌikkitino’ yaanno. (1 Yohaannisi 5:3) Hatto yaa Maganoho hajajama woꞌmanka woyite shotate yaa diꞌꞌikkitino. Ikkirono, hajajante afiꞌratto atooti hajajamate sharramatto sharronni lowo geeshsha rooranno. Yesuusi umisi togo yiino: “Maassantinori Maganu qaale macciishshite hajajantannoreeti.”—Luqaasi 11:28.