Duucha Galte Adha Garaho?

Qullaawu Maxaafi mayyaanno?

Maganu mite yanna geeshsha mannu mitte sae adhanno gede fajjino. (Kalaqama 4:19; 16:1-4; 29:18-29) Ikkollana duucha galte adhate bude xintinohu Magano diꞌꞌikkino. Isi Addaamira mitte galtella uyino.

Maganu, mannu mitte galte calla adhanno gede fushshino seera Yesuusi Kiristoosi haaro ikke rosiisanno gede assino. (Yohaannisi 8:28) Yesuusi adhatenna adhamate daafira xaꞌminisi yannara togo yiino: “Maganu umo kalaqamu waro, labbaahanna meyata asse kalaqinota dinabbabbinoonni? Qoleno, ‘Kunnira manchu annasinna amasi agure galtesi ledo karsamanno. Lamunku mitto biso ikkanno.”—Maatewoosi 19:4, 5.

Yannate gedensaanni, Yesuusi rosaano giddo mittu Maganu ayyaaninni togo yee borreessino: “Mittu mittunkura umisi galte heedhusiro danchaho. Mitte mittenterano umise minaanni heeꞌrisero danchaho.” (1 Qorontoosi 7:2) Qoleno Kiristaanu songo giddo baxxino qeechi noosihu seenne adhino manchi “mitte galteha” ikka hasiissannosita Qullaawu Maxaafi kulanno.—1 Ximootewoosi 3:2, 12.