Uullanke Gashshannohu Hembeelamannokki Gashshooti Heeꞌrakka?—⁠Qullaawu Maxaafi Mayyaanno?

Alamete aana duuchu gashshooti hembeelamanni no. Hobbaate noote yinanni gobbuwara nafa, gashshoote shafannori batiꞌrino; lawishshaho bushu duduwi, doorshu gumi kuꞌu koꞌoye garire roora hoogasi, poletiku babbadooshshinna dagate gaanci duucha gashshoote hembeelino.

Qullaawu Maxaafi hembeelamannokkihu mittu gashshooti noota kulanno. Konni gashshooti daafira kageeshsha macciishshittokki digatootto. Kuni gashshooti Yesuusi Kiristoosi huuccatto assiꞌnanni gara rosiisi woyite qummi assinoho.

•  “Hakko daafira kiꞌne konni garinni huuccidhe: ‘Iima heeꞌrattohu Annanke, suꞌmikki qullaawa ikko. Gashshootikki dayo. Fajjokki iima ikkitanni noonte gede, uullate aanano ikkito.’”—Maatewoosi 6:9, 10.

Qullaawu Maxaafi konni gashshootire mayyaanno?

Maganu Gashshoote—⁠hembeelamannokki gashshoote

Maganu Gashshooti gordoho heeꞌre gashshanno.

• Yesuusi konne gashshoote “gordu Gashshooti” yiino. (Maatewoosi 4:17; 5:3, 10, 19, 20) Konnira isi “Gashshootiꞌya tenne alameha diꞌꞌikkino” yiino.—Yohaannisi 18:36.

Maganu Gashshooti mannu gashshoote hune bayichonsa amadanno.

• Qullaawu Maxaafi togo yaanno: “Kuni [gashshooti] wole gashshoote baala [mannunniha] coꞌo asse hunanno. Isi kayinni hegerera kaajje heeꞌranno.”—Daanieeli 2:44.

Yesuusi Kiristoosi Moote ikke gashshannohu kuni Gashshooti horonta dibaꞌꞌannoho.

• Qullaawu Maxaafi, “Roorresino hegere hegerete; gashshootisirano gawalo dino” yaanno.—Daanieeli 7:13, 14.

Maganu Gashshooti uullate aana keerenna hobbaate abbanno.

• Qullaawu Maxaafi togo yaanno: “Mannu annu annunkunni kaasiꞌrino balasenna woyinete caali hunda, harshammi yite fooliishshidhanno; masisannonsari diheeꞌranno.”—Mikiyaasi 4:4.

Maganu Gashshooti daafira ledde rosi

Yesuusi uullate aana noo waro, rooriidi yannasi “Maganu Gashshootiha dancha duduwo sabbakanni” sayisino. (Maatewoosi 9:35) Qoleno togo yee masaalino:

• “Daga baalate naqaashshe ikkanno gede, Maganu Gashshootiha dancha duduwo uulla woꞌmate dudumbanni; hakkiinni goofimarchu daanno.”—Maatewoosi 24:14.

Xaa yannara, Maganu Gashshootiha dancha duduwo 240 saꞌanno gobbara dudumbanni heeꞌnoonni. Konni gashshootirenna konne gashshoote ragiꞌra dandaatto gara ledde rosatto gede koyinsoommohe.

Maganu Mangiste Maati? yitanno viidiyo lai