Olompikete Godoꞌle Addinta Manna Mitto Assitanno?—⁠Qullaawu Maxaafi Mayyaanno?

Tayixe 2024 Hawadi Olompike onte biliyoone meddi yaanno manni laꞌꞌanno, hattono 206 gobbanni daggino atileetooti beeqqaasine ikkitanno yine hendanni. Kalqete Olompikete Komite pirezidaantichi Toomaasi Baaki togo yiino: “Alame woꞌma keerunni mitte assitanno qixxaawo beeqqinanni heeꞌnoommo.” Isi lede togo yiino: “Olompikete godoꞌle, baalunku babbaxxinoommore ikkinummorono mittooꞌmine keerunni heeꞌra hasiissannonketa huwanteemmo gede assitanno; konnira tenne qixxaawonni hagiidhino.”

Olompikete godoꞌle tenne dhagge ikkitanno mixo wonsha dandiitanno? Addu keerenna mittimma afiꞌne heeꞌneemmo yanna dagga ikka?

Keerenna mittimma abbitanno?

Tayixeti Olompikete godoꞌle mannu ispoorte calla ikkikkinni hakkiinni sainore hedanno gede assitino. Tini godoꞌle mannu mereero babbadooshshe kalaqqannoti dagoomittetenna poletiku hajo luphi yite leeltanno gede assitino. Tenne hajo giddo gama: kalaqamu qoosso, sircho bade giwa, ammaꞌnote babbadooshsheetinna taalleenyu hoongeeti.

Mannu kalqete deerrinni ispoortete gamba yaanno woyite boohaaranni hagiidhanno. Ikkollana, togoo godoꞌle duuchu manni babbadooshshe kalaqqanno akatta leellishannota luphi assitanno; qoleno keerenna mittimma kalaqantenni babbadooshshe batissanno.

Qullaawu Maxaafi giddo, yannankera mannu mittimma huntanno akatta leellishannota balanxe masaalloonni. (2 Ximootewoosi 3:1-5) Tenne Qullaawu Maxaafi masaalo daafira ledde afate, “Yannankera Noo Manni Ikkitonna Akati Daafira Qullaawu Maxaafi Giddo Masaalloonnini?” yaanno birxicho nabbawi.

Addinta alamete keerenna mittimma abbannore

Qullaawu Maxaafi alamete keerinna mittimmara addu buicho maatiro xawise kulanno. Baattote aana noo manni baalunku ‘Maganu Gashshoote’ yinannihu gordu gashshooti hunda mitto ikkannota xawisanno.—Luqaasi 4:43; Maatewoosi 6:10.

Hakkunni Gashshooti Moote Yesuusi Kiristoosi baatto woꞌmate aana keere abbanno. Qullaawu Maxaafi togo yaanno:

• “Keeraanchu latanno; keeruno woꞌmanno.”—Faarso 72:7, Haaro Alame Tiro.

• “Qarraataamo woshshiꞌrannosi woyite gatisannosi; . . . gadadaamma shettotewiinni fushshannonsa.”—Faarso 72:12, 14.

Xa nafa, Yesuusi rosiisino rosi 239 gobbara heeꞌrannoha lowo miliyoone ikkanno manna mittoonsino. Yihowa Farciꞌraasine Kiristaana ikkitino daafira, mimmitu ledo keere heeꞌra rossino. Ledde afate, “Manna Giwa Agura Dandiinanni!” yaanno birxicho afidhinota Agarooshshu Shae metseete nabbawi.