Mangistubba Olaho 2 Tiriliyoone Doolaare Saꞌꞌanno Woxe Fushshitino—Qullaawu Maxaafi Mayyaanno?

Alamete mangistubba 2022ni olantonsara 2.24 tiriliyoone Ameeriku doolaare saꞌꞌanno woxe fushshitino; mangistubba olaho kageeshshi woxe fushshite diegentino; roorenka tennera kaima ikkitinoti Ruusiyu Yukireene horraseeti. Istookholmi Alamete Doyichoti Keeru Xiinxallo Uurrinsha (SIPRI) Dotteessa 2023ni fushshitino rippoorte kultanno garinni, 2022ni:

• Awuroppu konne diro olaho fushshino woxi “xibbunni 13 anga lexxino; Awuroppu gobbuwa 1991 kawa mittu diri giddo olaho kageeshshi woxe fushshite diegentino.”

• “Ruusiyu mangiste . . . olaho fushshitino woxi xibbunni 9.2 anga lexxino; konnira alamete aana olaho lowo woxe fushshitanno gobbuwa giddo ontikki deerrinni sayikki deerra daggino.”

• Xaano ikkiro Yunayitidi Isteetisete (Ameeriku) geeshsha olaho lowo woxe fushshitanno gobba dino; “alamete deerrinni olaho fushshinanni woxi giddo xibbunni 39 anga ikkannoha fushshannohu Ameerikaho.”

“Muli yanna kawa mangistubba olaho fushshitanno woxi lexxanni haꞌrasi, heeꞌnoommo alame albinni roore yaandanni heeꞌnannita ikkitinota leellishanno malaateeti.”—SIPRI dirijjite rippoortera kaaꞌlaanchu borreessaanchi Dokteri Nan Tiyen coyiꞌrinore.

Alamete aana jajjabba mangistubba mimmitu ledo kanca yitannotanna mimmito okkitannota Qullaawu Maxaafi balaxe masaalino; addu keere abbannohu maatirono xawise kulanno.

Olu lexxanni haꞌrannota balanxe masaalloonni

• Qullaawu Maxaafi heeꞌnoommohu ‘kalqete goofimarchira’ ikkinota kulanno.—Daanieeli 8:19.

• Daanieeli maxaafi giddo, yannankera jajjabba alamete mangistubba mimmito okkitannota balanxe masaalloonni. Tini alamete mangistubba kuꞌu koꞌoye roorate mimmito ‘qassanno.’ Qoleno qasantanno woyite lowo “birra” woy woxe fushshitanno.—Daanieeli 11:40, 42, 43.

Tenne dhagge ikkitanno masaalo daafira ledde afate, Woꞌmitino Masaalo—Daanieeli Fooliishsho 11 yitanno viidiyo lai.

Addu keere afiꞌnanni gara

• Qullaawu Maxaafi, Maganu uullate gashshoote baala hunannota kulanno. Isi “horonta diigamannokkihanna wole daga uggitannokki gashshoote uurrisanno. Kuni wole gashshoote baala coꞌo asse hunanno. Isi kayinni hegerera kaajje heeꞌranno.”—Daanieeli 2:44.

• Muli yannara, Maganu Yihowaa mannu gashshooti assa dandiinokkire assanno; yaano geedannoha addu keere abbanno. Hiittoonni? Maganunnihu gordu Gashshooti olu uduunne baalanka hattono finqille baalanta hunanno.—Faarso 46:8, 9.

Maganu Mangiste maa assitannoro ledde afate, “Maganu Gashshooti Giddo ‘Keeru Woꞌmanno’” yaanno birxicho nabbawi.