Koroonu Fayyanni 6 Miliyoone Manni Reyino—Qullaawu Maxaafi Mayyaanno?

Alamenniti Fayyimmate Uurrinsha (WHO) yitanno gara ikkiro, Onkoleessa 23, 2022 geeshsha Koroonu dhibbinni reyino manni 6.27 miliyoone ikkanno. Ikkollana, Fayyimmate Uurrinsha Onkoleessa 5nni fushshitino odoo garinni, reyino manni kiiro hakkii lowo geeshsha roortanno. Tini uurrinsha yitino garinni, 2020 nna 2021nni “Koroonu fayya amaddeenna woy tini fayya abbitino qarrinni reyino manni xaphoomunni . . . 14.9 miliyoone meddi yaanno.” Tenne godowa cortanno ikkito daafira Qullaawu Maxaafi isi yaannori no?

Qullaawu Maxaafi buutote fayya ubbannota balaxe masaalino

•  Yesuusi “goofimarchu barra” yinanni yannara taraawe manna gudannohu buutote ‘dhibbi’ daanno yee masaalino.—Luqaasi 21:11; 2 Ximootewoosi 3:1.

Yesuusi coyiꞌrino masaalo yannankera woꞌmitanni no. Ledde afate, “‘Goofimarchu Barri’ Malaati Maati?” yaanno birxicho nabbawi.

Qullaawu Maxaafi sheshifachishannore kulanno

•  “Jawaante baalate Magani, . . . qarrinke baalu giddo jawaachishannonke.”—2 Qorontoosi 1:3, 4.

Qullaawu Maxaafi kulannori, shiiꞌrinoha batinye manna sheshifachishinonsa. Ledde afate, “Xisso Cinca—Xa Assa Dandaattore” yaannohanna “Shiidhe Xissiisidhanni Noorira Hasiissannota Roore Shesho” yaanno birxicho lai.

Qullaawu Maxaafi geedanno mala kulanno

•  “Gashshootikki dayo, hedoottori gordoho ikkinonte gede, baattote aanano ikko.”—Maatewoosi 6:10.

Muli yannara “Maganu Gashshooti” ‘“Dhiwamoommo” yaannoha anfannikki’ yanna dagganno gede assanno. (Maarqoosi 1:14, 15; Isayaasi 33:24) Konni gordu gashshootirenna kuni gashshooti assannore ledde afate, Maganu Mangiste Maati? yitanno viidiyo lai.

Qullaawu Maxaafi aannoti kaajja amaalenna hexxo aterano minikki mannirano kaaꞌlitannota ikkitino daafira, Qullaawu Maxaafi yaannore ledde rosatto gede koyinsoommohe.