WEDELLOOTU XAꞌMITANNO XAꞌMO
Baxillu Jaalooma Amada—Gafa 1: Baxillu Jaalooma Amadate Qixxaawoommo?
Konni birxichira
Baxillu jaalooma amadate yaa mayyaate?
Mitu mannira baxillu jaalooma amada mulla boohaarate yine assinannire labbannonsa. Ikkollana, konni birxichira, “jaalooma amadate” yaa labbaahunna meyati adhame mimmitoho dancha minaannanna minaama ikkannoronna teꞌee afate mitteenni yanna sayisate. Hakko daafira, baxillu jaalooma amandannihu mulla kaꞌne diꞌꞌikkino. Labbaahu woy meyate ledo dancha yanna sayisate yine calla assinannire diꞌꞌikkino.
Baxillu jaalooma amada, galte hosse, adhamate sumuu yaatenna jaalooma agurate giddo mitte doodhinanni gede kaaꞌlitannota ikka hasiissannose. Baxillu jaalooma hanafatto woyite, lamente giddo mitte gattannokkita afe hanafa hasiissanno.
Qara hedo: Jaalooma amadate qixxaawoommo yite hedattoha ikkiro, adhamateno qixxaawoottota buuxiꞌra hasiissannohe.
Adhamate hendikkinni jaalooma amada, looso amada hasiꞌnikkinni qaalu xaꞌmora haꞌrate gedeeti
Baxillu jaalooma amadate qixxaawootto?
Baxillu jaalooma amaddannori jeefote adhamate sumuu yitara dandiitanno; hakko daafira adhanna adhama seekkannohu woy gawajjannohu hiikku akati noohero balaxxe heda hasiissannohe. Lawishshaho, hanni aane noore hedi:
Maatekki ledo noohe aante. Annikkinna amakki hattono roduuwikki ledo noohe aante, hakko iso caaccaabbe nootto woyite assattori, roore woyite albillitte galtekki ledo hiittoo aante heedhannohero leellishanno.
Qullaawu Maxaafi biddishsha: “Qaraaro, aara, hanqo, gibbo, hemenna bunshe baala kiꞌnewiinni hunne.”—Efesooni Sokka 4:31.
Ateneeto togo yite xaꞌmi: ‘Anniꞌyaranna amaꞌyara hattono roduuwiꞌyara ayirriseemmonsaha lawannonsa? Insa ledo coyi kawa kaꞌaa higannonke woyite gaꞌlabbi yee coyiꞌreemmonso, hanqe insa ledo yekkeerameemmo?’
Annikkinna amakki ledo kawa kaꞌaa higinohe coye tira hoogittoro, albillitte galtekki ledo kalaqamanno coye addinta tira dandaatto?
Meessi injo agura. Adhantinihu gedensaanni, roore woyite galtekki hasatto hedanna ateta agurte ise hasatto wonsha hasiissannohe.
Qullaawu Maxaafi biddishsha: “Ayino wolu qiniite ikkinnina umisi qiniite hasiꞌroonke.”—1 Qorontoosi 10:24.
Ateneeto togo yite xaꞌmi: ‘Woꞌmanka woyite mitto coye ani hasiꞌroommo garinni assinara wotto woreemmo? Wolootu ane joogaho yite heddanno? Ane injo agure wolootu hasatto balaxisiisoommohu hiittee doogganniiti?’
Umo heeshshi assa. Danchu minaanni woy minaama soꞌronsa ammane mimmito godowinta maaro xaꞌmiꞌranno.
Qullaawu Maxaafi biddishsha: “Ninke baalunku woꞌmanka woyite soꞌneemmo.”—Yaiqoobi 3:2.
Ateneeto togo yite xaꞌmi: ‘Soꞌroꞌya bayichonko ammaneemmonso, woleho woreemmo? Mannu mito woyyeessiꞌreemmo coye kulannoe woyite caaccaaweemmo?’
Woxu amadooshshe. Minaanninna minaamara afoo hunannohu rosamino coyi giddo mittu woxu coyeeti. Hakko daafira woxe afimalsa hooga togoo gibbo gatissanno.
Qullaawu Maxaafi biddishsha: “Kiꞌne giddonni mittu mine miꞌnara kairo, mageeshshi woxi hasiisannosiro, ikkanno geeshshi woxi noosironna hoongosiro ofolle dimalanno?”—Luqaasi 14:28.
Ateneeto togo yite xaꞌmi: ‘Woxe kaummo gede fushsheemmokki gede aneneeto eemadheemmonso, duucha woyite asalu giddora eꞌꞌeemmo? Woxe dancha gede amadeemmoha ikkoommota leellishoommohu hiittoonniiti?’
Ayyaanaamitte. Ati Yihowa Farciꞌraasinchootiro, ganyite Qullaawa Maxaafa xiinxallattotinna songote gambooshshe haꞌratto pirogiraame nooheha ikka hasiissannohe.
Qullaawu Maxaafi biddishsha: “Ayyaanaamittete coye goodhinori hagiirraammaho.”—Maatewoosi 5:3, Haaro Alame Tiro.
Ateneeto togo yite xaꞌmi: ‘Ayyaanaamitteꞌya kaajjishiꞌrate sharramanni noommo? Heeshshoꞌya giddo ayyaanaamittete coye balaxisiiseemmonso, wolu coyi ataawe ikkaera wodheemmo?’
Qara hedo: Adhatto meyatera malinoha, dancha minaanna ikka hasiissannohe. Hattoo mancho ikkate sharrantanni noottoha ikkiro, hattonni dancha galte ikkate sharrantanni noo meyata afiꞌrakki digattanno.