“Mooticha Yesuusa Ammani”—Yesuusa Ammana Calla Gatissanno?

Qullaawu Maxaafi mayyaanno?

Kiristaanu, Yesuusi mannu cubbira yee reyinota ammananno. (1 Pheexiroosi 3:18) Ikkollana, gatissannoti Yesuusi Gatisaanchoho yee ammana calla diꞌꞌikkitino. Agaaninte Yesuusi “Maganu Beetto” ikkinota affino; ikkirono insa gattannore ikkitukki baꞌannoreeti.—Luqaasi 4:41; Yihuda 6.

• Gatate maa assa hasiissannoe?

• “Gatote Huuccatto” yinanniti addinta gatote hasiissannote?

• “Gatote Huuccattora” kaimise maati?

Gatate maa assa hasiissannoe?

• Yesuusi heeshshosi cubbinkera yee kakkalinota ammana hasiissannohe. (Soqqamaasinete Looso 16:30, 31; 1 Yohaannisi 2:2) Hatto yaa, Yesuusi addinta heeꞌrinoha ikkinotanna Qullaawu Maxaafi isi daafira kulannori baalu halaale ikkinotano ammana hasiissannohe yaate.

• Qullaawu Maxaafi addinta mayyaannoro rosi. (2 Ximootewoosi 3:15) Qullaawu Maxaafi, soqqamaasinchu Phaawuloosinna Silaasi usuru mini agaraanchira togo yite kultinota xawisanno: “Atino minikki mannino gattinannina Mooticha Yesuusa ammani.” Hakkuyi gedensaanni insa isira “Yihowaa qaale” kultinosi. (Soqqamaasinete Looso 16:31, 32) Tennenni huwata dandiineemmonte gede, usuru mini agaraanchi Maganu Qaali yaannore seekke huwatikkinni Yesuusa addinta ammanino yaa didandiinanni. Isi Qullaawa Borro aana xintantinota gara ikkitino egenno afiꞌra hasiissannosi.—1 Ximootewoosi 2:3, 4.

• Maaro ei. (Soqqamaasinete Looso 3:19) Konni albaanni hedoottonna assoottohu bushu coyira godowinta gaabba woy aagintaawano hasiissannohe. Magano koffi assanno coye assa aguratto woyitenna ‘maaro eoottota leellishanno looso loosatto’ woyite, aagintaawakki wolu mannira xabbe leeltanno.—Soqqamaasinete Looso 26:20.

• Cuuami. (Maatewoosi 28:19) Yesuusi, rosaanosi ikkanno manni cuuamannota coyiꞌrino. Aleenni qummi assinihu usuru mini agaraanchino cuuamino. (Soqqamaasinete Looso 16:33) Hatteente gede, soqqamaasinchu Pheexiroosi lowo mannira Yesuusi daafira halaale rosiisi yannara, isi “coyiꞌrinore hagiidhe adhino manni [cuuamino].”—Soqqamaasinete Looso 2:40, 41.

• Yesuusi hajajo ayirrisi. (Ibiraawoota 5:9) Yesuusi ‘hajajinore baala agadhanno’ manni, isi rosaano ikkinota heeꞌranno heeshshonni leellishanno. (Maatewoosi 28:20) Kuni manni ‘macciishshaasine calla ikkikkinni qaalesi guutannoho.’—Yaiqoobi 1:22.

• Goofimarchu geeshsha kaajji. (Maarqoosi 13:13) Yesuusi rosaano gato afiꞌrate, ‘cincite agadha hasiissannonsa.’ (Ibiraawoota 10:36) Lawishshaho, soqqamaasinchu Phaawuloosi Yesuusi hajajo baalanta seekke agadhino; qoleno Kiristaana ikki barrinni kayise reyi barri geeshsha Maganoho ammaname kaajjino.—1 Qorontoosi 9:27.

“Gatote Huuccatto” yinanniti addinta gatote hasiissannote?

Mite ammaꞌno giddo, “Gatote Huuccatto” woy “Maarote Huuccatto” yinanni huuccatto no. Tenne huuccatto assidhannori, cubbaataamma ikkansanna Yesuusi cubbinsara reyinota ammantannota kulte huuccidhanno. Qoleno Yesuusi wodaninsa giddora eanno gede woy heeshshonsara karsamanno gede huuccidhanno. Ikkollana, Qullaawu Maxaafi giddo “Gatote Huuccatto” yinanniri dino; qoleno yinoonnita yinanni togoo huuccatto huucciꞌneemmo gede dikulloonninke.

Mitootu, “Maarote Huuccatto” assiꞌrino manchi hegere gato afiꞌrasi digattannote yitanno. Ikkollana, aye manchino huuccatto assiꞌrino daafira calla gato afiꞌranno yinanniri dino. Guuntete xeꞌne noonkere ikkinoommo daafira, soꞌro loosanke digattanno. (1 Yohaannisi 1:8) Yesuusi haꞌrunsaanosi cubbinsara maaro afiꞌrate woꞌmanka woyite huuccidhanno gede rosiisinohu iseraati. (Luqaasi 11:2, 4) Hakkiinni saeno, wonaatiro hegere gato afiꞌrannohu mitu Kiristaani Maganuwiinni xeertiꞌrino daafira woy isira badhe wodhino daafira hegerera heeꞌranno hexxo huꞌnino.—Ibiraawoota 6:4-6; 2 Pheexiroosi 2:20, 21.

“Gatote Huuccattora” kaimise maati?

“Maarote Huuccatto” kaima lainohunni xaggete egennaammira babbaxxitino lao noonsa. Mitootu, kuni balchoomi hanafinohu Pirotestaantete Haarishshi (Reformation) warooti yitanno. Qoleno “Maarote Huuccatto” assiꞌra hananfoonnihu 18kinna 19ki sanira ammaꞌnote millimillo yannaraati yitannorino no. Ikkihano ikkiro, togoo huuccatto Qullaawa Borro giddo dinoote; isinni Qullaawu Maxaafi rosi ledo sumuu diyitannote.