Yesuusi “Hajajama Rosino”

Yesuusi woꞌmanka woyite Yihowara hajajamanno. (Yoh. 8:29) Ikkina Qullaawu Maxaafi, “Iillinosi qarrinni hajajama rosino” yaannohu mayiraatiyya?—Ibi. 5:8.

Yesuusi uullate aana noo waro, iima heeꞌreenna iillinosikki qarri iillinosi. Isi Magano baxxannore ikkiturono guuntete xeꞌne noonsa anninna ama anga lophino. (Luq. 2:51) Iso busha ammaꞌnote massagaanonna gashshaano waaddinosi. (Mat. 26:59; Maq. 15:15) Qoleno “umosi heeshshi asse reyote geeshsha yaano qarru haqqi aana reyate geeshsha hajajamannoha ikkino” hattono qarrame reyino.—Fil. 2:8.

Kuri coyibba Yesuusi iima heeꞌre horo rosinokki garinni hajajama rosanno gede assitinosi. Konni garinni isi mararannonke Mootenna Kakkalaanote Biilo ikka dandaanno. (Ibi. 4:15; 5:9) Yesuusi iillinosi qarrinni hajajama rosihu gedensaanni, Yihowara albinni roore muxxe Beetto ikkino. Ninkeno qarra ikkannori heeꞌrirono woꞌmanka woyite Yihowara hajajammeemmoha ikkiro, isi aannonke looso baala loosanna isira albinni roore muxxe ikka dandiineemmo.—Yaq. 1:4.