“Yihowara Soqqama Hasiꞌroommo”

Hakkiinni aane mayi ikkinoro kulammoꞌnera albaanni balaxe woꞌma yanna soqqansho hanafoommohu hiittoonniitiro odeesseemmoꞌne.

Ilamoommohu 1942nni biifado Karibiyani giddichora Kuraasahooti. Anniꞌya ilaminohu Surinaami ikkirono, looso loosara Kuraasa haꞌrino. Ani ilamammora shiimu diri albaanni Kuraasaho cuuantinori Yihowa Farciꞌraasine giddo mittu annaꞌyaati.a Isi anenna roduuwaꞌya lamalate kiiro Qullaawa Maxaafa xiinxallisannonke; ninke kayi mito woyite xiinxalla dihasiꞌneemmo. Ani tonaa shoolu dirihu heeꞌreenna anninke geedhitino amasi towaatara ninke baalanka Surinaami haaꞌre haꞌrinke.

DANCHA JAALLA KAAꞌLITINOE

Surinaami noommo yannara Yihowara diinaggaabbe soqqantannori songote giddo noori wedellu roduuwiwa aana hanafoommo. Insa ane shiima diro bayidhannoe hattono woꞌma yanna suwisaano ikkite soqqantanno. Insa soqqanshonniwa afidhino woꞌnaalsha hasaabbanno woyite lowo geeshsha hagiirraamma ikkitinota huwatummo. Songote gambooshshi gedensaanni, aninna jaalaꞌya Qullaawu Maxaafi daafira hasaambeemmo; mito woyite gobba ofolline beeddahe woꞌmitino gordo laꞌnanni hasaambeemmo. Insa heeshshoꞌya giddo maa hasiꞌreemmoro huwateemmo gede kaaꞌlitinoe; hasattoꞌya Yihowara soqqamate. Hakko daafira 16 dirihu heeꞌre cuuamummo. Gedensoonni, 18 diriꞌyanni woꞌma yanna suwisaancho ikke soqqama hanafummo.

KAAꞌLANNO ROSO ROSOOMMO

Suwisaancho ikke soqqamanni lowore rosoommo; rosoommori woꞌma yanna soqqansho soqqamummo yanna baalantera lowo geeshsha kaaꞌlinoe. Lawishshaho umihunni, woloota qajeelsa hasiissannota ikkitinota rosoommo. Suwisaancho ikke soqqama hanafummo yannara, misiyoone ikke soqqamannohu Wileemi vaani Seejili lowo geeshsha kaaꞌlinoe.b Isi songote uyinannie looso ma garinni looseemmoro qajeelsinoe. Hatte yannara kuni qajeelshi lowo geeshsha hasiisannoeta dihuwatoommo. Aane noo diro baxxino suwisaancho ikke soqqameemmo gede shoommie; hakkiinni Surinaami lowo dubbi giddo noota mitte gaamo kaaꞌla hanafummo. Roduuwu hasiissannoe yannara qajeelsitinoe daafira lowo geeshsha galateemmonsa! Hatte yannanni kayise anino insa lawishsha harunse woloota qajeelsate yanna gaaꞌma hanafoommo.

Layinkihunni, bikkunnita kayinni qinaabbino heeshsho heeꞌra kaaꞌlitanno gara rosoommo. Aganu hanafi kiiro aninna ledoꞌya baxxino suwisaancho ikke soqqamanno rodii, aganu giddo hasiisannonkehu maalaamittete coyi mageeshshihoro hasaambeemmo. Hakkiinni lamunku giddo mittu seeda doogo haꞌre qaru kataminni hasiisannonkere hiꞌranno. Hakkiinni aganu kiiro hasiisannonkere hidhate uyinanninke woxe qorophine horoonsiꞌneemmo hattono hidhinoommo sagale aganu goofa geeshsha qoxxophineemmo. Hakko dubboho heeꞌne hasiisannonkere hoongummoro kaaꞌlankera dandaannohu mittu manchino dino. Wedellichu heeꞌre bikkunnita kayinni qinaabbino heeshsho heeꞌra dandiinanni gara rosaꞌya, heeshshoꞌya diro woꞌma Yihowa looso illachisheemmo gede kaaꞌlitinoe.

Sayikkihunni, mannaho uminsa qaalinni halaale rosiisa afidhino horo rosoommo. Anje heeꞌre Dachete afoo, Ingilizete afoo, Papimento afoo hattono Surinaami batinyu manni coyiꞌrannoha Siranantongo (Siranaani afoono yinanni) afoo coyiꞌreemmo. Kayinni lowo dubbi giddo heeꞌranno manni uminsa qaalinni sabbankeemmo woyite dancha gede macciishshannota huwatoommo. Hakko coyiꞌnanniha mito afoo lawishshaho, Saramakaani afoo coyiꞌra qarrissannoe; konne qaale coyiꞌnanni woyite mite huuro batinsanni mite kayinni ajinshanni. Ikkirono tennera sharramaꞌya digaabbissannote. Insa coyidhanno afoo dandoommo daafira lowo diro batinyu mannira Qullaawu Maxaafi halaale rosiisa dandoommo.

Hige saalsiisannoe coyi tuncu yiinoe yannano no. Lawishshaho mitte yannara Saramakaani afoo coyidhannota mitte Qullaawu Maxaafi rosaancho godowa dhiwinose daafira “woyyihe?” yee xaꞌma hasiꞌroommo. Kayinni xaꞌmoommohu ‘Godowii nootta?’ yeeti. Hatto yee xaꞌmoommo daafira ise saaltino. Togoo soꞌro loosoommoha ikkirono, woꞌmanka woyite mannaho uminsa qaalinni sabbakate sharrameemmo.

WOLE QOOSSONO AFIꞌROOMMO

Hakkiinni 1970nni woradu aliidi laꞌꞌaancho assine shoommie. Hakko diro lowo dubbi giddo heeꞌrannohu batinyu mannira, “Yihowa Farciꞌraasineta Qara Biiro Daaꞌꞌata” yitanno isilayide leellishoommo. Kuri manniwa marate mitu roduuwi ledo seeda yowolo giddine lagga tayinse haꞌnoommo. Yowolonkera jenereetere, nadaaje, nadaajetenni loosanno caabbichonna isilayide leellinshanni uduunnicho hogomboommo. Hakkira iillinummoti, massinoommo uduunne baala isilayide leellinshanniwa dunke haaꞌne haꞌnoommo. Roorenkanni, hakko heeꞌranno manni tenne isilayide lowo geeshsha baxinota qaageemmo. Mannu Yihowanna dirijjitesite uullaayidi kifile daafira rosanno gede kaaꞌloommohura lowo geeshsha hagiidhoommo. Yihowara soqqamate assoommohu aye coyino afiꞌroommohu ayyaanaamittete atootira tana nafa didaanno.

SASE QIQQISHONNI GANNOONNI SIIWO

Calliꞌya heeꞌra soqqanshoꞌyara lowo geeshsha kaaꞌlitinoeta huwatoommoha ikkirono, seenne adha hasiꞌroommo. Hakko daafira shota ikkitinokkita konni garita woꞌma yanna soqqansho ane ledo hagiirrunni soqqantanno minaama aaera Yihowa bade kule huucciꞌroommo. Mittu diri gedensaanni baxxitino suwisaancho ikkitinote Iteeli ledo adhamate hede ise ledo yanna sayisa hanafummo; ise umise horo agurte Yihowara soqqantanno rodooti. Iteeli anjesenni hanaffe soqqamaasincho Phaawuloosi lowo geeshsha naaddanno; hattono isi gede diinaggaabbe soqqama hasidhanno. Hakkiinni Wocawaaro 1971nni adhamme woradu looso loosa hananfummo.

Iteeli lophitinohu hakkeya dureeyye ikkitinokki maate giddo ikkino daafira, lowo dubbi giddo loonseemmoha woradu looso rosa qarra diꞌꞌikkitinose. Lawishshaho, xeertidhe noo songuwa towaantammora haꞌneemmo woyite lowo uduunne adhine dihaꞌneemmo. Uduunnenkeno ikko biso hayishshiꞌneemmohu lagahooti. Qoleno roduuwu uyitannonke sagale baala inteemmo; insa godowunni hadhanno saadanna addi addi qulxuꞌme uyitannonke hattono dubbunni ugaaxxe woy lagu giddonni woshshaadde abbitinore baala inteemmo. Sayine hoogummoro muuzete hogira wodhine inteemmo. Shukka woy maanka hoongummoro angatenni inteemmo. Iteelinna ani Yihowara soqqamate yine uminke horo aguranke sase qiqqishonni gannoonni siiwo gede ikkineemmo gede kaaꞌlitinonke. (Ros. 4:12) Konni garinni soqqamme afiꞌnoommo woꞌnaalsha aye coyinnino soorra dihasiꞌneemmo!

Hanafote kulummoꞌne coyi tuncu yiinoehu dubbu giddo noohu mittu bayichinni hingannaati. Iima haꞌranni noo lagi widoonni hinge saꞌnanna yowolo wayi giddora eꞌinoha ikkirono bayichonkonni fultino. Maganu assa gede, wayi giddo itammannikki gede kaaꞌlanno jakkeetta uddiꞌne heeꞌnoommo daafira yowolote aaninni diumboommo. Kayinni yowolote wayi woꞌmi. Dissitete wodhinoommo sagale lagu giddo dunnummo; hakkiinni hatte dissitenni yowolote giddo woꞌmino waa hinkiille dunnummo.

Sagalenke gudinse dunnoommo daafira lagu giddo haꞌnanni qulxuꞌme woshshaaxxa hananfummo. Kayinni mitte qulxuꞌmeno diamaxxinoommo. Hakko daafira Yihowa huucciꞌnummo; hattono barraho hasiissanno sagale aannonke gede kuꞌlinummo. Huuccatto assiꞌnummohu gedensaanni mittu rodii marawe baaraho tuge ninke ontunku inte duumbe galate ikkitanno geeshshi qulxuꞌmicho amadi.

MINAANNA, ANNA HATTONO WORADU ALIIDI LAꞌꞌAANCHO

Woradu looso onte diro loonsummohu gedensaanni, Iteelinna ani hendoommokki atoote yaano annanna ama ikkate qoosso afiꞌnoommo. Tenne macciishshe hagiidhoommoha ikkirono, albillitte hiittoo heeshsho heeꞌneemmoro kayi diafoommo. Iteelinna ani dandiinummo deerrinni woꞌma yanna soqqansho soqqammanni heeꞌra lowo geeshsha hasiꞌnoommo. Hakkiinni 1976nni qaaqqinke Itineeli ilami. Lamu dirinna daratu gedensaanni Jiovaani ilami.

Hakka woyite Surinaami kaaꞌlo hasiissanno daafira, sinu biiro qaaqquullenke lossiꞌnanni heeꞌnenni woradu looso loonseemmo gede kultunke. Qaaqquullinke shiimmaaddu noo yannara boode songuwa noo worada towaanteemmo gede kullinke. Hakko daafira aganu giddo boode lamala woradu looso looseemmo; gattino lamala kayinni gaammoonninke songo giddo suwisaancho ikke soqqameemmo. Qooxeessinkera noo songuwa towaateemmo woyite Iteelinna qaaqquullinke ledoꞌya hadhanno. Lowo dubbira noo songuwa towaateemmo woyitenna hakko woradu gambooshshi heeꞌranno woyite kayinni calliꞌya haꞌreemmo.

Uyinoonnie looso baala danchu garinni loosate pirogiraame fushshiꞌra hasiissinoe. Lamalate kiiro maatete magansiꞌra assiꞌneemmo. Dubbu giddo noo songuwa towaatammora haꞌreemmo woyite Iteeli qaaqquullinke ledo maatete magansiꞌra assidhanno. Ikkirono, dandiinummo deerrinni duucha woyite mito coye mitteenni assate woꞌnaalleemmo. Iteelinna ani oosonke ledo ganyine boohaarreemmo; geeme godoꞌlineemmo hattono qooxeessinkera nooha mito baxisanno bayicho daaꞌꞌanteemmo. Duucha woyite songote looso loosanni hashshiishiꞌreemmo. Qoleno Iteeli Lawishsha 31:15 kulloonnite maanaame minaama gedeeta ikkitino daafira gutte kaꞌe sagale wortanno; hakkiinni oosonke rosu minira hadhara albaanni mitteenni shooꞌmine barru qummeeshsha nabbambeemmo. Yihowa uyinoe looso looseemmo gede kaaꞌlitannoetanna umise horo agurtanno minaama afiꞌroommo daafira lowo geeshsha tashshi yiinoe!

Annanna ama ikkinoommo daafira, oosonke Yihowanna soqqansho baxxanno gede kaaꞌlate sharrammoommo. Oosonke ninke hasiꞌnoommo daafira ikkikkinni, uminsa baxxe woꞌma yanna soqqansho soqqantara hasiꞌnoommo. Duucha woyite insara woꞌma yanna soqqansho hagiirsiissanno gara kulleemmonsa. Konni garinni soqqama mito woyite qarra ikkitannota anfoommoha ikkirono, Yihowa kaaꞌlinonke garanna maatenke maassiꞌrino gara luphi assine kulleemmonsa. Qoleno oosonke Yihowara soqqama balaxisiissanno roduuwi ledo jaalla ikkitanno gede kaaꞌlinoommonsa.

Yihowa oosonke lossiꞌnanna hasiisannonkere oye kaaꞌlinonke. Hige anino maatenke kaaꞌlate danduummore baalare assoommo. Seenne adhummokki lowo dubbi giddo baxxino suwisaancho ikke soqqamummo yannara hasiisannoere hidhate woxe qoxxopha hasiissannoeta rosoommo. Mito woyite kayi dandiinummore baala assinoommoha ikkirono hasiisannonkere afiꞌra qarra ikkitinonke. Togoo yannara Yihowa kaaꞌlinonketa huwatoommo. Lawishshaho 1986nni 1992 geeshsha Surinaami dagate gaance kaꞌino. Hatte yannara hasiisannore afiꞌra lowo geeshsha qarraho. Ikkirono Yihowa hasiisannonkere uyinonke.—Mat. 6:32.

ALBITA HEDEEMMO WOYITE

Heeshshonke diro baala Yihowa towaatinonke hattono lowo hagiirrenna harshammo afiꞌnoommo. Oosonkeno ninkera lowo atoote ikkitinonke; hattono insa Yihowara soqqantanno gede assine lossiꞌra ninkera lowo ayirrinyeeti. Qoleno insa woꞌma yanna soqqansho doodhitino daafira lowo geeshsha tashshi yiinonke. Itineelinna Jeovaani Maganu Mangiste Sawaakooti Rosi Mine rossino; hattono insa xa minaamuwinsa ledo Surinaami noote sinu biirora soqqantanni no.

Iteelinna ani xa geedhinoommo; ikkirono xaano baxxitino suwisaano ikkine Yihowara diinaggaambe soqqammanni heeꞌnoommo. Isinni, loosu batiꞌrannoe daafira xaano waa daankanni gara rosate yanna diafiꞌroommo! Ikkirono gaabbeemmori dino. Albita hedeemmo woyite, anjeꞌyanni hanafe woꞌma yanna soqqansho doodhaꞌya wole baalanka doorsha roortannota ikkitinota huwatoommo.