Hagiidhitinanni ‘Gede Assannoꞌneri’ Maati?
1. Mittu mittunku agani goofimarchira hagiidhineemmo gede assannonkeri maati?
1 Mittu mittunku agani goofimarchira qanchu soqqansho rippoorte uyineemmo wote, mitto mittonke ‘hagiidhineemmo gede assannonkeri maati’? (Gal. 6:4) Aganunni 130 saate soqqamme rippoorte uyineemmori baxxitino suwisaano ikkino, woyi aganunni 15 daqiiqa soqqamate faqqandoonninkeri baalinke, Yihowara woꞌma lubbonkenni soqqammanni heeꞌnoommo daafira hagiidha hasiissannonke.—Far. 100:2.
2. Yihowara diinaggaambe soqqama hasiissannonkehu mayiraati?
2 Yihowa kalqete alamera Aliidi Mooticha ikkinohura, noonkeri giddo umo afiꞌrinoha isira aa gabbaꞌannote. (Mil. 1:6) Fajjosi wonshate heeshshonke sayinse uyinoommohu iso banxeemmohuraati. Konnira, afiꞌnoommo coyi giddo “bayira,” yaanno woxenke, dandoonke, hattono wolqanke Yihowara soqqamate danchu garinni horoonsiꞌnanni heeꞌnoommoha ikkiro, mittu mittunku barri woyi agani goofimarchira hagiidhineemmo gede assannonke coyi no. (Law. 3:9) Kayinnilla tiiꞌꞌinke woyyeessiꞌra hasiissannonke coyi noota kulannonkeha ikkiro, roore soqqamate maa assa woyyitannonkero assaawa hasiissannonke.—Ro. 2:15.
3. Ninkeneeto wolootu ledo keena digaraho yineemmohu mayiraati?
3 “Isonooto Wolootu Ledo Keenikkinni”: Ninkeneeto wolootu ledo woyi albi jawaantenke xaate ledo keena digaraho. Heeꞌneemmo gari soorramanno. Dandoonkeno babbaxxitinote. Ninkeneeto wolootu woyi uminke ledo keena roore wote heewote woyi hexxo mudhate widira massitanno. (Gal. 5:26; 6:4) Yesuusi manna diheewisiisino. Hatteentenni, mittu manchi wolqasi deerrinni assannorira galatanno.—Mar. 14:6-9.
4. Yesuusi coyiꞌrinohu taalaantete lawishshinni maricho ronseemmo?
4 Yesuusi coyiꞌrinohu taalaantete lawishshi, loosaasinete taalaante uyinoonninsahu “dandoonsa garinni” ikkinota kulanno. (Maat. 25:15) Mootichinsa haꞌrinowiinni hige mageeshsha tirfissinoro xaꞌminsa wote, dandoonsanna wolqansa deerrinni diinaggaabbe loossinore galatinonsa, hattono mootichinsa hagiirriwa eessinonsa. (Maat. 25:21, 23) Ninkeno insa gede Maganu Mangiste duduwate looso diinaggaambe loonseemmoha ikkiro, Yihowa hagiirsiinseemmo; tini qolte ninkerano hagiirre abbitannonke!