Yihowa Laꞌꞌannonkehu Kaaꞌlankera Yee Ikkinota Huwatootto?

1, 2. Yihowa ninke laꞌꞌanno gari makeenna illaallisanno kaameerinni baxxannohu hiittoonniiti?

DUUCHA gobbara mangiste doogote aana makeenna illaallisatenna iillitanno dano foto kayise haarate kaaꞌlanno kaameera wortanno. Mittu oofaanchi makeenunni manna gane kae xooqiha ikkiro, gashshaano kaameeru kayisino foto horoonsidhe hakkoye oofaancho harunsite amadde qaxxaassanno. Togoo kaameeri base baalate noo daafira jaddo loose kae maaxame gata mannaho albinni roore kabbaade ikkitanni hadhino.

² Ikkina, mangistubba kaameera horoonsidhanno gari baxillaanchu Anninke Yihowa daafira maa qaagiissannonke? Qullaawu Maxaafi Yihowa “ille baalankawa” noota kulanno. (Law. 15:3) Hatto yaa kayinni isi soꞌneemmota agare ille wore laꞌꞌanni noonke yaate? Isi laꞌꞌannonkehu soꞌneemmo wote qaxxaasankera yeeti? (Erm. 16:17; Ibi. 4:13) Deeꞌni! Yihowa ninke laꞌꞌannohu qaru korkaati, ninke mitto mittonka baxannonke daafiraatinna gawajjotenni gantammora hasiꞌranno daafiraati.—1 Phe. 3:12.

3. Maganu baxillunni laꞌꞌannonkehu hiittee onte doogganniiti?

³ Maganu laꞌꞌannonkehu baxannonke daafira ikkinota huwanteemmo gede kaaꞌlannonkeri maati? Hanni isi baxillunni laꞌꞌannonketa leellishshanno doogga laꞌno. Yihowa (1) bunshete widira hinge dooꞌneemmo wote qorophineemmo gede kulannonke, (2) bunshe assinummoro seejjannonke, (3) Qaalisi giddo noohu xintu seerinni marraꞌꞌannonke, (4) addi addi fatani iillannonke wote kaaꞌlannonke, hattono (5) danchare assinummoro kiisannonke.

YIHOWA QOROPHINEEMMO GEDE KULANNONKE

4. Yihowa Qaaeeli cubbu ‘xullichoho duganni noosita’ kule qorophi yiinohu mayiraati?

⁴ Umo hanni, Maganu busha dooꞌꞌo giddonke lophitanni noota laꞌꞌanno wote qorophineemmo gede kulannonke gara laꞌno. (1 Zee. 28:9) Maganu konni garinni baxillunni laꞌꞌannonketa wodanchate, Qaaeeli xagge laꞌneemmo. Qaaeeli Maganu hagiidhinosikkita afiti “lowo geeshsha hanqi.” (Kal. 4:3-7) Yihowa Qaaeeli ‘danchare assate higanno’ gede seekke amaalinosi. Maahoyye yaa giwiro kayinni cubbu ‘xullichoho duganni noosita’ afe qorophanno gede kulinosi. Maganu iso, ‘Ati kayinni qeeꞌli’ yiinosi. Yihowa Qaaeeli uyinoonnisi qorowishsha macciishshe ‘iso hagiirsiisannoha ikkara’ hasiꞌrino. Konni garinni Maganu ledo noosihu danchu fiixoomi baꞌꞌannosikki gede assiꞌra dandaanno.

5. Yihowa qorophineemmo gede kulannonkehu hiittee doogganniiti?

⁵ Yihowa ninkerano qorophineemmo gede kulannonke? Illesi wodaninke giddo noore laꞌanno; giddiidinke hedonna mittore assineemmo gede kakkayisinonkere isi illenni maaxa didandiineemmo. Baxillaanchu Anninke xalallete doogo haꞌnammora hasiꞌranno; ikkirono doogonke woyyeessiꞌne raga hingammora digiddeessannonke. Gara ikkitinokki doogo haꞌneemmo wote, Qaalisi Qullaawu Maxaafi widoonni qorophineemmo gede kulannonke. Tenne assannohu ma garinniiti? Qullaawa Maxaafa barru barrunku nabbambeemmo wote, busha dooꞌꞌonna gariweelo hedo gargadhate kaaꞌlannonkere afiꞌneemmo. Hakkiinni saeno, Kiristaanu borronke mitiimma ikkitinonke laanfere xawissaranna qeeꞌla dandiineemmo gara kultankera dandiitanno. Qoleno songote gambooshshiwa ninke baalunku hasiissanno yannara shiqqanno amaale afiꞌneemmo!

6, 7. (a) Lowo miliyoone ikkanno manna hende qixxeessinoonni rosi Maganu mitti mittinkera assaawannota leellishannohu hiittoonniiti? (b) Yihowa aannonke qorowishshi xaqqamannonke gede maa assa hasiissannonke?

⁶ Addaho Yihowa tenne doogganni qorophe yaasi, mitto mittonka baxannonketa leellishshannote. Qullaawu Maxaafi borreessaminku lowo diri saino, borronke qixxaabbannohu lowo miliyoone ikkanno manniraati, qoleno gambooshshinkewa uyinanni amaale songo woꞌma hende uyinannite. Ikkirono, Yihowa tenne doogga horoonsiꞌre Qaalisi giddonni shiqqanno amaale atera yine qixxeessinoonnihu gede assite hedatto gede assanno; konni garinni, gara ikkinore assatto gede kaaꞌlannohe. Tini Yihowa gilletenni baxannohetanna atera assaawannota leellishshannote.

⁷ Maganu aannonke qorowishshi xaqqamannonke gede, umihunni Maganu ninkera addinta assaawannota huwata hasiissannonke. Hakkiinnino, Qaalisira hajajamme Magano hagiirsiissannokki hedo luqqinse hooꞌla hasiissannonke. (Isayyaasi 55:7 nabbawi.a) Uyinanninke qorowishsha harunsineemmoha ikkiro, lowo dadillinni ganteemmo. Kayinni miteekkite busha dooꞌꞌo qeeltunkella? Baxillaanchu Anninke hakkawote kaaꞌlannonkehu ma garinniiti?

BAXILLAANCHU ANNINKE SEEJJANNONKE

8, 9. Yihowa soqqamaanosi widoonni aannonke amaale isi ninkera lowo geeshsha assaawannota leellishshannohu hiittoonniiti? Lawishshunni kuli.

⁸ Yihowa seejjannonke wote, isi ninkera assaawannota huwanteemmo. (Ibiraawuyaani 12:5, 6 nabbawi.b) Amaale woy seejjo uyinanninke wote tashshi yaannonkekkiti egennantinote. (Ibi. 12:11) Ikkirono, amaale aannonke manchi mageeshshire assannoro hedi. Isi Yihowa ledo noonke fiixooma daafara dandaannore maa assinoommoro buuxanno, simmeetenkera assaawanno, hattono doogonke biddi assiꞌne Magano hagiirsiisa dandiineemmo gara Qullaawu Maxaafinni ninkera leellishate yanna gaame qixxaawanno. Tenne amaale Buicho ikkinohu Yihowa isinni atera hakkiinni roore assaawannoti egennantinote.

⁹ Hanni mannu aannonke amaale Yihowa ninkera assaawannota leellishshanno gara laꞌno. Mittu rodii halaale macciishshara albaanni teeda baꞌino misilla ganye laꞌꞌanno; kayinni tenne gadesi ganaanni qeeꞌlino. Ikkollana togoo misilla laꞌꞌate yorto giddosinni dibaꞌino, hattono giddosi buluulo gaꞌnino kashilchi gede ikkite no. Haaro mobayile hidhiti galagale busha gadesira higi. (Yaq. 1:14, 15) Mobayilesinni teeda baꞌino misilla leellishshanno webisayite fane laꞌꞌa jammari. Mitto barra mittu cimeessi ledo silketenni farcidhanni heedheenna, cimeessu teesso laꞌꞌara isi silke haari. Cimeessu silke adhe horoonsiꞌra jammarita, teeda baꞌino misilla leellishshanno webisayite faꞌnama jammartu. Tini ayyaanaamittete adagi giddo noo rodiinkera dancha faro fantino. Konni rodiira hasiissannosi amaale uyinisi; isino uyinoonnisi seejjo adhe yannate gedensaanni busha yortosi qeeꞌla dandiino. Iimi Anninke Yihowa maaxamino cubbonke nafa lae roore bushino deerra marrummokki seejjannonke daafira lowonta galanteemmosi!

QULLAAWU MAXAAFIHA XINTU SEERA HARUNSA LOWORE KAAꞌLITANNONKE

10, 11. (a) Maganu biddishsha afiꞌrate ma assa hasiissannohe? (b) Mitte maate Yihowa biddishsha harunsa hayyo ikkitinota heeshshonsanni laꞌinohu hiittoonniiti?

¹⁰ Faarsaanchu Yihowara, “Amaalekkinni marraꞌꞌattoe” yee faarsino. (Far. 73:24) Mittu coyira biddishshu hasiisannonke wote Yihowa hakkoye coye ma garinni laꞌꞌannoro afate Qaalesi xiinxallineemmoha ikkiro isi amaale ‘anfeemmo.’ Qullaawu Maxaafiha xintu seera harunsanke, ayyaanaamittete calla xaqqantannonkeha ikkikkinni maalaamittete hasiisannonkerirano kaaꞌlitannonke.—Law. 3:6.

¹¹ Filippiinsi gobbara woxe kaffalanni manni baatto loosiꞌre galannohu mittu rodiira iillinori, Yihowa mite soqqamaanosi marraino gara leellishanno lawishshaati. Isino minaamasino maatensa lowota ikkiturono woꞌma yanna suwisaano ikke soqqamanno. Mitto barra baattote anni hedeweelcho, baattosi agurte hadhara kulinsata lowo geeshsha massu. Baattote anni tenne assinohu mayiraati? Ammanantinore diꞌꞌikkitino yine beebba suꞌmansa hunnoonni daafiraati. Kuni rodii maatesi adhe hiikka higannoro yaadinoha ikkirono, Magano addaxxe togo yiino: “Yihowa qixxeessanno. Baxi coyino tuncu yiinkero, isi ayewoteno hasiisannonkere aannonke.” Roduu togo addaxxasi mulla digattino. Shiimu barri gedensaanni, baattote anni fulte hadhannokki gede kulinsata yaaddo gattu. Baattote anni hedosi soorrinohu mayiraati? Tini maate beebba suꞌmansa hunnoonniha ikkirono, Qullaawu Maxaafiha xintu seera harunsite, hakkawoteno woloota ayirrisanna mannu ledo salaametenni heeꞌransa diagurtino. Baattote annira tini lowo geeshsha dhagge ikkitinosi daafira, hakko heedhara fajjinonsa; hakkiinnino sae loosidhanno baatto lede uyinonsa. (1 Phe. 2:12) Ee, Yihowa mitiinsannonke coye dandiineemmo gede Qaalisi widoonni marraꞌꞌannonke.

FATANU YANNARA KAAJJINEEMMO GEDE KAAꞌLANNONKE JAALA

12, 13. Mitu roduuwira Maganu addinta insara assaawannota ammana qarrissannonsa gede assannori maa ikkara dandaanno?

¹² Mito wote kayinni fatana ikkinonke coyi rahe hoꞌla hoogara dandaanno. Bayicho assiꞌrino xibbi noonkeha, mini manni seeda yanna taqaawwamanni qarrisannonkeha woy dartu xaa xaa iillannonkeha ikkara dandaanno. Qoleno miteekke songote giddo mittu rodii ledo coyi lowo geeshsha kawa kaꞌaa hige afoo hunankera dandaanno.

¹³ Lawishshaho, mittu manchi coyiꞌrinori lowo geeshsha koffi assahera dandaanno. Xissiisidhe, ‘Maganu dirijjite giddo togoori hiitto ikke ikkanno?’ yaattora dandaatto. Kayinni kuni rodii songote giddo soqqanshote qoosso afiꞌrara dandaanno; qoleno wolu roduuwi iso kaffi assite laꞌanno. Tenne laꞌꞌatto wote, ‘Kuni hiittoo coyeeti? Maaho Yihowa dilaꞌꞌanno? Sammilla yaanno yaate?’ yaattoha ikkanno.—Far. 13:1, 2; Imb. 1:2, 3.

14. Mannu ledo coyi kawa kaꞌaa higannonke wote Maganu mereero eannokki korkaati giddo mittu hiikkoye ikkara dandaanno?

¹⁴ Yihowa togoori iillanna sammi yaannohu ikkadu korkaati heeꞌreenna ikkara dandaanno. Lawishshaho, ati koffi assinoe yaatto rodoo roore bushaho yaattora dandaatto; Maganu kayinni konne coye wolu garinni laꞌꞌannoha ikkara dandaanno. Maganu lao garinni, ati lowo geeshsha sodhe noottoha ikkara dandaanno. Isinni ati xissiisinoe yoottohu roduu coyiꞌrino coyi, miteekke atera lowo geeshsha hasiissino amaale ikkara dandaanno. Aliidi Bisi miila ikke soqqaminohu Roduu Karli Kileeni heeshshosi xagge kulanni, Roduu Raazerifoordi xaaddote seejjinosi yanna noota coyiꞌrino. Roduu Raazerifoordi wole wote faasiiqe, konne rodoo keere haari. Roduu Kileeni kayinni uyinoonnisi seejjonni kainohunni muffi yee gari geeshsha keere haara giwi. Roduu Raazerifoordi kuni rodii koffi yee noota huwatiti, ‘Daawuloosi woshshaado giddora eattokki gede qorophi’ yiisi. Roduu Kileeni ganaanni hige togo yee borreessino: “Mittu rodiira koffi yineemmo wote, hakko iso roduu halaafinatesi ikkeenna coyiꞌrinorinni xissiisiꞌneemmo yannara, ninkeneeto Daawuloosi woshshaadora sayinse uyinanni heeꞌnoommo.”c

15. Fatanu iilleennanke Yihowa kaaꞌlo agadhineemmo wote, cincine heeꞌrate kaaꞌlitannonketi maa huwatankeeti?

¹⁵ Fatana ikkinonke coyi gawalo nookkiha lawannonke wote, cinca hoongeemmoha ikkanno. Dandee heeꞌrate kaaꞌlannonkeri maati? Lawishshaho, baaburu mine gide daahisiisiꞌrattora marte salfe amadde nootto gede assite hedi. Ate tari iilleenna daahisiisidhe haꞌratto geeshsha mageeshshi yanna saꞌannoro diafootto. Cincite agadha hoogge wolu baaburiwa haꞌrattoha ikkiro, umitenni roortino salfe noowa marattora dandaatto. Hakko daafira gidekki daahisiisidhe haꞌrate roore yanna keeshshattoha ikkara dandaanno. Kayinni cincite umi mine keeshshittoro, layinki mine keeshshatto geeshsha agadhittokki mulenni daahisiisidhe haꞌrattora dandaatto. Hatteente gede, Maganu Qaaliha xintu seera agurittokki harunsattoha ikkiro kaajjite uurratto kaaꞌlo afiꞌratto.

16. Yihowa qarru iillannanke sammi yaannohu wolu korkaati maa ikkara dandaanno?

¹⁶ Yihowa fatanu iillannanke sammi yaannohu hasiisannonke qajeelsha afiꞌnammora hasiꞌre ikkara dandaanno. (1 Pheexiroosi 5:10 nabbawi.d) Hatto yaa kayinni fatanu iillannonke gede assannohu Maganoho yaa diꞌꞌikkino. (Yaq. 1:13) Roore qarra naqannonkehu ‘baarigaaranke Daawuloosiiti.’ Kayinni Maganu iillannonke qarra ayyaanaamittetenni lophineemmo gede kaaꞌlate horoonsiꞌrara dandaanno. Isi iillannonke qarra laꞌꞌanno; qoleno ‘ninke daafira assaawannohura’ iillinonke fatani “boode yanna” calla keeshshanno gede assanno. Qarru iillannohe yannara Yihowa ate daafira assaawannotanna fulatto furcho qixxeessannoheta huluullantooti.—2 Qor. 4:7-9.

YIHOWA KIISANNOHE

17. Yihowa ayeoo wodana laꞌꞌanno? Mayira?

¹⁷ Yihowa ninke laꞌꞌannohu jeefote korkaati lowonta jawaachishannoho. Isi masaalaanchu Anaani widoonni Nugusa Asa togo yiino: “Woꞌmu wodaninsanni iso addaxxitannore jawaachishara, Yihowa ille uulla woꞌmate aana kawanna kaꞌa laꞌanno.” (2 Zee. 16:9) Asa woꞌmu wodanisinni Magano diaddaxxino; ati kayinni gara ikkinore assakki agurattokkiha ikkiro Yihowa ‘jawaante’ aannohe.

18. Assattore naadannohu nookkihu gede ikke macciishshamihero, Yihowa daafira maa qaaga hasiissannohe? (Umi misile lai.)

¹⁸ Maganu ‘iso hagiirsiinseemmo gede’ ‘dancha coye hasiꞌnammora,’ ‘dancha coye banxammora,’ hattono ‘dancha coye assinammora’ hasiꞌranno. (Amo. 5:14, 15; 1 Phe. 3:11, 12) Yihowa keeraanchimmate doogo hadhannore laꞌꞌanno, hattono maassiꞌrannonsa. (Far. 34:15) Lawishshaho Ibiraawe (woy Isiraeelete) meento ilshiishannori Sippaaranna Fuha yinanni meenti assinore laꞌno. Isiraeele Gibitsete gobbara borojje ikkite noo yannara, Feriooni kuri meenti Ibiraawete meenti ilannoha labballo qaaqquulle shaanno gede hajajino; insa kayinni Feriooni agure Magano waajjino. Insa Maganuwiinni afiꞌrino tiiꞌꞌi kore qaaqquulle shaannokki gede assinonsa. Yihowa gedensaanni Sippaaranna Fuha uminsa maate heedhannonsa gede asse maassiꞌrinonsa. (Wol. 1:15-17, 20, 21) Insa assinohu danchu coyi base baalate noote Yihowa illenni digoꞌlino. Mito wote, assineemmoha dancha coye laꞌꞌannohu nookkihu gede assine hendammora dandiineemmo. Yihowa kayinni laꞌꞌanno. Isi assineemmoha mitto mittonka dancha coye lae kiisannonke.—Mat. 6:4, 6; 1 Xim. 5:25; Ibi. 6:10.

19. Mitte rodoo Yihowa assineemmoha dancha coye laikki gatannokkita huwattinohu hiittoonniiti?

¹⁹ Ostiriyaho heedhannoti mitte Hangarii gobba rodoo Maganu diinaggaabbe isira assitannore laꞌꞌannota huwattino. Tenne rodoora Hangarii gobba afoo coyidhannota mitte mancho marte hasaawissara teessose kulloonnise. Ise mulenni hattee mancho hasaawissara martu; martanno wote kayinni mine noohu dino. Hakkuyi gedensaanni hatte qae duucha higge martino. Mito wote mannu mine nooha lawanno; kayinni yee yaannohu dino. Ise borro, dabdaabbe, teessosenna wole togoore worte hadhanno. Dironna darate ikkitanno yanna hakkira martanni keeshshitu gedensaanni, mitto barra mitte faasiiqa mancho mine fantu! Hatti mancho keere haadhe kaꞌe togo yituse: “Minira ei. Abbootta borro baalanta nabbawe ate agare noomma.” Tini mancho albinku xiwante xagisidhanni noo daafira mannu ledo xaada dihasidhino. Hakkiinni rodoote ledo Qullaawa Maxaafa xiinxalla jammartu. Ee, Yihowa tini rodoo ceeꞌmitukki assitinorira kiisinose!

20. Yihowa ate gilletenni laꞌꞌannoheta hedatto wote mayi macciishshamannohe?

²⁰ Yihowa assitanni noottoha mitto mittonka dancha coye laꞌꞌanno; qoleno kiisannohe. Maganu ille atewa higge noota hedatto wote, iso doogote worreenna jaddo loossinore foto kayisanno kaameeri gede assite hedooti. Hatteentenni, ninkera assaawannonna kaaꞌlankera hasiꞌranno Maganonke ikkino daafira isiwa ruxxi yiittokki shiqi!