Hexxonke Gambissinota Leellishanno Qarra
“Goofimarchu barra qarrissanno yanna daggannota afi.”—2 XIMOOTEWOOSI 3:1.
KONNI woroonni kulloonniha dadillisanno coye macciishshite woy illekkinni laꞌe egennootto?
● Dhibbu uwe lowo manna xoqolino.
● Lowo xibbe ikkanno manni hudetenni goofino.
● Baatto huxidhe lowo kume manna guddino; hattono batinyu manni miniweelo gatanno gede assitino.
Aante noo birxichuwara, togoohu dadillisanno coyi ikkanni noota leellishshannota mite taje laꞌneemmo. Qoleno Qullaawu Maxaafi “goofimarchu barra” togoo coyi ikkanno yee masaalinota huwanteemmo.
Ikkollana, tenne birxichuwa qixxeessinoonnihu qarru batiꞌrino alamera heeꞌnoommota ammansiisate diꞌꞌikkino. Qarru noota atinni afoottoti egennantinote. Tenne birxichuwa qixxeessinoonnihu hexxo noota kulateeti. Tini borro, tini lee masaalo woꞌmase ‘goofimarchu barri’ muli yannara goofannota leellishshannota xawissanno. Qoleno mitu manni tenne taje ammana giwe coyiꞌrannore laꞌneemmo; hattono woyyitino yanna daggara kaꞌe no yineemmo gede assannonkeri maatiro ronseemmo.