Wocawaaro

Ayyaanaamittetenni gikki yaate calla ikkikkinni gikki yee heeꞌrateno sharrama hasiissannonke. Hatto assate quwa saꞌne umonke addaxxa qoropha hasiissannonke. (1 Qor. 10:12) Ayyaanaamittetenni lophinanni heeꞌnoommoro buuxate ninkeneeto ‘fonqolle layiꞌra’ hasiissannonke. Soqqamaasinchu Phaawuloosi Qolaasiyaasi heeꞌranno Kiristaanirano, ayyaanaamittetenni gikki yee heeꞌra hasiissannota luphi asse kulino. Insa ayyaanaamittetenni gikki yitino Kiristaana ikkiturono, Phaawuloosi alamete hedo xaxxabbe amaddannonsakki gede qoropha hasiissannonsata kulinonsa. (Qol. 2:6-10) Qoleno Qolaasiyaasi songora noo Kiristaana seekke afinohu Ephafira, ‘insa kaajjite uurritanno gede’ woy ayyaanaamittetenni gikki yitanno gede woꞌmanka woyite huuccatto assanno. (Qol. 4:12) Tennenni maa ronseemmo? Phaawuloosinna Ephafira ayyaanaamittetenni gikki yee heeꞌrate ninke uminkenni sharramanna Maganu kaaꞌlo hasiissannonketa huwattino. Insa Qolaasiyaasi heeꞌranno Kiristaani qarra ikkannori heeꞌrirono ayyaanaamittetenni gikki yite heedhara hasidhino. w24.04 6-7 guf. 16-17

Yihowa gara ikkitino doogonni waajjineemmoha ikkiro, iso lowo geeshsha banxeemmo daafira iso dadillisannoha aye coyeno horo diassineemmo. Konnira Yihowa hagiirsiisa dandiineemmo gede, garanna gara ikkinokkire hattono halaalunna kaphu mereero noo badooshshe afate quqquxammeemmo. (Law. 2:3-6; Ibi. 5:14) Maganunni roorsine manna waajjineemmoha ikkiro, halaaluwiinni xeertiꞌnammora dandiineemmo. Hanni Yihowa Israeelete aara qaale eino gobba qottara hadhinori 12 Israeelete roorrooti lawishsha laꞌno. Tonne qotaano Kanaꞌꞌaanoota waajjansa Yihowara noonsa baxille roortara wodhitino. Insa Israeelete mannira, “Ninkenni roore wolqaataamma ikkitino daafira qeelle dianfeemmo” yite kultino. (Kir. 13:27-31) Mannu illenni laꞌniro Kanaꞌꞌaanootu wolqaataamma ikkitinohura, tini garankolla. Kayinni Israeele diinnansa qeela didandiitanno yee coyiꞌra Yihowa heda hoogate. w24.07 9 guf. 5-6

Yihowa mannaho yoo yaanno woyite woꞌmanka woyite gara ikkinore assannota addaxxineemmo gede assannonkeri no? Ee no! Abirihaami seekke huwatinonte gede, Yihowa guutaho, hayyichaho, hattono maarannoho ‘gobba baalate gashshaanchooti.’ Qoleno isi Beettosi qajeelse yoo yaanno gede shoomino. (Yoh. 5:22) Yihowanna Yesuusi mittu manchi wodanita afa dandiitanno. (Mat. 9:4) Hakko daafira insa yoo yitanno woyite, aye woyiteno ‘gara ikkinore assitanno’! Konnira Yihowa gara ikkinore assannota addaxxino. Yoo yaate silxaane noosihu Yihowaati ikkinnina ninke ikkinoommokkita huwantoommo! (Isa. 55:8, 9) Konni daafira mittoreno huluullammummokki yoo baala isiranna Beettisira agura dandiineemmo; Beettisi Annisi lawishsha guutu garinni harunsanno daafira taashshannohonna maaranno Mooteeti.—Isa. 11:3, 4. w24.05 7 guf. 18-19

Yesuusi umo Naatinaeeli ledo xaadi woyite coyiꞌrinorinni dancha giddore ikka hasiissannota ronseemmo. Filiphoosi jaalasi Naatinaeeli Yesuusinni xaadisi woyite dhagge ikkannori ikkino. Yesuusi Naatinaeelinni xaade egenninokkiha ikkirono, “Kuni xagarro afiꞌrinokkihu halaalaancho Israeelete manchooti” yiino. (Yoh. 1:47) Yesuusi Naatinaeeli noore coyiꞌrannoha ikkinota huwatino. Naatinaeeli ninkente gede guuntete xeꞌne noosi manchooti. Ikkirono isi lawisiisannoha diꞌꞌikkino, hattono ammanaminoho. Yesuusi tennera dhagge assiꞌrino; hakko daafira Naatinaeeli galatinosi. Faarso 15 kulloonnihu Yihowa hagiirsiisate assa hasiissannonkehu rooru coyi wolootu ledo noonke aante ledo xaadooshshe afiꞌrinoho. Faarso 15:3 Yihowa dunkaani giddo wosiꞌnanno manchi daafira kultanni, “Lame arrawo coyiꞌrannokkiho; jaalisira bunshe assannokkiho; ollaasi heꞌmannokkiho” yitanno. Konni garinni coyiꞌrate dandoonke garimale horoonsiꞌra, woloota gawajjitanno.—Yaq. 1:26. w24.06 10 guf. 7, 9; 11 guf. 10

Soqqanshote dancha gede qixxaambeemmoha ikkiro, manna hasaawinseemmo woyite hakkeya diwaajjineemmo. Yesuusi rosaanosi soqqanshote soyara albaanni, balaxxe qixxaabbanno gede kaaꞌlinonsa. (Luq. 10:1-11) Insa Yesuusi rosiisinonsare assitino daafira dancha gede soqqantino hattono lowo hagiirre afidhino. Soqqanshote qixxaawa dandiineemmohu hiittoonniiti? Kulleemmo halaale uminke yaattonni dancha gede assine xawinse kula dandiineemmo gara heda hasiissannonke. Qoleno qoqqowinkera heeꞌranno manni macciishsha giwe coyiꞌrannoha lame woy sase coye hedanna dawaro mayine qolleemmoro rosiisiꞌra hasiissannonke. Hakkiinni manna wodanaaꞌminenna faasiinqe hasaawisate woꞌnaalleemmo. w24.04 16 guf. 6-7

Baalunkunni roore dancha duduwo dudumbeemmohu Magano Yihowanna qullaawa suꞌmasi banxeemmo daafiraati. Soqqanshonke banxeemmo Magano guwisiꞌrate kaaꞌlitannonke faro gede assine laꞌneemmo. Woꞌma giddonni, “Maganonke . . . atera ayirrinyu, guweenyunna wolqa ikkitohe!” yineemmo. Yihowa ‘baalankare kalaqinotanna’ heeshsho uyinonkehu iso ikkinota leellishshannota ammansiissanno taje wolootaho kulleemmo woyite, isira ayirrinyenna guweenya uyinanni heeꞌnoommo. Dandiinummo deerrinni yannanke, wolqankenna woxenke horoonsiꞌne soqqammeemmo woyite, atera wolqa ikkitohe yinanni heeꞌnoommohu gedeeti. (Mat. 6:33; Luq. 13:24; Qol. 3:23) Banxeemmo Magani daafira wolootaho kula hagiirsiissannonke. Qoleno wolootaho Maganu suꞌmanna isi ayimma kulate kaꞌneemmo. w24.05 17 guf. 11

Yihowa xaa yannara keerenna harshammo afiꞌneemmo gede assannonke; hattono albillitte hegere heeshsho aannonke. Yihowara ninke baꞌraasate hasattonna wolqa noosita addaxxine iso hexxa dandiineemmo. Alba heedhinori ammanantinori Maganu soqqamaano assitinonte gede, togooti kaajjado ammana Yihowara diinaggaambe soqqammanni heeꞌneemmo gede assitannonke. Umi xibbi diro heeꞌrinohu Ximootewoosino hatto assino. (Ibi. 6:10-12) Ximootewoosi heeshshote Magano hexxino. (1 Xim. 4:10) Hakko daafira isi wolootahonna Yihowara diinaggaawe soqqamino. Hiitte doogganni? Phaawuloosi isi sabbakanno woyitenna songote giddo rosiisanno woyite albinni roore worba ikkanno gede jawaachishinosi. Qoleno Ximootewoosi ammanate roduuwisira ajahono akkalahono dancha lawishsha ikkanno gede kulinosi. Isira mito shota ikkinokki looso uyinoonnisi; konni loosi giddo gamu amaale hasiissannonsare kaajjishe kayinni baxillunni amaalate. (1 Xim. 4:11-16; 2 Xim. 4:1-5) Ximootewoosi Yihowa baꞌraasannosita addaxxa dandaanno.—Rom. 2:6, 7. w24.06 22-23 guf. 10-11

Yihowa duucha hige masaalaanote widoonni mannasi qorowisiisino hattono seejjino. Lawishshaho Maganu Ermiyaasi widoonni togo yiino: “Ammanantinannikki Israeele, ane Kaaliiqiwa higge! Ani maaro batidhinoha ikkoommo daafira dihanqeemmo; kiꞌnera hegere geeshsha hanqoommo gedeenni diheeꞌreemmo. Kiꞌne saoꞌne calla ammanne.” (Erm. 3:12, 13) Qoleno Yihowa Iyyueeli widoonni, “Coꞌo yiino wodaninni, . . . anewa higge!” yiino. (Iyu. 2:12, 13) Isi Isayaasi widoonnino togo yino: “Keeraabbe. Busha loosoꞌne baala albiꞌyanni hoolle. Sao assa agurre.” (Isa. 1:16-19) Qoleno Hiziqeeli widoonni togo yee xaꞌmino: “Ani bushu manchi reyannota hagiidheemmoha lawannoꞌneni? Deeꞌni, ani hagiidheemmohu, cubbosi aagintaawe hige lubbotenni heeꞌrirooti.” (Hiz. 18:23, 32) Yihowa mannu hegerera heeꞌrara hasiꞌranno daafira, cubbaataammu maaro eꞌanno woyite tashshi yaannosi! w24.08 9 guf. 5-6

Baalunku Maganu manni ayyaanaamittete sagale, biddishshanna hasiisannonsa agarooshshe afiꞌranno. Yihowa mallaadannokkiha ikkasi leellishinoti mitte doogo, alamete aana noo manni baalunku Qullaawa Maxaafa afiꞌranno gede assasiiti. Umo Qullaawa Borro borreessinoonnihu Ibiraawootu, Aramayiketenna Girikete afiinniiti. Umo Qullaawa Maxaafa borreessinoonni afoo nabbawa dandiitannori konne afoo dandiitannokkirinni roore Yihowa ledo muli jaalooma kalaqidhannoni? Deeꞌni. (Mat. 11:25) Yihowa jaallasi ikkineemmo gede koyisannonkehu lowo roso ronsoommo daafira woy hunda Qullaawa Maxaafa borreessinoonni qaale dandiineemmo daafira diꞌꞌikkino. Yihowa lowo roso rosino manni calla ikkikkinni, alamete aana noohu baalunku manni isi aanno hayyo afiꞌranno gede assino. Qullaawu ayyaaninni borreessinoonniha Qaalesi yaano Qullaawa Maxaafa lowo kume ikkanno afiinni tirroonni; hakko daafira alamete aana noo manni Qullaawu Maxaafi rosiisanno rosinni horo afiꞌranna Maganu jaalla ikkinanni gara rosa dandaanno.—2 Xim. 3:16, 17. w24.06 6-7 guf. 13-15

Yesuusi balaxe masaalinonte gede Yerusaalame baꞌanno yanna gambisse dagganni no. Kiristaanu gattino yanna horoonsiꞌre ammanansa kaajjishiꞌranna qarra cince saꞌꞌate qixxaawa hasiissannonsa. (Ibi. 10:25; 12:1, 2) Muli yanna giddo Ibiraawootu Kiristaanira iillino qarrinni lowo geeshsha rooranno qarri iillannonke. (Mat. 24:21; Aju. 16:14, 16) Hanni Yihowa hatte yannara heeꞌranno Kiristaanira kulinota mite amaale laꞌno; tini amaale ninkeno kaaꞌlitannonke. Soqqamaasinchu Phaawuloosi, ammanate roduuwisi Maganu Qaale unte xiinxallitanno gede jawaachishinonsa. (Ibi. 5:14–6:1) Phaawuloosi Ibiraawootu Afiite Qullaawa Borro giddonni qummi asse, Kiristaanu Yihowa magansiꞌranno gari Yihudu manni magansiꞌranno garinni lowo geeshsha baxxinoha ikkinota kulinonsa. Phaawuloosi egenno lexxanna halaale seekke huwata Kiristaanu kaphu roso bade afanno gedenna giwanno gede kaaꞌlitannonsata afino; tini insa badhera higgannokki gede kaaꞌlitannonsa. w24.09 8-9 guf. 2-3; 10 guf. 6

Yesuusi rosaanora jawaante hasiissinonsa. Mayira? Mitootu iso harunsate yite minensa, maatensanna loosonsa agurtino. (Mat. 19:27) Woloota qole, Yesuusi rosaano ikkitino daafira miincoonninsa. (Yoh. 9:22) Insa konni garinni uminsa horo agurtinohu Yesuusi daanno yine qaale eꞌnoonniha Buuraminoha ikkinota ammantino daafiraati. (Mat. 16:16) Kayinni Yesuusa shinita insa lowo geeshsha dadillitino hattono hexxo mudhitino. Yesuusi reyihu gedensaanni rosaanosi dadillansa garankolla; tini ammana ajjinonsata leellishshannota diꞌꞌikkitino. Yesuusi tenne afinoti dihuluullissannote. Hakko daafira isi reyotenni kai barranni jaallasi jawaachisha hanafino. Lawishshaho Yesuusi iso waammoonniwa heedhe wiꞌlitanni noote Megidelitte Maariyaamira leellino. (Yoh. 20:11, 16) Qoleno Eemahusi hadhurira lame rosaanosirano leellino. Hakkiinni saeno soqqamaasinchu Pheexiroosira leellino. w24.10 13 guf. 5-6

Annuwanna amuuwa, oosoꞌne Kalaqaanchu noota ammantannohu mayiraatiro xawisse kultanno gede kaaꞌlensa. Oosoꞌne ledo jw.org aana fulinoha “Wedellootu Xaꞌmitanno Xaꞌmo—Kalaqamanso Suutu Soorro?” (Amaaru afoo) yaannoha aante aantete fulanno birxicho xiinxallaꞌne kaaꞌlitaꞌnera dandiitanno. Hakkiinni oosoꞌne Kalaqaanchu daafira halaale ikkinore wolootaho kulate roore ammansiissannote yite heddanno hajo mitteenni hasaabbe. Dancha gede hasaawa hasiꞌranno manchi heeꞌriro huwatate qarrisannokki garinni hasaawissanno gede jawaachishshensa. Lawishshaho, mittu rosaanchi “Ani laoommorella ammaneemmo; Magano qole lae diegennoommo” yaara dandaanno. Mittu wedellichi togo yee qolara dandaanno: “Hanni mannu heeꞌrannokkiwa dubbu giddo hadhanni heedhe kinchunni seekkinoonnita mitte wayi bue laootto yine hendo. Hakka woyite mayite hedatto? Hatti wayi bale heeꞌrase seekkinohu noota leellishshannoha ikkiro, kalqete alame heeꞌrase kalaqinohu noota leellishshannota diꞌꞌikkitino?” w24.12 18 guf. 16

Ninke baalunkura, dancha doorsha doodhate biddishshu hasiisannonke. Togoo biddishsha songote cimeeyyewiinninna ayyaanaamittetenni gikki yiinohu wolu Kiristaaniwiinni afiꞌra dandiineemmo. Insa diro ninkenni lowo geeshsha roortannoha ikkiro, uyitannonke amaale xaa yannara kaaꞌlitannori dinoote yine misha dihasiissannonke. Yihowa geedhitino roduuwiwiinni ronsammora hasiꞌranno. Insa ninkenni roore seeda yanna heedhino daafira, woꞌnaalshu, wodanchanna hayyo noonsa. Hundi waro, Yihowa mannasi jawaachishatenna massagate geedhitinore ammanantino labballo horoonsiꞌrino. Hanni lawishshaho Muse, Daawitinna soqqamaasinchu Yohaannisi daafira laꞌno. Insa heedhinohu addi addi yannaraati; heeshshonsa garino lowo geeshsha babbaxxinoho. Insa geedhimmansa yannara, wedellaho lowo geeshsha kaaꞌlitanno amaale uyitino. Kuri mittu mittunku geedhitino labballi Maganoho hajajama hasiissannota ikkitinota luphi assite coyidhino. Wedella woy jajjabbano ikkinummoro, insa amaale xiinxalline horo afiꞌra dandiineemmo.—Rom. 15:4; 2 Xim. 3:16. w24.11 8 guf. 1-2

Nohi waro Maganu mannu mundee itannokki gede hajajino. (Kal. 9:3, 4) Gedensoonni Yihowa Israeelete uyino Seerirano insa mundee ittannokki gede hajajino. Mundee itannoha aye manchono shinanni. (Lew. 7:27) Yesuusino konne Seera ayirrisanno. (Mat. 5:17-19) Hakko daafira Yihudu manni addu maalasi itanno gede woy mundeesi aganno gede kulanni no yee heda ikkannokki coyeeti. Yesuusi coyiꞌrinori lawishshu tiro afiꞌrinore ikkinoti egennantinote; isi hakkuyira albaanni Samaariyu mancho hasaawisi woyiteno lawishshu yaatto horoonsiꞌrino. Isi togo yiino: “Ani [eemmo] wayi . . . hegere heeshsho uyitanno buicho ikkanno.” (Yoh. 4:7, 14) Yesuusi Samaariyu mancho buichote giddonni fulanno waa aggino daafira calla hegere heeshsho afidhannota kulanni nooha diꞌꞌikkino. Hatteente gede isi Qifirinaahoomi gamba yiino mannira, addu maalasi itturonna mundeesi agguro hegere heeshsho afidhannota kulanni nooha diꞌꞌikkino. w24.12 9 guf. 4-6

Kiristaana ikkitino minaannuwi, meyatera gara ikkitinokki lao heedhannonsakki gede qoropha hasiissannonsa. Mayira? Mittu korkaati, hendoonni coye assinara dandiinanni daafiraati. Soqqamaasinchu Phaawuloosi Roomaho heeꞌrannohu buuramino Kiristaani, ‘tini alame huntansara wodhannokki’ gede qorowisiisinonsa. (Rom. 12:1, 2) Phaawuloosi Roomaho heeꞌranno Kiristaanira sokka borreessi woyite, songo xintantunku haammatu diri sainoha ikkara dandaanno. Ikkirono Phaawuloosi coyiꞌrinori, songote noori mitootu alamete budinna hedo huntansara wodhitinota leellishanno. Phaawuloosi insa hedonsanna akatansa biddi assidhanno gede jawaachishinonsahu iseraati. Tini amaale xaa yannara noo minaannuwino haꞌrunsa hasiissannote. Mitu minaannuwi tini alame huntansara wodhite minaamuwansa miiccino. w25.01 9 guf. 4

Xaa yannara songote cimeeyyera loosu batiꞌrannonsa. Insa sabbakate looso loossanno. (2 Xim. 4:5) Songote cimeeyye albisa ikkite qanchoho soqqantanno, sabbakate looso qineessitanno hattono dancha gede sabbankeemmonna rosiinseemmo gede qajeelsitannonke. Qoleno insa maartannorenna mallaaddannokki daanyoota ikkite soqqantanno. Mittu Kiristaanchi jawa cubbo loosiro, isi Yihowa ledo noosi jaalooma haaroonsiꞌranno gede kaaꞌlate sharrantanno. Qoleno songo xuru nookkita ikkite heedhanno gede kaaꞌlitanno. (1 Qor. 5:12, 13; Gal. 6:1) Insahu qaru loosi Yihowa manna allaalate. (1 Phe. 5:1-3) Insa lallawo dancha gede qixxaabbe shiqishshanno, songote giddo nooha mitto mittonka seekkite egennate sharrantanno hattono roduuwa towaattanno. Mite songote cimeeyye wole looso loossannotano agurranna, Gambooshshu Addaraashe minanna gatamara kaaꞌlitanno, qoqqowu gambooshshe qineessitanno hattono Hospitaalete Ledo Xaadissanno Komite giddonna Dhiwantinore Laꞌanno Gaamo giddo soqqantanno. Addanko cimeeyye ninke daafira diinaggaabbe loossanno! w24.10 20 guf. 9

Qullaawu Maxaafi giddo “woxxa” yaanno qaali wodo baantoonninke daafira wolaphinoommota woy keere fulloommota leellishannoho. Soqqamaasinchu Pheexiroosi tenne daafira kulanni togo yiino: “Annuwaꞌnewiinni ragidhinoonnita haafu heeshsho heedhinanniwiinni wondoonniꞌnehu baꞌꞌanno birrinni woy baꞌꞌanno culkinni diꞌꞌikkino. Kiꞌne wondoonnihu kullannire woy minshannire afiꞌrinokki geꞌrechite gedeetenni ayirrado Kiristoosi mundeenniiti.” (1 Phe. 1:18, 19) Wodote kakkalo baantoonninke daafira, aananke moohino cubbinninna reyonni wolapha dandiineemmo. (Rom. 5:21) Yihowa Yesuusi mundeenni woxxinonke daafira Isonna Yesuusa lowo geeshsha galanteemmonsa. w25.02 5 guf. 15-16

Cubbo loonseemmokki gede qoropha dandiineemmohu hiittoonniiti? Hanni Lawishshu maxaafa fooliishsho 7te kulloonni wedellichi lawishshinni maa ronseemmoro laꞌno. Isi foora mancho ledo foorino. Kiiro 22 kuni wedellichi “sammi yee hoodese haꞌri” yitanno. Isi woshshaadote giddora einohu hedeweelcho lawara dandaanno. Kayinni hakkuyira aleenni noo kiiro leellishshannonte gede, isi sunu sununni cubbunniwa massannosiha haammata coye assino. Iso cubbu widira qole massinosiri maati? Umo, isi leeshshote “minise [foora mancho] maddera noo doogo amade” haꞌrino. Hakkiinni minisewa hige haꞌrino. (Law. 7:8, 9) Mancho laiti qole isewiinni agure dihaꞌrino. Hatteentenni isi sunqitasira sammi yee wodhino; hattono mittimmate kakkalo shiqishidhinota kultannasi sammi yee macciishshino; tenne kultinosihu ise busha mancho ikkitinokkihu gede asse hedara yite ikkara dandaanno. (Law. 7:13, 14, 21) Kuni wedellichi cubbo loosanno gede assannosi coye qorophoommero, fonqolu giddora dieanno hattono cubbo diloosanno. w24.07 16 guf. 8-9; 19 guf. 19

Yihowa mannisi mereero jawa cubbo loosannoha lashshi asse diaguranno. Mitootu, Yihowa maarannoha ikkino daafira, cubbo loosse maaro eꞌannokkiri songote giddo heedhara fajjanno yite heddara dandiitanno. Yihowa maarannoho; kayinni isi cubbo lashshi diassanno; qoleno biddishshasi disoorranno. (Yih. 4) Yihowa cubbo loosse maaro eꞌannokkiri songote giddo heedhanno gede fajjannoha ikkiro, tini songote noore baala gawajjitanno daafira maaro leellisha diꞌꞌikkitino. (Law. 13:20; 1 Qor. 15:33) Ikkirono Yihowa aye manchino baꞌꞌara dihasiꞌranno. Dandaami deerrinni isi baalunku manni gatara hasiꞌranno. Isi hedonsa biddi assidhe galagalte isi ledo jaalooma hasidhannorira maarosi leellishanno. (Hiz. 33:11; 2 Ph. 3:9) Qorontoosi songora noo manchi busha assootesi agure maaro eita, Yihowa soqqamaasincho Phaawuloosi horoonsiꞌre songo iso gatona yaanna anga fante haaꞌra hasiissannonsata kulino. w24.08 17 guf. 7; 18-19 guf. 14-15

Geꞌreewunna meu daafira kulanno lawishshira, Yesuusi mannaho yoo yaannohu buurantino roduuwasi kaaꞌlinoronna teꞌee lae ikkinota xawisino. (Mat. 25:31-46) Isi yoo yaannohu “quuxxote qarri” yannara Armagedooni hanafara albaanniiti. (Mat. 24:21) Allaalaanchu geꞌreewo meuwiinni badannonte gede, Yesuusi buurantino harunsaanosi ammanante kaaꞌlitinore kaaꞌlitinokkiriwiinni badanno. Qullaawu Maxaafi masaalo Yihowa shoomino Daanyi Yesuusi keeraancho yoo yaannoha ikkinota leellishshanno. (Isa. 11:3, 4) Isi mannu assoote, hedannorenna coyiꞌrannore hattono buurantino roduuwasi kaaꞌlanno gara seekke laꞌꞌanno. (Mat. 12:36, 37) Yesuusi buurantino roduuwisiranna insa loossanno loosira kaaꞌlantinori ayeootiro afanno. Geꞌreewoho yiniri Kiristoosi roduuwa kaaꞌlitannoti qara doogo sabbakate looso loosate. w24.09 20-21 guf. 3-4

Ammanneemmo coyi garahoronna teꞌee Qullaawu Maxaafi rosi ledo heewisiinse buuxiꞌra dandiineemmo. Hanni lawishshaho Maganu albaanni waagu noosironna teꞌee huluullamino wedellichi daafira hendo. Isi tenne huluullosi sammi yee agura hasiissannosi? Dihasiissannosi. Isi tenne daafira Yihowa hedo afate ‘baalanka coye fonqole laꞌꞌa’ hasiissannosi. Qullaawa Maxaafa nabbambeemmo woyite, Yihowa hasaawisannanke ‘macciishshinanni’ heeꞌnoommohu gedeeti. Kayinni xaꞌmuwankera dawaro afiꞌrate Qullaawa Maxaafa nabbawatenni sainore assa hasiissannonke. Qullaawa Maxaafa nabbambeemmo woyite, ninkera huluullinonke coyi ledo xaadooshshe afiꞌrino gafa nabbawa hasiissannonke. Tenne assate Yihowa dirijjite qixxeessitinoha xiinxallate kaaꞌlanno uduunne horoonsiꞌne xiinxalla dandiineemmo. (Law. 2:3-6) Yihowa xiinxallineemmo woyite kaaꞌlannonke gedenna huluullinonke coyi daafira isi hedo maatiro anfeemmo gede kaaꞌlankera huuccatto assiꞌra dandiineemmo. Hakkiinni ninke hajo ledo sumuu yaannoha Qullaawu Maxaafiha xintu seeranna kaaꞌlitanno hedo afiꞌrate sharrama dandiineemmo. w24.10 25 guf. 4-5

Yihowa naaxxannohu woy silxaanete wojji yaanno manchi assannore dimaassiꞌranno. (1 Qo. 10:24, 33; 13:4) Yesuusiti muli jaallasi nafa gara ikkitinokki hedonni kaꞌe qoosso afiꞌrate sharrantino woyiti no. Hanni mitte yannara Yesuusiti lame soqqamaasine Yaaqoobinna Yohaannisi assitinore laꞌno. Insa Yesuusi Gashshootisira ayirrado bayicho aannonsa gede xaꞌmidhino. Yesuusi insa togoo bayicho xaꞌmiꞌransa garaho diyiino. Hatteentenni isi 12nte soqqamaasinesira togo yee xawise kulinonsa: “Mereeroꞌne rooriidiha ikka hasiꞌrannohu baalu soqqamaanchoꞌne ikka hasiissannosi; mereeroꞌne albiidiha ikka hasiꞌrannohu baaluno, woꞌmunkura borojjicho ikka hasiissannosi.” (Maq. 10:35-37, 43, 44) Danchare hedde yaano wolootaho soqqamate yite songote soqqamaano ikka hasidhanno roduuwi songote atoote ikkitanno.—1 Tes. 2:8. w24.11 15-16 guf. 7-8

Mitto coye doodhineemmo woyite, baxillu “wolu injo” ikkinnina uminke injo hasiꞌneemmokki gede hattono dhukanke anfoommore ikkineemmo gede kaaꞌlannonke. (1 Qor. 10:23, 24, 32; 1 Xim. 2:9, 10) Hakkiinni woloota banxeemmotanna ayirrinseemmota leellishanno doorsha doodha dandiineemmo. Lowo geeshsha hasiisanno doorsha doodhate kaoottoha ikkiro, doodhoottore umo fushshate mayi hasiisannohero hedi. Yesuusi, ‘balanxe shallaga’ hasiissannota rosiisino. (Luq. 14:28) Hakko daafira doodhatto doorsha umo fushshate mageeshshi yanna, woxinna wolqa hasiissannoro hedi. Qoleno mito woyite, doodhatto doorshi qinaanno gede mittu mittunku maatekki miili maa assa hasiissannosiro insa ledo amaalama kaaꞌlitara dandiitanno. Konni garinni balaxe heda dancha ikkitinohu mayiraati? Hatto assittoro doodhootto doorsha mito geeshsha biddi assa hasiissannoheta woy wolere woꞌnaala woyyitannota huwatattora dandaatto. Qoleno maatekki ledo amaalamattohanna insa yitannore macciishshattoha ikkiro, doodhootto doorshi qinaanno gede insa roore kaaꞌlitahera dandiitanno. w25.01 18-19 guf.14-15

Isayaasi ayyaanaamittete gannate giddo ‘tashshi yaannonkenna hagiidhineemmo’ gede assannonkehu ikkadu korkaati noota xawise kulino. Tini ayyaanaamittete gannate Yihowa kalaqinote. (Isa. 65:18, 19) Yihowa mannu ayyaanaamittetenni kooaartino dirijjitta giddonni fule, biifado ayyaanaamittete gannatewa daanno gede assate ninke horoonsiꞌranno! Halaalu giddo heeꞌrankenni afiꞌnoommo atooti lowo geeshsha hagiirsiisannonke; hattono konni atooti daafira wolootaho kulate murciꞌnoommo. (Erm. 31:12) Ayyaanaamittete gannate giddo heeꞌrate hexxonkeno lowo geeshsha hagiirsiissannonke. Qullaawu Maxaafi tenne hexxo daafira kulanni togo yaanno: “Manniꞌya, mine miꞌne heeꞌranno; woyineno kaasiꞌre laalose itanno.” Yihowa maassiꞌrannonke daafira ‘assiꞌneemmori baalu qinaannonke.’ Isi beꞌe yinummokkinni harshammi yine dancha heeshsho heeꞌneemmota kule qaale einonke. Isi mittu mittunkura hasiisannonkere afino; hattono ‘woꞌmunku halcho wonshanno.—Isa. 65:20-24; Far. 145:16. w24.04 22-23 guf. 11-12

Yihowa woꞌmunni woꞌma addaxxineemmo woyite iso gaaꞌlineemmo kinchonke assiꞌnanni heeꞌnoommo. Qarru yannara nafa Yihowara hajajamme iso addaxxinummoro horo afiꞌneemmo. (Isa. 48:17, 18) Yihowa kaaꞌlannanke laꞌneemmo woyite iso albinni roore addaxxineemmo. Hatto assinummoro iillannonke fonqoli ikkihano ikkiro qeelle saꞌneemmohu Yihowa kaaꞌlonni calla ikkinota ammanneemmo. Jawu kinchi gede Yihowa kaajje heeꞌrannoho hattono disoorramanno. Yihowa akattanna isi assara hedinori horo disoorramanno. (Mil. 3:6) Addaaminna Heewani Yihowara finqilirono Yihowa mannu oosora hedinore disoorrino. Soqqamaasinchu Phaawuloosi borreessinonte gede Yihowa ‘isiniira badhe diwodhanno.’ (2 Xim. 2:13) Hatto yaa ikkirino ikkiro woy wolootu assitannori ayereno ikkiro isi akattasi, assara hedinore woy biddishshasi horo disoorranno yaate. Yihowa soorramannokki Magano ikkino daafira, qarru yannara kaaꞌlannonketanna albillittete yanna daafira uyinonke hexxo wonshannota anfoommo.—Far. 62:6, 7. w24.06 27-28 guf. 7-8

Baxillu jaalooma amaddinoonniha ikkiro adhama woy agura doodhitinanni gede kaaꞌlannoꞌneri maati? Mimmito seekkitine egenne. Baxillu jaalooma amaddinara albaanni mimmitu daafira mitore affinoonniha ikkara dandaanno. Xa kayinni, ‘wodanu giddo nooha giddoyidi manninate [“ayimma” NW]’ affinanni faro afidhinanni. Hatto yaa mimmitu ayyaanaamitte, akattanna hedo albinni roore affinanni yaate. Galtine hossine aante noo xaꞌmuwara dawaro afiꞌraꞌne digattanno: ‘Kuni manchi dancha galte ikkannoe?’ (Law. 31:26, 27, 30; Efe. 5:33; 1 Xim. 5:8) ‘Mimmito baxanna towaata dandiineemmo? Mimmitu soꞌro agurre saꞌꞌa dandiineemmo?’ (Rom. 3:23) Mimmito roore egentinanni hadhinanni woyite aante noo hedo qaagge: Afoo xaada dancha ikkiturono, roore laꞌnanniti sumuu yaa hoongeemmo woyite leellinsheemmo akattaati. w24.05 27 guf. 5

Moote Daawiti lowo soꞌro loosino. Kayinni masaalaanchu Naataani loosino cubbo kulisita, Daawiti umosi heeshshi asse maaro eino. (Far. 51:3, 4, 17) Moote Hiziqiyaasino Yihowa dadillisino. (2 Dud. 32:25) Kayinni Daawiti gede Hiziqiyaasino umosi heeshshi asse maaro eino. (2 Dud. 32:26) Hakko daafira Yihowa jeefote iso, ‘Kaaliiqi baxanno coye assinohu’ ammanamino moote gede asse lainosi. (2 Mot. 18:3) Maa ronseemmo? Cubbinkera maaro eanna hakko cubbo galagalle loonseemmokki gede dandiinummore baala assa hasiissannonke. Songote cimeeyye shiima labbanno soꞌrora nafa amaaltannonkehalla ikki? Yihowa woy songote cimeeyye baxxannonkekkihu gede assine heda dihasiissannonke. Israeelennita dancha mootoolla nafa amaalloonninsa hattono seejjinoonninsa. (Ibi. 12:6) Seejjinanninke woyite aane noore assa hasiissannonke: (1) umonke heeshshi assine maahoyye yaa, (2) biddi assiꞌra hasiissannonkere biddi assiꞌranna (3) woꞌmu wodaninkenni Yihowara agurrummokkinni soqqama. Cubbinkera maaro eꞌnummoro, Yihowa gatona yaannonke.—2 Qo. 7:9, 11. w24.07 21 guf. 8; 22 guf. 9, 11

Cubbo loosino mancho songotenni fushshinannihu cimeeyye maaro eanno gede duucha higge kaaꞌlate woꞌnaalturono maahoyye yaa giwirooti. (2 Mot. 17:12-15) Konni manchi assooti, isi Yihowa biddishshira hajajama hasiꞌrinokkita leellishanno. (Mar. 30:19, 20) Xaate Yihowa Farciꞌraasincho ikkinokkita songo affanno gede egensiishsha kullanni. Konne egensiishsha kullannihu cubbo loosino mancho saalsiisate diꞌꞌikkino. Hatteentenni halashshaano, Qullaawa Borro kultanno garinni ‘hakko manchi ledo aana agurtanno gede woy togoo manchi ledo sagale nafa ittannokki gedeeti.’ (1 Qor. 5:9-11) Konne biddishsha uyinoonnihu dimullaati. Soqqamaasinchu Phaawuloosi, “Shiima irsho lixe gudisse kayissanno” yee borreessino. (1 Qor. 5:6) Cubbo loosse maaro eꞌannokkiri Yihowahu keeraanchu biddishshi garinni heeꞌrate sharrantanni noore huntara dandiitanno.—Law. 13:20; 1 Qor. 15:33. w24.08 27 guf. 3-4

Wolootaho wolqa aa didandiineemmo. Kayinni insa kaaꞌlate wolqanke horoonsiꞌra dandiineemmo. Lawishshaho geedhitinori woy dhuku anje noonsari ammanate roduuwinkera dikko haꞌne mitore hira woy mini giddo loonsanni looso kaaꞌla dandiineemmo. Woy uminke fajjonni Gambooshshu Addaraashe feya woy gatamara kaaꞌla dandiineemmo. Coyiꞌneemmorino wolqa afiꞌrinota deꞌnoonke. Assitinore kulte galatittonsaro jawaante afidhara dandiitannori ayeooti? Shesho hasiissannosihu afoottohu no? Togoo manni nooha ikkiro insa daafira hedattota afanno gede assi. Marte xaꞌmite, silke dowwolte, kaarde woy iimeele sokke hattono sokka borreessite tenne assa dandaatto. Togoo woyite mayyaattoro quwa saꞌe yaada dihasiissannohe. Ammanate rodiikki hakko barra ammaname saꞌꞌanno gede woy qarrasi illachisha agure dancha danchare hedanno gede kaaꞌlannosihu baxillunni kaꞌe coyiꞌrattoha shiima qaale calla ikkara dandaanno.—Law. 12:25; Efe. 4:29. w24.09 28 guf. 8-10

Songote soqqamaancho ikkite soqqantanni noottoha ikkiro, songote cimeessa ikkate hasiissanno guunte wonshate sharrantanni noottoha ikkara dandaanno. Konne “ayirrado” looso loosate mixo fushshiꞌra dandaatto? Songote cimeeyye loossanno loosi hiikkonneeti? Qanchoho albisa ikkite soqqantanno, roduuwa towaatatenna rosiisate diinaggaabbe loossanno, hattono coyidhannorinninna assitannorinni songo dhaabbanno. Qullaawu Maxaafi diinaggaabbe loossanno cimeeyye ‘elto ikkino mannaati’ yaannohu iseraati. (Efe. 4:8) Songote cimeessa ikkate ikkado ikka dandaattohu hiittoonniiti? Songote cimeessa ikkate hasiissanno dandoonna loosoho qaxaramate hasiissanno dandoo mitte diꞌꞌikkitino. Loosoho qaxaramate, loosiisaanchikki hasiꞌranno dandoo heedhuhe geeshsha looso afiꞌra dandaatto. Songote cimeessa ikka hasiꞌrittoro kayinni sabbakatenna rosiisate dandoo calla diꞌꞌikkitanno. Umi Ximootewoosi 3:1-7 nna Tiito 1:5-9 kulloonnita Qullaawa Borro guunte wonsha hasiissannohe. w24.11 20 guf. 1-3