Arfaasa

Minaannanna minaama lowo geeshsha hagiirsiisannonsa coyi giddo mittu ooso ilate. Kayinni annunna ama qaaqqonsa baxannoha ikkirono hegerera daaima ikke heeꞌrara dihasiꞌranno. Isinni insa qaaqqu lopha giwiro lowo geeshsha yaaddanno. Hatteente gede Yihowa isi daafira rosa hananfeemmo woyite hagiidhannoha ikkirono, ayyaanaamittetenni gincammora dihasiꞌranno. (1 Qor. 3:1) Hatteentenni isi ‘hedonkenni jajjabbu gedeere ikkineemmo gede’ jawaachishinonke. Qullaawu Maxaafi giddo, ‘hedonkenni jajjabbu gedeere ikka’ yine tirroonniha Girikete afii qaale, “gikki yaa” ‘guutanna woꞌma ikka’ yineno tira dandiinanni. (1 Qor. 2:6) Mittu qaaqqi jawa ikka geeshsha lophannonte gede, ninkeno woꞌmanka woyite Yihowa ledo noonke jaaloomi lexxanno gede assiꞌra hasiissannonke. Hatto assinummoro ayyaanaamittetenni gikki yinoommore ikkineemmo. Hige tenne mixo wonshiꞌnummohu gedensaannino ayyaanaamittetenni lopha agura dihasiissannonke.—1 Xim. 4:15. w24.04 2 guf. 1, 3

Yihowa atera maakkiiti yine xaꞌminihero mayyaatto? ‘Isi Annaꞌyaati, Maganoꞌyaati hattono Jaalaꞌyaati’ yite qolattoha ikkara dandaanno. Qoleno Yihowa wolu garinni xawisattoha ikkara dandaanno. Ikkirono Yihowa wosinsiꞌrannohehu gede assite hedde egennoottoyya? Moote Daawiti Yihowanna ammanantino soqqamaanosi mereero noo jaalooma wosinsiꞌranno manchinna wosinisi mereero noo jaaloomi ledo heewisiisino. Isi “Kaaliiqa, minekki galannohu ayeti? Qullaawu Ilaalikki iima heeꞌrannohu ayeti?” yiino. (Far. 15:1) Tenne qullaawu ayyaaninni borreessinoonni hedonni Yihowa wosina yaano jaallasi ikka dandiineemmota ronseemmo. Yihowa baalanka coye kalaqara albaanni callisi heeꞌranno. Hakkiinni umo Beettosi kalaqino; Yihowa mite yee dunkaanisi giddo iso wosinsiꞌrino. Isi tenne assasinni lowo geeshsha hagiidhino. Qullaawu Maxaafi Yihowa Beettisinni lowo geeshsha ‘hagiidhinota’ kulanno. Umi wosinchisino Yihowa albaanni ‘tashshi yaannasi heeꞌrino.’—Law. 8:30. w24.06 2 guf. 1-3

Hanni tenne hedi. Daawiti Israeele woꞌmate moote assate 340,000 saꞌꞌanno manni gamba yiino. Mannu Kebirooni mule noohu kinna batidhino ilaalira hasaawanni hattono Yihowara galatunnita hagiirru faarso faarsanni sase barra keeshshino. (1 Dud. 12:39) Hakkiicho lowo manni mereero Saadooqi yinanni wedellichi noota mannu afinoha dilawanno. Kayinni Yihowa ninke isi hakko noota anfeemmo gede assino. (1 Du. 12:22, 26-28) Saadooqi Kakkalaanote Biili Abiyaataari ledo soqqamanno kakkalaanchooti. Maganu Saadooqira lowo hayyonna isi fajjo wodanchate dandoo uyinosi. (2 Sam. 15:27) Isi worba manchooti. Tenne goofimarchu yannara Sheexaanu Maganu manna albinni roore sianni no. (1 Phe. 5:8) Yihowa Sheexaanenna busha alame hunannota agadhine heeꞌnoommote tenne yannara worbuulle ikka hasiissannonke. (Far. 31:24) Konni garinni, Saadooqi lawishsha haꞌrunsa dandiineemmo. w24.07 2 guf. 1-3

Yihowa umi mancho Addaaminna Heewani kalaqi woyite insa hagiirraamma ikkitara hasiꞌrino. Isi insara biifado qae uyinonsa, adhanna adhama elto asse uyinonsa hattono hagiirsiisanno looso uyinonsa. Insa sirchinsa uulla woꞌmanno gede assite, baatto woꞌma Edenete kaashshu base gedeeta assa hasiissannonsa. Yihowa insara qarrissannokkita mitte hajajo calla uyinonsa. Qoleno isi, insa affanni heedhenni isira finqilte tenne hajajo diigguro, cubbinsanni kainohunni reyitannota kule qorowisiisinonsa. Insa ma ikkitinoro anfoommo. Maganono insano baxannokkihu mittu ayyaanaamu kalaqami konne cubbo loossanno gede assinonsa. Addaaminna Heewani Sheexaanu yiinore assitino. Insa baxillaancho Annansa addaxxa agurte cubbo loossino. Anfummonte gede, Yihowa yiinori woꞌmino. Hakkunni gedensaanni insa loossinore mixxitino yaano geedhitino hattono jeefote reyitino.—Kal. 1:28, 29; 2:8, 9, 16-18; 3:1-6, 17-19, 24. w24.08 3 guf. 3

Yihowanna muxxe Beettisi hagiirraamma ikkinammora hasidhanno. Faarso 119:2 togo yitanno: “Hajajosi wonshitannorinna, woꞌmu wodaninni iso hasidhannori baraadhinoreeti [“hagiirraammaho,” NW].” Yesuusino tenne lede buuxisanni, “Hagiirraammu Maganu qaale macciishshite hajajantannoreeti!” yiino. (Luq. 11:28) Yihowa magansiꞌneemmore ikkinoommo daafira, Maganu Qaale ganyine nabbawankenna nabbamboommore loosu aana hosiisate sharramanke hagiirraamma assitannonke. (Yaq. 1:22-25) Yihowa hagiidhanno gede assineemmoti qara doogo tenneeti. (Ros. 12:13) Maganu Qaalinni nabbamboommore loosu aana hosiinseemmo woyite, maatenke heeshsho seekkanno; hattono ammanate roduuwinke ledo noonke jaaloomi kaajjanno. Hakkiino sae, Yihowa biddishsha harunsitannokkirira iillannonsahu lowo qarrinni ganteemmo. Ninkeno Moote Daawiti coyiꞌrino hedora sumuu yineemmo. Isi faarsosi giddo Yihowa seeri, hajajonna yoo daafira xawisihu gedensaanni jeefote, ‘Seerakki agadhaꞌyannino lowo baꞌraaꞌra afiꞌreemmo’ yiino.—Far. 19:7-11. w24.09 2 guf. 1-3

Yihowa soqqamaanosira iillannonsa coye baala laꞌꞌanno. Isi hagiirrenkeno dadillenkeno afanno. (Far. 37:18) Lowo geeshsha xissiisiꞌneemmo gede assanno coyi heeꞌrirono, Yihowa isira soqqamate dandiinummore baala assinanna laꞌꞌanno woyite lowo geeshsha hagiidhanno! Hakkiino sae isi ninke kaaꞌlatenna sheshifachishate quqquxamanno. Faarso 147:3, Yihowa wodana hiiqqantinorira ‘madansara gaga ganannota’ kultanno. Konni qummeeshshira Yihowa lowo geeshsha xissiisidhinore shaqqillunni towaatannota kulloonni. Yihowa towaanyonni horo afiꞌrate ninke maa assa hasiissannonke? Hanni mitto lawishsha laꞌno. Mittu dandoo noosi akimichi madiꞌrino manchi huranno gede kaaꞌlate lowore assanno. Ikkirono madiꞌrino manchi hurate akimichu kulannosire seekke haꞌrunsa hasiissannosi. Yihowa Qaalisi widoonni, xissiisidhinore hasaawisanno hattono baxillunni amaalannonsa. w24.10 6 guf. 1-2

Konni albaanni borruwanke giddo, Yihowa cubbaataammaho yee yoo yiinonsari ma ikkitannoro kulloonni. Togoo mannira kaote hexxo diheedhannonsa yine huwantoommo. Batinye Qullaawu Maxaafi xagge Yihowa cubbaataamma manna qorichishinota kultanno; lawishshaho kiironsa anfoonnikki manni Baote Wayinni goofino, Yihowa mannisi Hexxote Gobbara noota lamala daga shaanno gede hajajino, qoleno Yihowa sokkaasinchi mitto hashsha 185,000 Asooru olanto waxaaxo ganino. (Mar. 7:1-3; Isa. 37:36, 37) Ikkollana Qullaawu Maxaafi Yihowa kuni baalunku manni hegerera baꞌꞌanno yee murinota xawise kulanno? Dikulanno. Yihowa mittu mittunku manchira hiittoo yoo yiinoro dianfoommo; qoleno kuni reyino manni Yihowa daafira rosatenna maaro eate faro afiꞌrinoronna teꞌee dianfoommo. w24.05 3 guf. 5-7

Yesuusi, taalo yoo yaannose gede agurtukkinni mitto daanya huuccidhino gunnitte daafira kulanno lawishsha coyiꞌrino. Hakkawaro heeꞌrannoha roore manna miincanni daafira, Yesuusi rosaano giddo batinyeho tenne mancho qarri leellinonsaha ikkara dandaanno. (Luq. 18:1-5) Ninkeno miincanninke daafira hatte mancho qarri leellannonke. Yannankera, mannu manna mulla kae giwanno, taashshe dilaꞌꞌanno hattono beebba assiꞌranno; togoo coyi rosaminoha ikkino daafira mannu miicannonke woyite dhagge diassiꞌneemmo. (Ros. 5:8) Ikkirono ammanate roduuwinke dimiiccannonke yine hendeemmoha ikkara dandaanno; kayinni insa miiccankera dandiitanno. Hige ammanate roduuwinke miiccannonkehu affanni heedhenni diꞌꞌikkino. Insa guuntete xeꞌne noonsareeti. Yesuusi gibbannosiri miiccusi woyite assinorinni lowore rosa dandiineemmo. Gibbannonkeri miiccannonke woyite cincine saꞌꞌa dandiineemmoha ikkiro, ammanate roduuwinke miiccannonke woyite isinni hakkiinni roore cinca hasiissannonke! w24.11 2 guf. 1-2

Hundi waro daabbo batinyu mannira qara sagaleeti. (Kal. 14:18; Luq. 4:4) Isinni daabbo rosantino sagale ikkitino daafira, mito woyite Qullaawu Maxaafi giddo baalanta sagale kulate “daabbo” yaanno qaale horoonsiꞌnoonni. (Mat. 6:11; Soq. 20:7) Qoleno Yesuusi lowo manni afinota lame maalale loosi woyite daabbo horoonsiꞌrino. (Mat. 16:9, 10) Tenne xagge giddo mitte Yohaannisi fooliishsho 6te kulloonni. Yesuusi soqqamaasine sabbakkannowiinni higguta, Yesuusi insa ledo fooliishshiꞌrara yowolo gidde Galiilu Baara tayise saino. (Maq. 6:7, 30-32; Luq. 9:10) Insa Beetesayidaho nooha mannu nookki qooxeessa hadhino. Ikkirono mulenni lowo kume ikkanno manni gamba yee insawa dayi. Yesuusi insara fiile dihoꞌlinonsa. Isi insara Maganu Gashshooti daafira rosiisinonsa hattono dhiwantinore hursino. Yanna hawarrituta Yesuusi rosaano kuni baalu manni afooho wodhannore mamiinni afiꞌranno yite yaaddu. Konni manni giddo mitoho boode sagale noonsaha ikkara dandaanno; insa giddo rooru kayinni qacha hadhe sagale hidha hasiissannonsa.—Mat. 14:15. w24.12 2 guf. 1-2

Umi anninkenna amanke Addaaminna Heewani cubbu dinoonsareeti; hattono biifado gannatera heeꞌrino. (Kal. 1:27; 2:7-9) Insara hegerera hagiidhitanni heeꞌrate faro noonsa. Kayinni baalunku coyi soorramino. Insa Gannate ikkitino qaensanna hegerera heeꞌrate faro huꞌnino. Insa albillitte ilantanno oosonsara maa ragisiissino? Qullaawu Maxaafi togo yaanno: “Mittu manchi [Addaami] widoonni cubbu alame eino; cubbu widoonni reyo daggino; baalunku cubbo loosino daafira reyo manna baalaho iillitino.” (Rom. 5:12) Addaami cubbo ragisiisinonke daafira reyineemmore ikkinoommo. Kuni ragiꞌnoommo cubbi, ninke giddo aye manchino baata dandaannokkihu lowo asali gedeeti. (Far. 49:8) Yesuusi cubbu ‘asalu’ gede ikkinota kulino. (Mat. 6:12; Luq. 11:4) Cubbo loonseemmo woyite Yihowara baanteemmo asali giddora eꞌnanni heeꞌnoommohu gedeeti. Cubbinkera waaga baata hasiissannonke. Konne asale baata hoongoommero asalenke agurrannihu reyinummoro callaati.—Rom. 6:7. w25.02 2-3 guf. 2-3

Wolootaho Maganu Gashshooti halaale kula ninkera lowo ayirrinyeeti! Tenne qoosso afiꞌrannohu baalanka manna diꞌꞌikkino. Lawishshaho Yesuusi uullate aana noo yannara agaaninte isi daafira farcidhara difajjinonsa. (Luq. 4:41) Xaa yannara mittu manchi Yihowa manni ledo soqqamara albaanni tenne qoossora ikkado ikka hasiissannosi. Aye woyiteno mannu heeꞌrannowa baalawa sabbanke, tenne qoossonke naandeemmota leellinsheemmo. Yesuusinte gede ninke mixono Maganu Gashshooti halaale mannu wodani giddo wixatenna waa hayikkisate. (Mat. 13:3, 23; 1 Qor. 3:6) Yihowa dirijjiteno Yesuusi lawishsha harunsite mannu Maganu suꞌma afanno gede assate dandiiture baala assitanno. Qullaawa Borroti Haaro Alame Tiro Maganu suꞌmi galagale bayichosi higanno gede assite tennera lowore kaaꞌlitino. Xaa yannara tenne tiro woꞌma woy xea 270 saꞌꞌanno afiinni tirroonni. w24.04 9 guf. 8-9

Adhamansa hagiirru noota assidhinori mitu minaannuwi, minaamuwansa baxxannota leellishate barru baala mitore assitanno. (1 Yoh. 3:18) Mittu minaanni shiimare asse minaamasi baxannota leellishara dandaanno; lawishshaho isi angase amadara woy rimmi asse hanqafasera dandaanno. Isi sokka borreesse “qalli assoottae” yaasera woy “Keere hosoottae?” yaasera dandaanno. Mito woyite kayinni sokka borreesse lowo geeshsha baxannoseta kulasera dandaanno. Minaanni kuri coyibba assannoha ikkiro, minaamasi ayirrisanno hattono adhamansa kaajjitanno. Minaamasi ayirrisanno minaanni ise dhaawanno hattono jawaachishanno. Isi tenne assannoti mitte doogo, iso kaaꞌlate assitinore qaage galatate. (Qol. 3:15) Minaanni minaamasi godowinta galatannoha ikkiro tashshi yaannose. Wodanaaꞌmitanno hattono baxannoenna ayirrisannoe yite heddanno. w25.01 11 guf. 15; 13 guf. 16

Faarso 15 jeefote “Hattoo manchi horontanni dimasanno” yitanno. Kowiicho faarsaanchu, Maganu tenne faarsora kulloonnire assinammora hasiꞌrannohu mayiraatiro xawisino. Yihowa hagiirraamma ikkinammora hasiꞌranno. Hakko daafira isi atootesinna agarooshshe afiꞌneemmo gede assannonke biddishsha uyinonke. Yihowa dunkaanisi giddo heedhara fajjinori albillitte dhagge ikkanno atoote afidhanno. Ammanantinori buurantino roduuwi iima Yesuusi qixxeessinonsahu ‘lowo dargira’ hadhe heedhanno. (Yoh. 14:2) Uullate aana heeꞌrate hexxo noonsari Yohaannisi Ajuuja 21:3 kulloonni hexxo quqquxante agadhitanno. Yihowa ninke baalanka jaallasi ikkineemmo gedenna hegerera dunkaanisi giddo heeꞌneemmo gede koyisinonke; tini ninkera lowo ayirrinyeeti!—Fa. 15:1-5. w24.06 13 guf. 19-20

Ayirrinyu maati? Qullaawu Maxaafi giddo “ayirrinye” yaanno qaali mitto mancho ayirrinsannisi gede assanno coye baala leellishanno. Israeelete daga Gibitsete borojjimmanni fultuhunni shiima yanna gedensaanni, Yihowa ayirrinyesi dhagge ikkanno garinni leellishino. Hanni tenne hedi: Lowo miliyoone ikkannohu Israeelete manni Maganinsa coyiꞌrannore macciishshate Siina Ilaali hunda gamba yiino. Hakkiinni tunsino gomichi ilaala guggushshi. Hedeweelcho ilaalu qooxeessira guunjo woꞌmitu, baattono lowo geeshsha huxidhu, beleqonna banqo hattono lowota buudu xurumbi luulo macciishshini. (Ful. 19:16-18; 24:17; Far. 68:8) Israeelete manni Yihowa dhagge ikkanno ayirrinyesi konni garinni leellishi woyite, mageeshshi geeshsha maalaꞌlinoro hanni hedi. Xaa yannara, Yihowata dhagge ikkitanno wolqanna baxissanno akattasi wolootaho kulatenninna isi uyinonke wolqanni loonsoommo loosira iso galaxxatenni isira ayirrinye aa dandiineemmo.—Isa. 26:12. w25.01 2 guf. 2-3

Israeele Hexxote Gobba eꞌara hadhanni heedheenna, egennantino labballi Musenna Yihowa isira uyinosi looso mishshino. Insa “Mannu baalunku [Muse calla ikkikki] qullaawaho. Kaaliiqi ninke ledono noowe” yitino. (Kir. 16:1-3) Hige Yihowa albaanni ‘baalunku Israeelete manni qullaawa’ ikkirono, Yihowa albisa ikke mannasi massaganno gede Muse doorino. Muse mishe finqilinohu Israeelete manni Yihowa mishinohu gedeeti. Insa Yihowa hasiꞌrinore ikkikkinni insa hasidhinore illachishshino yaano silxaanenna maccare ikka hasidhino. Maganu finqille kakkayisinohanna insara halaminoha lowo kume ikkanno manna gudino. (Kir. 16:30-35, 41, 49) Xaa yannarano Yihowa, dirijjitesi widoonni qixxeessino qixxaawo mishshannore giwannoti dihuluullissannote. w24.07 11 guf. 11

Heeꞌnoommohu rooru manni tini busha alame baꞌannota kulle qorowisiinsoonni qorowishsha giwanno hattono qacifatanno yannaraati. (2 Phe. 3:3, 4) Anfoommokkihu batinyu coyi nooha ikkirono, maltino yannara tini busha alame baꞌannotanna Yihowa hatte yannara towaatannonketa addaxxate kaajjado ammana hasiissannonke. Qoleno Yihowa xaa yannara ninke massagate horoonsiꞌranni nooha ‘ammanaminohanna wodanaamo borojjicho’ albinni roore addaxxa hasiissannonke. (Mat. 24:45) Quuxxote qarri hanafanno woyite, heeshsho gatisanno biddishsha uyinankera dandiinanni. Yihowa dirijjite giddo albisa ikkite soqqantannori uyitannonke biddishsha albinni roore ammananna addaxxa hasiissannonke yanna xaati. Xaa yannara insa uyitannonke biddishsha harunsa qarra ikkitannonkeha ikkiro, quuxxote qarri yannara uyitannonke biddishsha harunsineemmo yaa didandiineemmo. w24.09 11 guf. 11-12

Kiristaana ikkitino annuwinna amuuwi Maganoho noonke ammana raggetenni afiꞌnannita ikkitinokkita affino. Galte hosse oosoꞌne aante noo xaꞌmuwa xaꞌmitaꞌnera dandiitanno: ‘Maganu noota mayinni afeemmo? Isi addinta Qullaawu Maxaafi yaannore ammana dandiinanni?’ Isinni Qullaawu Maxaafi ‘woꞌma surrenke’ woy hedate dandoonke horoonsiꞌneemmo gedenna ‘baalanka coye fonqolle laꞌneemmo’ gede amaalannonke. (Rom. 12:1; 1 Tes. 5:21) Ikkina oosoꞌne ammanansa kaajjishidhanno gede kaaꞌla dandiitinannihu hiittoonniiti? Oosoꞌne halaale uminsa buuxidhanno gede jawaachishshensa. Oosoꞌne xaꞌmo xaꞌmitanno woyite, Yihowa Farciꞌraasineta Xiinxallote Kaaꞌlitanno Borro horoonsidhe xaꞌmuwansara dawaro afiꞌra dandiitanno gara leellishshensa. Tenne borrora “Qullaawa Maxaafa” yaanno gafi hunda “Maganu Ayyaaninni Borreessamino” yaannoha laꞌanno gede kultinansara dandiitinanni. Konni gafira Qullaawu Maxaafi mannu borreessinoha dancha maxaafa calla ikkikkinni “Maganu Qaale” ikkinota leellishshanno taje no.—1 Te. 2:13. w24.12 14-15 guf. 4-5

Songote cimeeyye Yesuusi lawishsha haꞌrunsa dandiitannohu hiittoonniiti? Insa labballo roduuwanna wedella, songote giddo albinni roore soqqamate ikkadda ikkitanno gede qajeelsanna kaaꞌla hasiissannonsa. Songote cimeeyye, qajeelsitanno roduuwi guuta ikka hasiissannonsa yite diheddanno. Insa wedellu roduuwi umonsa heeshshi assa, ammanamanna wolootaho uminsa fajjonni soqqama hasiissannonsata huwattanno gede baxillunni amaala hasiissannonsa. (1 Xim. 3:1; 1 Phe. 5:5) Yesuusi rosaanosira sabbakkanno gede calla ikkikkinni rosiissanno gedeno kulinonsa. Rosaanosi konne looso loosate ikkadda ikkitinokkihu gede assite heddinoha ikkara dandaanno. Ikkirono Yesuusi insa konne looso loosa dandiitannota dihuluullamino; qoleno tenne xawise kulinonsa. Insa konne looso loossannota woꞌmunni woꞌma addaxxe togo yiinonsa: “Anniꞌya ane soyie gede, anino kiꞌne soyemmoꞌne.”—Yoh. 20:21. w24.10 16 guf. 15; 17 guf. 17

Daawiti worba mooteeti. Isi muuziiqa ganannoho, gixima woy kiiro borreessannoho, olamaanchohonna masaalaanchoho. Isira lowo fonqoli iillinosi. Daawiti mitu diri geeshsha Moote Saaooliwiinni xooqanni keeshshino. Daawiti moote ikkihu gedensaannino beettisi Abeseloomi gashshootesi adhate woꞌnaali yannara, lubbosi gatisiꞌrate xooqa hasiissinosi. Togoo qarri iillinosihanna umisi laanfe waaddinosiha ikkirono, Daawiti jeefote geeshsha Yihowara ammanaminoha ikkasi leellishino. Yihowa iso ‘giddoꞌya baxxinoho’ yiinosi. Hakko daafira Daawiti amaalino amaale macciishsha hasiissannote! (1 Mot. 15:5) Hanni Daawiti isinni aane moote ikkannoha beettosi Salamooni amaalino amaale laꞌno. Yihowa kuni wedellichi xalala magansiꞌra halashshanno gedenna isi ayirranno gede assannoha qullaawa mine minanno gede doorino. (1 Dud. 22:5) Salamoonira coyi shota diꞌꞌikkannosi. Daawiti isira mayinosi? Daawiti beettisi Yihowara hajajamannoha ikkiro, qinaannosita kulinosi.—1 Mo. 2:2, 3. w24.11 10 guf. 9-11

Minaamasi ganannohu woy xonamanno minaanni, Yihowanna minaamasi ledo noosi jaalooma haaroonsiꞌrate assa hasiissannosiri no. Umihunni, loosino coyi lowo geya busha ikkinota ammane adha hasiissannosi. Yihowa illera goꞌlannohu mittu coyino dino. (Far. 44:21; Ros. 12:14; Ibi. 4:13) Layinkihunni, minaamasi miica aguranna akatasi biddi assiꞌra hasiissannosi. (Law. 28:13) Sayikkihunni, minaamasinna Yihowa maaro xaꞌmiꞌra hasiissannosi. (Soq. 3:19) Qoleno soorrame biddi yaate hasatto heedhannosi gede hattono hedosi, coyiꞌrannorenna assootesi eemadhanno gede kaaꞌlasira Yihowa eeggifate huucciꞌra hasiissannosi. (Far. 51:10-12; 2 Qor. 10:5; Fil. 2:13) Shoolkihunni, baalunku gari finqillenna xono giwa rose huuccattosi ledo sumuu yaannore assa hasiissannosi. (Far. 97:10) Ontihunni, bayichonkonni songote cimeeyye kaaꞌlo xaꞌmiꞌra hasiissannosi. (Yai. 5:14-16) Leekkihunni, albillitte togoo coye assannokki gede mixo fushshiꞌra hasiissannosi. w25.01 11 guf. 14

Dancha elto baala wole agurina, heeshsho uyinohe Magano Yihowa baxatto? Iso baxattota leellisha hasiꞌratto? Tenne assa dandaattoti baalanta roortanno doogo heeshshokki isira sayisse aatenna mannu albaanni wayinni cuuante leellishate. Kuri coyibba Yihowa maate wido ikkatto gede assitannohe. Hakko daafira iimi Annikkinna Jaalikki isiha ikkootto daafira massagannohe hattono towaatannohe. (Far. 73:24; Isa. 43:1, 2) Qoleno heeshshokki Yihowara sayisse aanna cuuama hegere heeshsho hexxo heedhannohe gede assitannohe. (1 Phe. 3:21) Cuuamate hobbi ruxxi yaatto gede assanni noohe coyi no? Hatto ikkiro togoori tuncu yiinohehu ate calla diꞌꞌikkootto. Lowo miliyoone ikkanno manni cuuamate ikkadda ikkate amanyootensanna hedonsa biddi assiꞌra hasiissinonsa. Xa kuni manni Yihowara hagiirrunni diinaggaawe soqqamanni no. w25.03 2 guf. 1-2

Qullaawu Maxaafi giddo duucha hinge cubbu lowo duhi gede ikkinota kulloonni. Moote Daawiti cubbisi daafira togo yiino: “Cubbiꞌya lolahu gede egemminoe; lowo duhi gede ayirrinoe.” (Far. 38:4) Kayinni Yihowa maaro eꞌannori cubbo aguranno. (Far. 25:18; 32:5) ‘Agura’ yine tirroonnihu Ibiraawootu afii qaali, “kayisa” woy “duha” yitanno tiro afiꞌrinoho. Yihowa lawishshu yaattonni cubbinke duha qotinke aaninni kayise duqqannohu jawaatu manchi gede assine heda dandiineemmo. Yihowa cubbonke ninkewiinni mageeshshi geeshsha fafisannoro kulate wole lawishshano kulloonni. Faarso 103:12 “Soojjaati galchimiwiinni fafinohu geeshsha, Kaaliiqi ninkewiinni cubbonke fafisanno” yitanno. Soojjaati galchimiwiinni lowo geeshsha fafanno. Lamunku ragi horonta dixaadanno. Wole yaattonni Yihowa cubbonke hendeemmohunni aleenni ninkewiinni fafisanno. Tini Yihowa woꞌmunni woꞌma gatona yaannonketa buuxissannote! w25.02 9 guf. 5-6

Yesuusi iimira haꞌrihu gedensaanni, soqqamaasinchu Pheexiroosi ilamihunni kayise laanshawinoha mitto mancho hurse maalale loosino. (Soq. 1:8, 9; 3:2, 6-8) Tenne maalale laꞌꞌara batinyu manni Pheexiroosiwa timbiliqqi yee dayino. (Soq. 3:11) Pheexiroosi maccaha ikkanna silxaane lowori gede asse laꞌꞌanno dagoomi giddo lophinoha ikkino daafira, ayirrinye uyinasira hasiꞌrinoni? Dihasiꞌrino. Pheexiroosi umosi heeshshi asse hasiisanno ayirrinye Yihowaranna Yesuusira uyino. Isi togo yiino: “Yesuusi suꞌminninna suꞌmisira noonke ammananni laꞌinannihunna affinoonnihu kuni manchi jawaatino.” (Soq. 3:12-16) Pheexiroosi lawishsha haꞌrunsine umo heeshshi assineemmore ikka dandiineemmo. Wolootaho danchare assineemmohu Yihowanna manna banxeemmo daafiraati ikkinnina naandankera yine diꞌꞌikkino. Assineemmore wolootu huwatturono huwata hooggurono, dandiinummo doogonni Yihowaranna roduuwinkera hagiirrunni soqqammeemmoha ikkiro, addinta umo heeshshi assineemmore ikkinoommota leellinsheemmo.—Mat. 6:1-4. w25.03 10-11 guf. 11-12

Yihowaranna mannaho noonke baxille illachinshe albinni roore diinaggaambe soqqama dandiineemmo. (Mat. 22:37-39) Hanni Yihowa konne looso loonsanna laꞌꞌanno woyitenna mannu Qullaawa Maxaafa xiinxalla hanafanna laꞌꞌanno woyite mageeshshi geeshsha hagiidhannoro hedi! Kulleemmonsa sokka macciishshe adhanno manni albillitte afiꞌranno gatono hedi. (Yoh. 6:40) Mininni fula qarra ikkitannohe gede assanno coyi tuncu yiinohe? Hatto ikkiro, Yihowaranna mannaho noohe baxille leellishate maa assa dandaattoro hedi. Koroonu fayya yannara Saamueelinna Daaniya mininni fula didandiino. Hattenne qarru yannara insa ganye silketenninna borrote sokka borreesse farciꞌrino; hattono Zuumetenni Qullaawa Maxaafa xiinxallisino. Saamueelinna Daaniya iillinonsa qarrinni kainohunni assa hasiꞌranno geeshshire assa didandiino; kayinni assa dandaannore asse hagiirre afiꞌrino. w24.04 18 guf. 15-16

Hagiirraamma ikkate adhama hasiissannoha ikka hoogirono, batinyu adhaminokki Kiristaani wedelluno jajjabbuno adhama hasiꞌranno. Hige baxillu jaalooma amadattora albaanni maalaamittetenni qixxaawa, ayyaanaamittetenni gikki yaanna anja egemma hasiissannohe. (1 Qor. 7:36) Galte ikkitahera hasiꞌratto beettora hiittoo akatta heedhasera hasiꞌrattoro balaxxe heda hasiissannohe. Hatto ikka hoogiro atera maltino galte lashshi assite agurattora woy atera maltinokki beetto ledo baxillu jaalooma amadattora dandaatto. Hige maltino galte ikkitanno beetto cuuantino Kiristaancho ikka hasiissannose. (1 Qor. 7:39) Kayinni cuuantino rodoo baala dancha galte ikkitanno yaa diꞌꞌikkino. Hakko daafira ateneeto togo yite xaꞌmi: ‘Albillitte hiittoo heeshsho heeꞌra hasiꞌreemmo? Minaamaꞌya ikkitanno beettora heedhasera hasiꞌreemmo akatta hiittenneeti? Hedoommo coyi quwa sainoho? Quwa saeemmokkiha ikka dandeemmo?’ w24.05 20 guf. 1; 21 guf. 3

Baxillu jaalooma amaddine sayissinanni yannara, sae sae mereeroꞌne kalaqamino qarra tira dandiitinannihu hiittoonniiti? Tini baxillu jaaloomiꞌne qarra afiꞌrinota leellishshannoni? Deeꞌni; adhantinori baalunku woꞌmanka woyite afoo mitto ikkitanno yaa diꞌꞌikkino. Minaanninna minaama mereeronsa kalaqamino qarra hasaawe tira dandiiro adhamansa kaajjado ikkitanno. Hakko daafira mereeroꞌne kalaqamino qarra tirate xa assitinanniri adhamaꞌne seekkannoronna teꞌee leellishanno. Kiꞌneneeto togo yitine xaꞌme: ‘Kalaqamino qarra wodanaaꞌmine hattono mimmito ayirrinseemmota leellishanno garinni hasaambeemmo? Soꞌronke ammanne adhineemmo? Hattono biddi assiꞌra hasiissannonkere biddi assiꞌrate sharrammeemmo? Maahoyye yaate, maaro xaꞌmiꞌratenna gatona yaate qixxaamboommoreeti?’ (Efe. 4:31) Ikkirono woꞌmanka woyite sumuu yitinannikkiha woy heewisantinanniha ikkiro, adhantinihu gedensaannino coyi woyyaawa hoogara dandaanno. Baxillu jaalooma amaddinoonni manchi kiꞌnera malinokkiha ikkinota wodanchitiniro, jaaloomaꞌne aguraꞌne lamunkura woyyanno. w24.05 29 guf. 12

Gara ikkinore assate mitte giddore ikkineemmohanna mitto coye doodhineemmo woyite Qullaawu Maxaafiha xintu seera harunsineemmoha ikkiro, wolootaho dancha lawishsha ikkineemmo. Qullaawa Maxaafa xiinxallineemmohanna ammananke kaajjishiꞌneemmoha ikkiro, Yihowaranna biddishshisira ammanammoommore ikkineemmo. Kaphu rosonna Yihowate ledo sumuu yitannokki hedo bande anfeemmo; hattono togoo coyinni didogammeemmo. (Efe. 4:14; Yai. 1:6-8) Qoleno qarru iillanni noonsare kaaꞌla dandiineemmo. Songote cimeeyye jilba saꞌannokkire, umonsa qeeꞌlitannorenna amanyoote agadhitannore ikka hasiissannonsa. Kuri labballi woloota ‘kaajjitanno gede’ kaaꞌlitanno. (Tit. 1:9; 1 Xim. 3:1-3) Songote cimeeyye halashshaanote dancha lawishsha ikkitenna insa towaatte, ganyite gambooshshe dagganno gede, soqqansho fultanno gedenna hojju xiinxallo assidhanno gede kaaꞌlitannonsa. Ammanate roduuwinsara qarru iillanno woyite songote cimeeyye, woꞌmanka woyite Yihowanna isi uyino hexxo illachishshanno gede insa kaaꞌla dandiitanno. w24.06 31 guf. 16-18

Yesuusi uullate aana soqqami yannara, mannaho Annisi maaro daafira rosiisino. Hanni qaetenni fule baino beetti daafira kulanno lawishsha laꞌno. Kuni wedellichi mite yanna geeshsha cubbu doogo haꞌra doodhino. Ikkirono “wodanisi raga higita” annisi qae higino. Annisi ma assiyya? Yesuusi, “Annisino isi xeertote heeꞌreenna lai; . . . hakkiinni dodanni mare hanqafe kimmi asse sunqisi” yiino. Beettu annisira soqqamaancho ikka dandaannoronna teꞌee xaꞌmiꞌrara hedino; annisi kayinni “beettiꞌya” yiinosi hattono galagale maatesiwa higanno gede assinosi. Annu, “Kuni beetti bainohu leellino” yiino. (Luq. 15:11-32) Yesuusi uullara daara albaanni iima heeꞌre, Annisi cubbo loosinoha batinye manna konni garinni gatona yaanna lainoti dihuluullissannote. Yesuusi coyiꞌrinohu kuni lawishshi sheshifachishannoho; hattono Anninke Yihowa maarote dureessa ikkinota leellishannoho! w24.08 11 guf. 11-12

Geino wodani noosi manchi Yihowa hedo ledo sumuu yaannoha dancha doorsha doodhate dandiire baala assanno. Togoo Kiristaanchi heeshshosi giddo Yihowa ledo noosi jaalooma saꞌꞌannori nookkita afino. Umisira gara ikkitino lao noosi hattono baalankare afinohu gede asse dihedanno. Qoleno duucha woyite umosi heeshshi asse Yihowa huucciꞌre iso addaxxannota leellishanno. Noonke dandoo ikkitutano ikkituro woꞌmanka woyite Yihowa huucciꞌra hasiissannonketa anfoommo. Hakko daafira roorenkanni shaaꞌꞌa ikkinokki doorsha doodhineemmo woyite Yihowa ninkera woyyannore afinota addaxxine massagannonke gede iso huucciꞌno. Yihowa isi akatta leellisha dandiineemmo gede asse kalaqinonke daafira lowo geeshsha galaxxineemmosi. (Kal. 1:26) Hige Yihowa lawishsha guutu garinni haꞌrunsa didandiineemmo.—Isa. 55:9. w25.03 11 guf. 13; 13 guf. 17-18

Wolootu digalattannoreeti yitine heddinoonte. Wolootu assinoommorira galata hooggunkero ninkeneeto togo yine xaꞌma dandiineemmo: ‘Insa addinta digalattannoreetinso galata hasiissannonsata deꞌino daafiraati?’ Insa galattannonkekki gede assinonsahu wolu korkaatino heeꞌrara dandaanno. Mitootu lowo geeshsha hagiidhitinoha ikkirono mayite galattannoro afa qarra ikkitinonsaha ikkara dandaanno. Hakko iso konni albaanni woloota kaaꞌlitannore ikkituro, xa kaaꞌlinoonninsa daafira saalfattinoha ikkara dandaanno. Insa galattannokki gede assinonsa coyi ikkihano ikkiro, roduuwinkera noonke baxilli insa digalattannoreeti yine hendeemmokki gedenna woꞌmanka woyite uyine afiꞌnanni hagiirre illachinsheemmo gede assannonke. (Efe. 4:2) Cincitinannire ikke. Aate daafira hayyichu Moote Salamooni togo yee borreessino: “Sagalekki wayi aana tugi; lowo barri gedensaanni, galagalchite afiꞌrattona.” (Ros. 11:1) Kuni qummeeshshi kulanno garinni mitu manni assinoommonsarira galatannonkehu “lowo barri gedensaanni” ikkara dandaanno. w24.09 30 guf. 18-19

Mito woyite, mitto mancho seejjinoonnita songote egensiishsha kullanni. Togoo woyite kuni manchi maaro einotanna busha assootesi agurinota anfoommo daafira isiwa aana diagurreemmo. Isi xaano songote miilaati; hattono ammanate roduuwisiwa aane jawaante afiꞌra hasiissannosi. (Ibi. 10:24, 25) Kayinni songotenni fushshinoonni mancho horonta hakko garinni dilaꞌneemmo. Togoo manchi ledo ‘diaanneemmo woy ledosi sagale nafa diꞌꞌinteemmo.’ (1 Qor. 5:11) Ikkina songotenni fushshinoonni mancho horo fiile hoolleemmo yaateni? Hatto yaa diꞌꞌikkino. Isi ledo aanneemmokkiti egennantinote. Kayinni halashshaano Qullaawu Maxaafinni qajeelino tiiꞌꞌinsa kulannonsa garinni, songotenni fushshinoonni mancho gambooshsheho koyissannoronna teꞌee doodha dandiitanno; kuni manchi fiixansa woy bashshora jaalansa ikkara dandaanno. w24.08 30 guf. 13-14.