GUWUURSHA C
Hegerera Hagiidhitanni Heeꞌra Dandaatto! Yitanno Borronni Qullaawa Maxaafa Xiinxallisa
Hegerera Hagiidhitanni Heeꞌra Dandaatto! yitanno borro, roduuwu huuccatto assidhe lowore xiinxallite qixxeessitino. Tenne borro seekke horoonsiꞌrate, Qullaawa Maxaafa xiinxallissinanni woyite konni woroonni noo hayyo harunse.
Xiinxallissinara albaanni
1. Seekkitine qixxaabbe. Qixxaabbinanni woyite, rosaanchiꞌnera hasiisannore, heeshshosi garanna mayyee ammanannoro hedde. Huwatate woy loosu aana hosiisate roore qarrisasira dandaanno roso hedate woꞌnaalle. “Egenno Lexxi” yaanno gafi rosaanchiꞌnera kaaꞌlasira dandaanno gara hedde; qoleno xiinxallissinanni woyite hasiisiro horoonsiꞌra dandiitinanni gede qixxaabbe.
Xiinxallote yannara
2. Rosaanchu gimbi yaa hoogi geeshsha, huuccattotenni hanaffine huuccattonni gumulle.
3. Lowore coyidhinannikki gede qorophe. Shiqino roso illachishshe; hattono rosaanchu hedosi coyiꞌranno gede asse.
4. Haaro gafa hanaffinanni woyite, qara hedo yaannoha nabbabbe; hattono rosu birxichuwa giddonni mite luphi asse.
5. Gafa woꞌma guddinanni woyite, rosaanchu rosino halaale qaaganno gede kaaꞌlate gafu xaphishsha horoonsidhe.
6. Mitto mittonka roso xiinxallissinanni woyite:
Borro nabbabbe.
“Nabbawi” yaanno biddishsha worroonni qummeeshshuwa baalanta nabbabbe.
Hasiisannoha ikkiro, hakko noota wole qummeeshshuwano nabbabbe.
“Laꞌe” yinoonni viidiyubba baala laꞌe (nooꞌneha ikkiro).
Mitte mittenta xaꞌmo rosaancho xaꞌme.
Rosaanchu “Ledde Xiinxalli” yaanno gafira noo misilla laꞌꞌanno gede koyissine, xawisanno gede xaꞌme.
Rosaanchu ayyaanaamittete lophosi noo deerra layiꞌranno gede kaaꞌlate, “Mixo” yaanno gafa horoonsidhe. Lawishsha ikkitara worroonni mixo wonshiꞌrate sharramanno gede, woy wole mixo fushshiꞌranno gede woy lamenta harunsanno gede jawaachisha dandiitinanni.
Rosaanchu xiinxallote qixxaawi woyite, “Egenno Lexxi” yaanno gafira noo birxichuwa woy viidiyubba giddo roore baxinoti hiitteetiro xaꞌme.
Mitto roso mitte higgine xiinxallissine gudate woꞌnaalle.
Xiinxallote gedensaanni
7. Rosaanchiꞌne daafira heda agurtinoonte. Assannore Yihowa maassiꞌrannosi gedenna iso kaaꞌlitinanni gara affinanni gede kiꞌnerano hayyo aannoꞌne gede huuccidhe.