‘Mangistekki Daggo’

Yihowa togo yee qaale eino: ‘Xaate wiꞌla, xisso, dhbbunna reyo diheedhanno. Mannu albinni hindiiddo baala feyemmo. Alba ikkinoha busha coye baala hambanni.’

Yihowa Addaaminna Heewani keerunni hagiidhanni heeꞌranno gede Edenete kaashshu basera worinonsa. Insa iimi Annansa magansiꞌranna ooso ilte uulla woꞌmitanno gede assa hasiissinonsa. Addaaminna Heewani Yihowara hajajama giwino; ikkirono, Yihowa hedinore diagurino. Konni maxaafira, Yihowa coyiꞌrinori baalu woꞌmannota ronsoommo. Isi Abirihaamira qaale eino garinni, Mangistesi uullate atoote abbitanno.

Mulenni, Sheexaanu, agaanintesinna bushu manni baalu baꞌꞌanno. Mannu baalu Yihowa magansiꞌranno. Hatte yannara dixiwammeemmo woy direyineemmo. Barru baala gonxoommowiinni hagiidhinanni kaꞌneemmo. Uulla gannate ikkitanno. Manna baalaho dancha sagalenna danchu mini heeꞌrannonsa. Mannu finqilanna busha ikka agure, shaqqado ikkanno. Moyichu ninke diwaajjanno, ninkeno insa diwaajjineemmo.

Yihowa reyino manna kayisanno woyite hagiirru woꞌmanno. Abeeli, Nohi, Abirihaami, Saara, Muse, Ruuti, Asteeri, Daawitinna wolu alba reyino manninni xaandeemmo. Insa ninke ledo uulla gannate assitanno. Hatte yannara lowohu hagiirsiisanno loosi heeꞌranno.

Yihowa ati hakko heeꞌrattora hasiꞌranno. Hatte yannara Isi daafira albinni roore afatto. Konni daafira, xaano ikko hegere geeshsha barru baala Yihowawa shiqqi yino!