Yohaannisi Laino Ajuuja

Soqqamaasinchu Yohaannisi Fiximo yinanni giddichora usurame heeꞌreenna, Yesuusi albillitte ikkannore kultannota 16 ajuuja leellishinosi. Tini ajuuja, Yihowa suꞌmi qullaawanno gara, Mangistesi dagganno garanna, iima woꞌmitino fajjosi uullate aana woꞌmitanno gara kultannote.

Yohaannisi ajuujatenni iima noota Yihowata ayirrado zuufaane laino; Iso waajjo uddano uddidhinorinna umoho culkunni loonsoonni baꞌlatto wodhitinori 24 geerri doyissite no. Zuufaanetenni belequnna banqote huuro fultanno. Qoleno 24 geerri Yihowa albaanni kumbuultanni Iso magansidhanni no. Yohaannisi wole ajuujanni, Yihowa magansiꞌrannoha, baalante gaꞌrenninna daganni gamba yiinohanna addi addi qaale coyiꞌrannoha lowo manna laino. Insa Geꞌrechu yaano Yesuusi allaalannonsa; hattono heeshshote wayiwa massannonsa. Yannate gedensaanni, wole ajuujanni Yesuusi 24 geerri ledo iima Moote ikke gashshanna laino. Aantanno ajuujara Yohaannisi, Yesuusi dhudhuufa yaano Sheexaane, hattono agaanintesi qeelanna laino. Yesuusi insa iiminni uullara tugino.

Hakkiinni Yohaannisi, Geꞌrechunna doorantinori 144,000 Tsiyooni Ilaalira uurrite noore laino. Qoleno isi, mittu sokkaasinchi mannu Magano waajjannonna Iso ayirrisanno gede kulanni uullate qooxeessira buuwanna laino.

Aantanno ajuujara, Armaagedooni yinanni ola laino. Hakkunni oli yannara, Yesuusinna olantosi Sheexaanunnita busha alame qeeltanno. Jeefote ajuujara, Yohaannisi iimano uullano salaame noota laino. Sheexaanunna sirchisi woꞌmunni woꞌma baino. Iimanna uulla heeꞌrannohu baalu Yihowa suꞌmi qullaawanno gede assanno, hattono Iso calla magansiꞌranno.