Aliidi Bisi Soyino Sokka
Muxxe ammanate rodoonke:
Afittonte gede, Qullaawu Maxaafi roore anga mannu daafira kulanno. Qullaawu Maxaafi giddo kulloonnihu batinyu manni ammanaminohonna ninkera iillinohu gedee qarri iillinoho. Insa “ninkete gedee hedo” noonsareeti. (Yaaqoobi 5:17) Mitootu lowo qarrinna yaachishanno coyi iillinonsareeti. Woloota kayinni maatete miillansa woy ammanate roduuwinsa baasa dadillissinonsa. Mitootu qolte insa uminsa loossino soꞌronni quwa saꞌe insaneeto bushiishshino.
Insa giddo mitoota togoo coyibba Yihowawiinni xeertissinonsa. Ikkina insa Yihowa horo agurtinoni? Diagurtino. Insa giddo batinyu togo yee huucciꞌrino faarsaanchi gede ikkitino: “Baꞌino geꞌrecho gede ikke raataawummo. Soqqamaanchokki hasi; hajajokki dihawoommona.” (Faarso 119:176) Atera togoo hedo macciishshantannohe?
Yihowa hoshshatewiinni baxxite baꞌino soqqamaanosi horonta dihawanno. Hatteentenni insa kaaꞌlate kaꞌꞌanno; tenne assannohu roore wote ammanate roduuwinsa widoonniiti. Hanni Yihowa haammatu buutote qarri, lawishshaho miinju qarri, shiironna buutote dhibbi amadinosiha soqqamaanchosi Iyyoobi kaaꞌlino gara hedi. Woleteemmero iso kaaꞌla hasiissannonsa mannooti coyidhino coyino xissiisinosi. Isira shiima yanna hedosi gara ikkitinokkiha ikkirono Yihowara badhe diwodhino. (Iyyoobi 1:22; 2:10) Yihowa Iyyoobi hedosi biddi assiꞌranno gede kaaꞌlinosihu hiittoonniiti?
Yihowa Iyyoobi kaaꞌlinoti mitte doogo Eelihu yinannihu ammanate rodiisi widoonniiti. Iyyoobi dhiwinosire hasaaphi yannara, Eelihu macciishshinosi; coyiꞌrinohu hakkuyi gedensaanniiti. Eelihu Iyyoobi coyishiishi wote mayino? Iyyoobi boroorinoni? Woy iso kaaꞌlate yee assikki gatinore kule saalfatanno gede assinoni? Eelihu isonooto Iyyoobi roorinohu gede asse lainoni? Isi horonta hatto diassino! Eelihu Maganu ayyaaninni togo yiino: “Halaalaanchu Magani albaanni anino ate gedeenkolla; anino loosamoommohu dorunniiti.” Hakkiinnino isi Iyyoobi togo yee jawaachishino: “Ane waajjite masa dihasiissannohe; qoleno ani coyiꞌreemmori duha ikkoonkehe.” (Iyyoobi 33:6, 7) Eelihu Iyyoobira duha ledinoha ikkikkinni, hasiissannosi amaale baxillunni uyinosi; hattono jawaachishinosi.
Ninkeno tenne biroshere qixxeessinoommohu tenne hedonni kaꞌneeti. Balanxe, halaalu mininni xeertiꞌrinohu lowo roduuwi yaannore shinqe macciishshinoommo, noo garanna hedonsano huwatate woꞌnaalloommo. (Lawishsha 18:13) Hakkiinnino Qullaawa Borro seekkine xiinxallinummo; qoleno huuccatto assiꞌne, Yihowa hundi yannara togoo qarri iillinonsa soqqamaanosi kaaꞌlinohu hiittoonniitiro laꞌnoommo. Hakkuyi gedensaanni Qullaawu Maxaafi giddo kulloonni xaggenna yannanke woꞌnaalsha gamba assine tenne biroshere qixxeessinoommo. Ballo tenne biroshere seekkite nabbawi. Lowo geeshsha banxeemmoheta huwati.
Yihowa Farciꞌraasinehu Aliidi Bisi