Lowonta Qullaawa Ikkitino Ammanakki Jawaachchishiꞌri

1, 2. Xa hiikkoye hintsa ganabbaidhanni nootto? Loosikki isilancho ikka hasiissannosihu mayiraati?

XA HANNI mitto hintsa ganabbaidhanni helli buufi yitanni nootto gede assite hedi. Konne hintsa jammarittonku lowo yanna saꞌinoha ikkirono xaano albillittete loosattori lowori gate no. Kageeshsha loosootto loosi daafursannoha ikkirono, hagiirsiisannoho. Baxirino dayiro hexxo mudhe konne looso diagureemmo woyi diceeꞌmeemmo yite murcidhe kaootto; korkaatuno loosikki isilancho ikkasi woyi hoogasi xaatera ikko konni kaꞌi heeshshokki aana abbitannori noota afootto. Togo yineemmohu mayiraati? Ganabbaidhanni nootto hintsi ate umokki ikkootto daafiraati!

² Yesuusi rosaanchi Yihuda ninkeneeto ganabbaiꞌra hasiissannonketa duure coyiꞌrino. Isi, “Maganu baxillinni fultinikki heedhe” yee Kiristaana amaali wote, hatto assate kaaꞌlannore hattee sokkasinkura kulino. Togo yiino: “Lowonta qullaawa ikkitino ammanaꞌnenni kiꞌneneeto [ganabbaidhe].” (Yihuda 20, 21, NW) Maganu baxillinni fulittokki heeꞌra dandaatto gede, ateneeto ganabbaiꞌranna ammanakki jawaachchishiꞌra dandaattoti mite doogga hiikkuriiti? Xa hanni ateneeto ayyaanaamittetenni ganabbaiꞌra hasiissannoheha sase raga laꞌno.

YIHOWAHU XALALU SEERI AANA NOOHE AMMANA JAWAACHCHISHIꞌRI

3-5. (a) Sheexaanu Yihowa seera ma garinni laꞌꞌattora hasiꞌranno? (b) Maganu seera ma garinni laꞌꞌa hasiissannonke? Tinino hiittoo simmeete heedhannonke gede assitanno? Lawishshunni kuli.

³ Umihunni Maganu higge aana noonke ammana jawaachchishiꞌra hasiissannonke. Konne maxaafa xiinxallakkinni amanynyoote lainohunni Yihowa fushshinoha batinynye xalala seera afootto. Yihowa seera ma garinni laꞌꞌatto? Sheexaanu, Yihowa higge, xintu seerinna biddishshisi danchare hoolannohanna coqqonannoha ikkino gede assite laꞌꞌattora hasiꞌranno. Tini hayyosi biꞌre Edenete loossunku jammare horoonsiꞌranni keeshshino. (Kalaqo 3:1-6) Tini hayyosi ate aana loossakka? Loossanno woyi loossannokki gede assitannoti ate laooti.

⁴ Lawishshaho, mitte biifado paarke giddo daaꞌꞌattanni heedhe, paarkete giddo lowo huxxinni huxxine bande worroonni base laitto yino. Tini bande huxxinoonni base lowonta baxissannote. Umi qara huxxu laꞌꞌatto wote, mulla haafa yine ate qarrisate huxxinoonniha lawahera dandaanno. Kayinni huxxa giddoogisse laꞌꞌatto wote, mittu waajjishanno doobbiichchi egemmannoha duganni ate wido hige daanni noota huwatitto! Kuni huxxi ate gawajjotenni gatisate yine huxxinoonniha ikkinota xa wodanchitto. Ikkina xa ate egemmahera duganni noo moyichchi nooni? Maganu Qaali togo yee qorowisiisanno: “Bikkunni woy[i] adawunni heedhe; baqqino yiiyye! Hakkuno mayiraati? Diiniꞌne Sheexaanu egemmannoha hasiꞌranni ittananno doobbi[i]chchi gede qacceꞌnera doyanni no.”—1 Pheexiroosi 5:8.

⁵ Sheexaanu bushahonna kaajjado ugaaxaanchooti. Yihowa, Sheexaanu ugaaxe egemmankera hasiꞌrannokki daafira konni bushu ugaaxaanchite batinynye “xagarrote hayyonni” ganteemmo gede higge uyinonke. (Efesooni 6:11, NW) Konni daafira Maganu higge hiincinummo kiiro, tini higge iimi Anninke baxannonketa leellishshannota ikkitino gede assine laꞌꞌa hasiissannonke. Maganu higguwa konni garinni laꞌneemmoha ikkiro, qarrunni agartannonke; hattono hagiirre abbitannonke. Yesuusi rosaanchi Yaaqoobi togo yee borreessino: ‘Keere fushshannoha woꞌma seera lae isinni kaajjannohu, [hattono] macciishshe loosu aana hosiisanno manchi loosisinni maassaminoho [“hagiirraamoho,” NW].’—Yaaqoobi 1:25.

6. Maganunnita xalala higguwanna xintu seerasi roore addaxxate assa hasiissannonkehu qaru coyi maati? Lawishsha kuli.

⁶ Higge aannonke Maganonna higguwasira noo hayyo roore addaxxinanni haꞌra hasiꞌnummoro, assa hasiissannonkehu qaru coyi Maganu hajajo garinni heeꞌrate. Lawishshaho “K[i]ristoosi hajajo,” isi ‘hajajinonkere duuchcha’ wolootaho rosiisano mitteenni xaphphi assite amaddinote. (Galatiya 6:2; Maatewoosi 28:19, 20) Qoleno Kiristaanu, Magano magansiꞌratenna mimmito jawaachchishate mitteenni gamba yaanno gede uyinoonni hajajono kaffi asse laꞌꞌanno. (Ibiraawuyaani 10:24, 25) Ganynyine Yihowa giddonkenni huucciꞌneemmo gede uyinoonninke amaaleno Maganu hajajo widira kiirantanno. (Maatewoosi 6:5-8; 1 Teselonqe 5:17) Kuri hajajubba agadhine heeꞌneemmoha ikkiro, Maganu hajajo baxillu noo biddishsha ikkitinota roore huwanteemmo. Maganu hajajo ayirrisanke, qarru woꞌminote tenne alame giddo horonta afiꞌneemmokki harshammonna hagiirre uyitannonke. Maganu higge ledo sumuu yite heeꞌrakkinni afiꞌrootto atoote heeshshi gotti assite hedattoha ikkiro, kuri higguwara noohe ammana dilexxitanno?

7, 8. Diru lexxanni haꞌri kiiro xalala ikkinore assanni heeꞌra dandaammokka yee waajjanno manna Maganu Qaali jawaachchishannohu hiittoonniiti?

⁷ Mitu manni diru lexxanni haꞌri kiiro Yihowa higguwa agadhe heeꞌra lowonta kabbaade ikkitanno yee yaadanno. Kuni manni, dandaa hoonge Maganu higge diingammokka yee waajjanno. Togoori macciishshamannoheha ikkiro, ayeewoteno tenne xiqise qaagi: “Ani Yihowa, horoomannohere rosiiseemmohe, hattono haꞌra hasiissannohe doogo qole marraeemmohe Maganokkiiti. Hajajubbaꞌya ille worte agadhoottoro, keerikki lagu gede ikkannonka; xalallekkino baaru dambali gede ikkitannonka!” (Isayyaasi 48:17, 18) Tini xiqise mageeshshi geeshsha jawaachchishshannotero heeshshi gotti assite hedde egennootto?

⁸ Yihowa tenne xiqise aana isira hajajamanke ninkera xaqqantannota kulinonke. Isi hajajammummosiro lame atoote aankera qaale eino. Umihunni, keerinke lagu gede ikkanno; yaano qaxaꞌa yiinoha, batiꞌrinohanna goofannokkiha ikkanno yaate. Layinkihunni, xalallenke baaru dambali gede ikkitanno. Wayi gama marte dambalu mimmitu hoodenni taikki haꞌranno gara laittoro, hatto ikkanni hegerera heeꞌrannota huwatatto. Dambalu mimmituwiinni taikki diro woꞌma haꞌranni wayi qaccera mare gaꞌnanno. Yihowa, xalalleꞌne hattoota ikkitanno yiino; wole yaattonni dancha ikkinore assitinanni heedhinanni yaasiiti. Yihowara ammanamoottoha ikkate sharro assattoha ikkiro, isi horonta ditugannohe! (Faarso 55:22) Isi einohu kuni hagiirsiisanno qaali, isonna xalala seerasi bashshonni roore addaxxatto gede diassannohe?

‘GIKKI YAATE WIDIRA HIGGE HAꞌRI’

9, 10. (a) Ayyaanaamittetenni gikki yaa Kiristaanaho kaajja giwe ikkitinohu mayiraati? (b) Mitto coye ayyaanaamittete illenni laꞌꞌa hagiirre afiꞌrate kaaꞌlitannonkehu hiittoonniiti?

⁹ Ateneeto ganabbaiꞌrattoha layinki raga, tenne xiqise aana kulloonni: “Gikki yaate widira hinge haꞌno.” (Ibiraawuyaani 6:1, NW) Gikki yaa mittu Kiristaanchira kaajja giweeti. Xa guuta ikka dandiineemmokkiha ikkirono, gikki yaa kayinni dandiineemmo. Qoleno Kiristaanu ayyaanaamittetenni gikki yiiro, Yihowara soqqama roore hagiirsiissannonsa. Mayira?

¹⁰ Ayyaanaamittetenni gikki yiino Kiristaanchi mitto coye laꞌꞌannohu hakko coye Yihowa laꞌꞌanno garinniiti. (Yohaannisi 4:23) Phaawuloosi togo yee borreessino: “Maalu fajjo garinni heedhannorira surrensa maalaamittete coyi aana illachchishshanno; ayyaanu fajjo garinni heedhannorira kayinni surrensa ayyaanaamittete coyi aana illachchishshanno.” (Roomu Sokka 8:5, NW) Maalaamittete lao noosi manchi umosi baxate widira hige dooanno daafira, xeertise assaawannokki daafira, hattono maalaamittete coyi aana illachchishanno daafira hagiirraamo diꞌꞌikkanno. Ayyaanaamittete lao noosi manchi kayinni hagiirraamu Magani Yihowa aana illachchishanno daafira hagiirraamo ikkanno. Togoo manchi Yihowa hagiirsiisate quqquxamanno; qoleno qarru yannarano hagiidhanno. Mayira? Qarru, Sheexaanu kaphphaancho ikkinota buuxisatenna coꞌiima uurrinsha afiꞌne iimi Annanke tashshi assate faro fanannonke daafiraati.—Lawishsha 27:11; Yaaqoobi 1:2, 3.

11, 12. (a) ‘Wodanchate dandoonke’ lainohunni Phaawuloosi mayyiino? “Qajeelsiꞌra” yine tirroonni qaali mayi tiro afiꞌrino? (b) Mittu ispoortanynyi bisisi gikki yaanno gedenna hasiꞌri gede milli yaannoha ikkanno gede hiittoo qajeelshi hasiisannosi?

¹¹ Mittu Kiristaanchira ayyaanaame lao heedhannosihu isonooto qajeelsiꞌrirooti. Hanni tenne xiqise wodanchi: “Kaajjado sagale hasiissannohu danchanna busha badate, wodanchate dandoonsa seekkite horoonsidhe qajeelsidhinorira gikki yitino mannootiraati.” (Ibiraawuyaani 5:14, NW) Phaawuloosi wodanchate dandoonke ‘qajeelsiꞌra’ yee coyiꞌri wote horoonsiꞌrino qaali, umi xibbii dirira Girikete gobbara jiminaastike yinanni ispoortera horoonsiꞌnanni qaale ikkikki digatino; korkaatuno kuni qaali, ‘jiminaastikete ispoortanynyi gede qajeela’ yitanno tiro afiꞌrino.a Meessaneeto konni ispoortanynyi gede qajeelsiꞌra yaa mayyaatero hanni hedi.

¹² Ilammummo wote bisinke qajeelinoha diꞌꞌikkino. Lawishshaho, danqu qaaqqi lekkasinna angasi noo raga diafino. Konni daafira mito wote angasi kai gede milli assiꞌranni albasi gaꞌne raaranno. Yannate gedensaanni angasinna lekkasi milli assiꞌranno gara rosanno daafira, bisisi qajeelanno. Umo bodhanno, yannate gedensaanni qaafanno, hakkiinnino dodanno.b Jiminaastikete ispoortanynyina? Mittu ispoortanynyi maalaꞌlisanno garinni ayyarete aana galchamanna, hattono hasiꞌri gede eramanna laittoro, tenne ispoorte loosate bisosi lowo yanna qajeelsiꞌranni keeshshinota mittoreno dihuluullamatto. Kuni ispoortanynyi tenne dandoo afiꞌrinohu mittore assikki hawa gede diꞌꞌikkino; bisosi qajeelsiꞌranni lowo yanna gudino. Qullaawu Maxaafi togoo qajeelshi ‘shiimarella kaaꞌlanno’ yaanno. Wodanchate dandoonke qajeelsiꞌra kayinni lowo waaga afidhino!—1 Ximootewosi 4:8.

13. Wodanchate dandoonke qajeelsiꞌra dandiineemmohu hiittoonniiti?

¹³ Konni maxaafira, wodanchate dandookki qajeelsiꞌrate kaaꞌlannoheha batinynye roso ronsoommo; konni garinni ateneeto qajeelsiꞌrakki ayyaanaamittetenni gikki yoottoha ikkite Yihowara ammanante heeꞌratto gede kaaꞌlitannohe. Mitte wussaane wossaꞌnatto wote, Maganu higgenna xintu seerasi heeshshi gotti assite hedi, hattono huuccatto assiꞌri. Wussaane wossaꞌnatto kiiro, ateneeto togo yite xaꞌmi: ‘Tenne hajo ledo xaado afidhinoti Qullaawu Maxaafi higge woyi xintu seeri hiikkonneeti? Tenne higge woyi xintu seera loosu aana hosiisa dandeemmohu hiittoonniiti? Iimi Anniꞌya hagiidhannohu hiittoo wussaane wossaꞌnummorooti?’ (Lawishsha 3:5, 6; Yaaqoobi 1:5) Tenne baala assaabbe wossaꞌnattoha ikkiro, wodanchate dandookki roore qajeeltanni hadhanno. Togoo qajeelshi ayyaanaamittetenni gikki yootto Kiristaancho ikkatto gedenna hakko garinni heeꞌratto gede kaaꞌlannohe.

14. Ayyaanaamittetenni lophphate hiittoo halcho heedhankera hasiisanno? Ikkeennano maa qorophpha hasiissannonke?

¹⁴ Mittu manchi ayyaanaamittetenni gikki yiiro nafa, togoo lophpho uurritannota diꞌꞌikkitino. Lophphinannihu sagale intirooti. Konnira Phaawuloosi togo yiino: “Kaajjado sagale hasiissannohu . . . gikki yitino mannootiraati.” Ammanakki jawaachchishiꞌrate assa hasiissannohehu qaru coyi, ganynyite kaajjado ayyaanaame sagale sagaꞌlate. Rosatto roso mittore gatisittokki loosu aana hosiisattoha ikkiro, hatti hayyote. Qullaawu Maxaafi, “Hayyo bayira coyeeti” yaanno. Konni daafira, Anninke Yihowa kulannonkeha muxxe ikkino halaale afate ayeewoteno lowonta halchanna gooꞌra hasiissannonke. (Lawishsha 4:5-7; 1 Pheexiroosi 2:2) Egennonna Maganu aanno hayyo afiꞌra kayinni naaxxatenna woloota heeshshi asse laꞌꞌate widira massitankera dihasiisanno. Naaxxanna wole laanfe wodaninke giddo kalaqante lophphitannokki gede ninkeneeto ganynyine maramadha hasiissannonke. Phaawuloosi togo yee borreessino: ‘Ammanatenni heedhinoonni gede afate umoꞌne xiinxalle [“maramadhe,” NW], umoꞌneno jiffine laꞌe.’—2 Qorontoosi 13:5.

15. Baxillu ayyaanaamittete lophphora hasiisannoha ikkinohu mayiraati?

¹⁵ Mitto hintsa minne kaꞌnihu gedensaanni nafa, loosu digoofanno. Minnoonni hintsa gatamaranna haaroonsa hasiissanno; qoleno yanna lexxitu kiiro hintsaho wole kifile leda hasiissannoha ikkanno. Ayyaanaamittetenni gikki yaatenna hakko garinni heeꞌrate kaaꞌlannonkehu maati? Tennera qaru coyi baxilleho. Yihowaranna ammanate roduuwinkera noonke baxille lossiꞌnanni haꞌra hasiissannonke. Baxillu hooginkero, egennonkenna loonseemmo loosi baalunku, mittore xaqqantukki mulla luultanno qoonqo gede waagu nookkiha ikkanno. (1 Qorontoosi 13:1-3) Baxillu heeꞌrinkero ayyaanaamittetenni gikki yinanninna lophphinanni haꞌra dandiineemmo.

SURREKKI YIHOWA UYINO HEXXO AANA ILLACHCHISHSHANNO GEDE ASSIꞌRI

16. Sheexaanu ma garinni assaambeemmo gede assankera hasiꞌranno? Tenne gargadhate Yihowa maa uyinonke?

¹⁶ Xa hanni ateneeto ganabbaiꞌrattoha sayikki raga laꞌno. Ateneeto ganabbaidhe Kiristoosiha addu harunsaancho ikkate, assaawatto gara qorophpha hasiissannohe. Tenne alame gashshaanchi Sheexaanu, mannu hexxo mudhanno gede, huluullamanno gedenna, diqinaannoe yee hedanno gede assate fullahinoho. (Efesooni 2:2) Huqu haqqa ite gawajjannonte gede, konni garinni assaawa Kiristaana lowonta gawajjitanno. Yihowa konne huqa gargadhate kaaꞌlannonke massaara uyinonke; hattino hexxote.

17. Maganu Qaali hexxo uyitanno kaaꞌlo lawishshunni kulannohu hiittoonniiti?

¹⁷ Qullaawu Maxaafi, Sheexaanunna alamete ledo olamate hasiisannonkeha haammata ayyaanaamo olu uduunne tittire kulanno. Hakkuyi uduunni giddo mitte umu gulleeti; yaano ‘gatote hexxooti.’ (1 Teselonqe 5:8, NW) Biꞌree waro mittu wottaaddarchi umoho gullee wodhikki olu giddora eiro olu basenni keere fulannokkita afino. Roore wote gullee loonsannihu siwiilunniiti; hakkiinnino giddoonni suufete gaware woyi shaqqado goga eessinanni; gullee diinu olanno fiinxaari wottaaddarchu umo gawajjikki kaate uulla uwanno gede assitanno. Gullee umo gawajjotenni agartannonte gede, hexxono surrekki yaano hedokki agartannohe.

18, 19. Hexxo seekke cuꞌmira lainohunni Yesuusi lawishsha ikkinohu hiittoonniiti? Ninke isi lawishsha harunsa dandiineemmohu hiittoonniiti?

¹⁸ Yesuusi, hexxo seekke cuꞌmira lainohunni dancha lawishsha ikkannonke. Isi uullate aana heeꞌrino heeshshora jeefote hashsha hiittoo qarra dandee sainoro hanni qaagi. Muli jaalisi woxeho yee sayise hirinosi. Wolu kayinni diegennoommo yee kaadinosi. Wolootu kayinni hunte xooqqinosi. Woganesi ikkitino mannooti iso effidhe gibbino daafira, Roomu wottaaddari sute shaannosi gede assate murcidhe kaꞌino. Yesuusira iillino qarri ninkera iillanno qarri baalunkunni roorinoho yaa dandiinanni. Konne baala dandee saꞌꞌanno gede kaaꞌlinosihu maati? Ibiraawuyaani 12:2 togo yitanno: ‘Albira afiꞌranno hagiirrinni kainohunni masqalu [“qarru haqqi,” NW] aana reyote shollinynye mayi geeshshano kiirikki cince, ayirradu Maganu barcimi qiniiteenni ofollino.’ Yesuusi ‘albasiinni noo hagiirre’ horonta deꞌꞌe diegennino.

¹⁹ Hakkawaro Yesuusira albasiinni mayi hagiirri agare noosi? Qarra dandee saꞌꞌasinni Yihowahu qullaawu suꞌmi ayirranno gede assate kaayyo afiꞌrannota afino. Qoleno qarra dandee sairo, Sheexaanu kaphphaancho ikkinota baalunkunni roore buuxisanno. Tenne hexxonni roore Yesuusira hagiirre abbitannoti wole hexxo dino! Ammanaminoha ikkiro Yihowa lowo atoote aannositano afino; yaano Annisi ledo galagale xaadannoti lowonta hagiirsiissanno yanna albasiinni agarte noosita afino. Yesuusi buutote qarri iillisi yannara tenne hagiirsiissanno hexxo wodanisira wodhe no. Ninkeno hatto assa hasiissannonke. Yesuusinte gede, ninkerano albankeenni lowo hagiirri agare noonke. Yihowa mitti mittinkera bayiru suꞌmisi qullaawanno gede assate kaayyo oye ayirrisinonke. Ayee fatani woyi qarri iillinkerono, Yihowa Aliidi Gashshaanchonke assiꞌne doodhatenninna iimi Anninke baxillinni fullummokki heeꞌratenni Sheexaanu kaphphaancho ikkinota buuxisa dandiineemmo.

20. Hexxo mudhattokki gedenna surrekki jawaachchishannore assaabbanno gede assiꞌrate mayi kaaꞌlahera dandaanno?

²⁰ Yihowa ammanantino soqqamaanosi kiisate hedo noosiha calla ikkikkinni hatto assate quqquxamanno. (Isayyaasi 30:18; Milkiyaasi 3:10) Soqqamaanosita gara ikkitino halcho wonshanno wote tashshi yaannosi. (Faarso 37:4) Konni daafira, surrekki Maganu uyino hexxo aana illachchishshanno gede assiꞌri. Sheexaanunniti akkala alame assaabbanno garinni, yaano hexxo mudhatenna diqinaannoe yitanno hedo garinni horonta assaabbooti. Alamete ayyaani surrekkinna wodanikki giddora sununni eanni noota huwatittoro, ‘wodananna hedo agarannoha Maganu keere’ afiꞌrate huuccatto assiꞌri. Maganu aannohu kuni keeri wodanakkinna hedokki agarannohe.—Filiphphisiyusi 4:6, 7.

21, 22. (a) ‘Lowo mannira’ hiitti hagiirsiissanno hexxo noonsa? (b) Kiristaanaho uyinoonni hexxo giddo ate roore quqquxxannoheti hiitteeti? Xa maa assate murcidhe kaootto?

²¹ Heeshshi gotti assite assaawa hasiissannoheti lowonta hagiirsiissanno hexxo noohe! Ati “bayira qarra” qeele saꞌꞌannohu ‘lowo manni’ gaamo ikkoottoha ikkiro, muli yanna giddo hiittoo heeshsho afiꞌrattoro hanni hedi. (Ajuuja 7:9, 14) Sheexaanunna agaaninte uullate aaninni hoꞌlitanno wote, xa afiꞌroottokki harshammo afidhe teesse heeꞌratto. Ninke giddo bunshete widira xixxiiwannohu Sheexaanu nookkiha heeꞌre egenninohu nooni? Isi bunshete widira xixxiiwannonketi gatteenna, uulla gannatete widira soorrate looso loonseemmo wote lowonta tashshi yaannonke! Konne looso loonseemmo wote Yesuusinna ledosi iima mookkannori 144,000 marraꞌannonke. Xiwanunna bisu xeꞌne baalanti hoꞌlitanna laꞌneemmo wote, banxeemmohu reyino manni reyotenni kaeenna daae yineemmo wote, hattono biꞌre Maganu hedino heeshsho afiꞌneemmo wote lowonta tashshi yaannonke! Guuta ikkineemmo wote isinni, roore shillimaate afiꞌneemmo; yaano Roomu Sokka 8:21 (NW) aana qaale eꞌnoonninketa, “Maganu oosota ayirrado wolaphpho” afiꞌneemmo.

²² Yihowa, hedoottohunni aleenni ikkitino wolaphpho afiꞌrattora hasiꞌranno. Togoo wolaphphowa massitannoti kayinni hajajamate. Ikkina Yihowara barru baala hajajamate dandaamannohere baala assa gara dilabbannohe? Hatto ikkiro, Maganu baxillinni fulittokki hegerera heeꞌra dandaatto gede, lowonta qullaawa ikkitino ammanakkinni ateneeto ganabbaiꞌrakki agurtooti!