GAFA 8
Kaphu Ammaꞌnowiinni Xeertidhe Halaalaancho Ammaꞌno Harunsi
1. Yannankera noo manni hiikkuyi lamu coyi giddo mitto doodha hasiissinonsa?
YESUUSI, “Ane widoonni uurrinokkihu baalu taqawwamannoeho” yiino. (Maatewoosi 12:30, NW) Ninke baalinke Yihowa widoo woyi Sheexaanu widoo uurrinoommo. Rooru manni Maganoho garunni soqqamanni noohu gede asse hedanno; Qullaawu Maxaafi kayinni Sheexaanu ‘manna duucha soꞌrisiisanniˈ noota coyiꞌranno. (Ajuuja 12:9) Lowo miliyoone ikkanno manni Maganoho soqqammeemmoreeti yee ammananno; noore coyiꞌniro kayinni kuni manni Sheexaanu Daawuloosira soqqamanni no! Yannankera noo manni, “halaalu Magano” ikkinoha Yihowa magansiꞌratenna “[kaphu] anna” ikkinoha Sheexaane magansiꞌrate giddo mitto doodha hasiissinonsa.—Faarso 31:5; Yohaannisi 8:44.
Kaphu Ammaꞌno Agurte Fuli
2. Sheexaanu mannu Yihowa magansiꞌrannota hoolate woꞌnaalanno doogga giddo mitte hiitteeti?
2 Mittu manchi Yihowara soqqama doodhiro, danchare doodhino; togoo doorshi Magano hagiirsiinseemmore ikkineemmo gede assannonke. Sheexaanu kayinni Maganoho soqqamanno manna baala giwanno; togoo mannira qarranna mitiimma abbanno. Tenne assanno doogga giddo mitte, wolootu qacifattanno woyi taqawwantanno gede assate; wole agurina jaallanna maatete miilla nafa hatto assitanno gede assanno. Yesuusi, “Mannaho mini manni diina ikkanno” yee balaxe coyiꞌrino.—Maatewoosi 10:36.
3. Maatekki woyi jaallakki Magano magansiꞌrattota taqawwanturo ma assatto?
3 Atera hattoori iillihero ma assatto? Batinyu manni ammaꞌnonsa gara ikkitinokkita afe heeꞌrenni, agure fula dihasiꞌranno. Konni mannira hatto assa maatensa kaada labbannonsa. Ikkina hatto yee heda garaho? Maatekki giddo noo manni jallaagishshanno xagga adhanni noota afittoro, hatti xagga goddaassannota dikulattonsa? Qoleno, atino hatte xagga adhite insa ledo buusamattokkiti egennantinote.
4. Iyyaasu Isiraeele mayyee amaalino?
4 Iyyaasu, Isiraeele kaphu ammaꞌno rosonna annuwansa woga agurtanno gede amaalinonsa. Isi togo yiino: “Yihowa waajje, hattono mishsho nookkihanna halaalunni isira soqqamme; qoleno, annuwaꞌne Laga widoonninna Gibitsete gobbara magansidhino maganna huntine Yihowara soqqamme.” (Iyyaasu 24:14) Iyyaasu Maganoho ammaname heeꞌrino; konnira Yihowa maassiꞌrinosi. Yihowara ammanammoommore ikkinummoro, isi ninkeno maassiꞌrannonke.—2 Saamueeli 22:26.
Kaphu Ammaꞌno Ledo Xaado Afiꞌrino Uduunne Huni
5. Digintete ledo xaado afiˈrino uduunne huna hasiissannonkehu mayiraati?
5 Kaphu ammaꞌno agure fulate bashsho noonkeha digintete uduunne, lawishshaho quraama, digintete cuuenna gume, hattono woleno kore lawannore hunano hasiissannonke. Hatto assanke lowonta hasiissannote; korkaatuno Yihowa woꞌma lubbonkenni addaxxineemmota leellinsheemmohu konninniiti.
6. Hundi Kiristaani kiilu maxaaffansa hiissitino?
6 Hundi Kiristaani halaalaancho ammaꞌno harunsa hasiꞌri yannara assinore hanni laꞌno. Qullaawu Maxaafi togo yaanno: ‘Duucha kiilaano kiilu borronsa abbite gamba assite daga duuchate albaanni giirtu.ˈ—Soqqamaanote Looso 19:19.
7. Agaaninte waajjishiishshannonkeha ikkiro ma assa dandiineemmo?
7 Agaaninte kiilo, bitanna diginte lawino assoote agure Yihowara soqqama jammaranno manna waajjishiishshara dandiitanno. Aterano hattoori iillihero qoonqokki gotti assite suꞌmasi gante Yihowa woshshiꞌri. Isi kaaꞌlannohe.—Lawishsha 18:10; Yaaqoobi 4:7.
8. Addu Kiristaani kaphu ammaꞌno ledo xaado afidhino misillanna uduunne ma garinni laꞌꞌanno?
8 Yihowara soqqama hasiꞌrannohu ayee manchino kaphu ammaꞌno ledo xaado afidhino misilla woyi uduunne minesi wodha woyi horoonsiꞌra dihasiissannosi. Addu Kiristaani ‘ammanatenni ikkinnina laꞌꞌatenni diheeꞌranno.ˈ (2 Qorontoosi 5:7) Togoo Kiristaani, magansiꞌnanni wote ayee misileno horoonsiꞌnannikki gede hooltannota Maganu higge ayirrisanno.—Wolapho 20:4, 5.
Yihowa Manniwa Aani
9. Qullaawu Maxaafi hayyicha ikkinanni gara mayyee amaalanno?
9 Qullaawu Maxaafi, “Hayyootu ledo haꞌrannohu hayyicha ikkanno” yaanno. (Lawishsha 13:20) Hayyoota ikka hasiꞌnummoro Yihowa Farciꞌraasine ledo haꞌra woyi insawa aana hasiissannonke. Heeshshonniwa massitanno doogo aana hadhanni noori insaati.—Maatewoosi 7:14.
10. Yihowa Farciꞌraasine Maganoho soqqamatto gede kaaꞌlitahera dandiitannohu hiittoonniiti?
10 Yihowa Farciꞌraasine mannaho lowo geeshsha assaabbanno. Insa, suwashshu wodani noonsa manni hegere heeshshowa massannoha Qullaawu Maxaafi halaale afanno gede kaaꞌlanno looso loossanni no. Woxe kaffalsiissuhekki Qullaawa Maxaafa xiinxallissannohe. Noohe xaꞌmora dawaro qoltannohe, hattono Qullaawu Maxaafi egenno heeshshokki giddo loosu aana hosiisatto gara kultannohe.—Yohaannisi 17:3.
11. Kiristaanu gambooshshi mayi kaaꞌlo aannohe?
11 Insa roore wote gamba yitanno basera, yaano Mangistete Harira Yihowa doogore lowore rosa dandaatto. Hattoo gambooshshiwa, halaalaancho ammaꞌno harunsate noohe hasatto lexxitanno gede assanno roso rosatto. Qoleno Qullaawu Maxaafi halaale wolu mannira kula dandaatto gara qajeelatto.—Ibiraawuyaani 10:24, 25.
12. Huuccatto Maganoho soqqamate kaaꞌlitannohehu hiittoonniiti?
12 Yihowa fajjorenna alaamisire rossanni haꞌritto kiiro, isita baxillu doogo roore huwattanninna baxxanni haꞌratto. Qolteno iso hagiirsiisannore assatenna isi giwannoriwiinni xeertiꞌrate noohe hasatto lexxitanni hadhanno. Dancha ikkinore assatto gedenna bushare giwatto gede Yihowa kaaꞌlahera huuccatto assiꞌra dandaattotano habbooti.—1 Qorontoosi 6:9, 10; Filiphphisiyusi 4:6.
Magano halaalunni magansiꞌra dandaattohu ma garinniiti?
13. Yihowa wodana tashshi assa dandaattohu hiittoonniiti?
13 Galte hossanni ayyaanaamittetenni lophittoro, ateneeto Maganoho sayisse uyite cuuamoottoha Yihowa Farciꞌraancho ikka hasiissannoheta huwatakki digattanno. Yihowa manni ledo karsante insa gaamo ikkittoro, Yihowa wodana tashshi assatto. (Lawishsha 27:11) Hatto ikkiro, “Insa mereero heeꞌreemmo, mereeronsano kawanna kaꞌa haꞌreemmo. Ani Maganonsa ikkeemmo, insano dagaꞌya ikkitanno” yee Maganu coyiꞌrinohu hagiirraamu manni gaamo ikkatto.—2 Qorontoosi 6:16.