Reyotenni Kaꞌinore Lame Ooso

MITTU qaaqqi ree, reyotenni kairo, amasi hiitto ikkitanno? Lowo geeshsha tashshi yaannose! Ikkina mittu manchi reyiro reyotenni kaꞌꞌanno? Konni albaanni togoori ikke egennino?

Misilete aana nooha labbaa mancho, meyaa manchonna shiima qaaqqo lai. Labbaa manchi, Eeliyaasi yinanni masaalaanchooti. Mancho kayinni Seraaptu katamira heedhanno gunnitteeti; qaaqqu iseho. Mitto barra kuni qaaqqi xiwami. Xiwanuno lexxanni haꞌreenna reyi. Eeliyaasino mancho, ‘Qaaqqo hanni kawa uyi’ yiise.

Eeliyaasi reyino qaaqqo fooqete iimira haare fule daallasaho goxisi. Hakkiinnino togo yee huuccatto assiri: ‘Yihowa, eeggatena konne qaaqqo galagale lubbotenni heeꞌranno gede assi.’ Hakkunni gedensaanni qaaqqu foola hanafi! Eeliyaasino qaaqqo haare dirre mancho, ‘Kuneeti lai, qaaqqikki kaino!’ yiise. Ama lowo geeshsha hagiidhitinohu iseraati.

Wolu Yihowahu danchu masaalaanchi Elsaiiti. Isi Eeliyaasi kaaꞌle soqqamanno. Ikkollana hatte yannara Yihowa Elsai horonsiꞌre maalaleno assino. Mitto barra Elsai Sunemi yinanni katama haꞌri; hakko mitte mancho isira danchare assitusi. Yannate gedensaanni tini mancho labbaa qaaqqo iltu.

Hakko qaaqqi lophphihu gedensaanni mitte soodo, annisi gate loosiranni noowa mari. Hedeweelcho, ‘Umo damuunsie!’ yee wiꞌli. Minira massinihu gedensaanni reyi. Amasi lowo geeshsha xissiisidhino! Iseno hakkawotenni Elsai noowa marte iso haadhe higgu.

Elsai dayiti, reyino qaaqqi noowa ei. Yihowa huucciꞌre, qaaqqu reeshshi aana barxa yii. Hakkawotenni reeshshuno iibbanni haꞌri; lamala higeno hanxishshiri. Qaaqqu ama minira dagge qaaqqise kainota affuti, lowo geeshsha hagiidhitu!

Reyinohu lowo manni no. Konni daafira fiixinsanna jaallansa lowo geeshsha dadillitino. Ninke reyitinore kayisa didandiineemmo. Yihowa kayinni dandaanno. Albaange Yihowa miliyoonetenni kiirranniha lowo manna hiitto asse reyotenni kayisannoro ronseemmo.