Iyyoosaafixi Yihowa Addaxxi

KUNI manni ayeootironna maa assanni nooro afootto? Olu bayichchira haꞌranni noo mannaati; albaa haꞌranni noo manni faarsanni no. ‘Faarsanni noo manni olamanno bisenna qalacco amadinokkihu mayiraati?’ yite xaꞌmittokki digatootto. Mayiraatiro hanni laꞌno.

Iyyoosaafixi lame Isiraeelete gaꞌre gashshooti nugusaati. Isino 10 gaꞌre amadinohu aliyye gashshooti nugusi Akiaabinna Elzaabeeli waro heeꞌrinoho. Ikkollana Iyyoosaafixi dancha nugusaati; annisi Asano danchaho. Konni daafira lame gaꞌre amadinohu wodiidi gashshootira heeꞌranno manni seeda diro dancha heeshsho heeꞌri.

Hakkunni gedensaanni kayinni manna masisannori kalaqami. Iyyoosaafixira, ‘Moaabi, Amooninna Seyiri Ilaali gobbanni lowo wottaaddari qasaꞌnera daanni no’ yitanno sokka iillitusi. Lowohu Isiraeelete manni Yihowa kaaꞌlo xaꞌmirara Yerusaalamete gamba yii. Mannuno Maganu minira marita, Iyyoosaafixi togo yee huuccatto assi: ‘Maganonke Yihowa, ikkineemmori bainonke. Konne lowo wottaaddara qasate kaaꞌlannonkehu dino. Kaaꞌlattonke gede ate agadhineemmo.’

Yihowano huuccatto macciishshi. Isino soqqamaanosi giddonni mitto mannunniwa soye, ‘Olu kiꞌneha diꞌꞌikkino; Maganunniho. Kiꞌne olama dihasiissannoꞌne. Sammi yitine uurre; Yihowa gatisannoꞌne gara calla laꞌe’ yiinsa.

Layinki soodo Iyyoosaafixi manna, ‘Yihowa addaxxe!’ yii. Hakkiinnino Iyyoosaafixi wottaaddarisira albaanni faarsanno manna wori; doogoteno Yihowara galatu faarso faarsitanni hadhu. Olu base iilla rakkuta mayi ikkiro afootto? Yihowa diinu wottaaddari insa insaneewa qasantanno gede assi. Isiraeele martanno wote woꞌmunku diinu wottaaddari ree goofino!

Iyyoosaafixi Yihowa addaxxasinni hayyichcha diꞌꞌikkino? Ninkeno Yihowa addaxxinummoro hayyoota ikkineemmo.