6 SEEJJO

HATTO YAA MAYYAATE?

Seejjate yaa raga leellishate woy rosiisate. Mito woyite, ooso busha akatansa biddi assidhanno gede assano ikkitara dandiitanno. Roore anga kayinni, seejjate yaa oosote gara ikkinore assitanno gede kaaꞌlannonsa amanyooti heeꞌrannonsa gede qajeelsate.

HASIISSANNOHU MAYIRAATI?

Muli dirra kawa, annuwunna amuuwu oosonsa seejja horo agurtino yaa dandiinanni; insa seejjo ooso hutisse huntannonsa yite waajjitanno. Hayyootu annuwinna amuuwi kayinni, quwa saꞌukkinni oosonsara wodho fushshitanno; qoleno oosonsa hattee wodho garinni heedhanno gede qajeelsitannonsa.

“Ooso lophite miqichaamma ikkitanno gede, mito coye hoola hasiissanno. Seejjinannikki ooso laaqaasinchu nookki markaawe gedeeti; togoo markaawe sunu sununni doogotenni fultara wole agurina itante nafa baꞌara dandiitanno.”—Pamiila.

MAA ASSA DANDIITINANNI?

Mitte hedore ikke. Qaaqqiꞌne fushshitinoonni wodho ayirrisannokkiha ikkiro, qorichisha agurtinoonte. Wodhoꞌne ayirrisanno woyite kayinni galattesi.

“Tenne hajajamanno manni bashile yiinokki alamera oosoꞌya owaata ikkitino daafira duucha woyite galateemmansa. Galanteemmonsaha ikkiro, ooso seejjo hasiissannonsa woyite macciishsha digibbanno.”—Kiristiini.

QULLAAWU MAXAAFI BIDDISHSHA: “Mannu wixiꞌrinoha mixxanno.”—Galatiyu Sokka 6:7.

Quwa saꞌinoonte. Seejjitinanni woyite, qaaqqu diro, dandoosinna huninori hakkeya loworeetironna teꞌee hedde. Seejjo roore kaaꞌlitannohu loonsoonni soꞌro ledo xaadooshshe afidhinota ikkiturooti; lawishshaho, mittu qaaqqi silkesi doogimale horoonsiꞌriro, mite yanna geeshsha silke horoonsiꞌrannota hoola dancha ikkitara dandiitanno. Wole widoonni kayinni, shiima soꞌro batissine lowori bainohu gede ikkitinoonte.

“Qaaqqiꞌya afanni heeꞌrenni hajajama giwanni nooronna afikki loosino soꞌrootiro badate woꞌnaaleemmo. Buqqise hoola hasiissannohu darga assiꞌrinohu bushu akatinna shiimurinni taashsha dandiinannite shiima soꞌro mereero lowo badooshshi no.”—Wendeli.

QULLAAWU MAXAAFI BIDDISHSHA: “Dadillaamma ikkitannokki gede, oosoꞌne caacceessitinoontensa.”—Qolasiyaasi Sokka 3:21.

Baxillaano ikke. Ooso anninsanna amansa seejjitannonsahu baxxannonsa daafira ikkinota huwatturo, seejjo macciishshe hajajama roore shota ikkitannonsa.

“Qaaqqinke soꞌro loosanno woyite, alba assinohu danchu coyi hagiirsiisannonketa kulleemmosi. Soꞌrosi taashshiꞌrate assa hasiissannosire assi geeshsha xaa soꞌrosi albi danchummasi huntannokkitanna ninkeno kaaꞌlineemmosita kulleemmosi.”—Daanieeli.

QULLAAWU MAXAAFI BIDDISHSHA: “Baxillu cincanno; baxillu elanno.”—1 Qorontoosi 13:4.