Yohaannisi Ajuuja
9 Ontikki sokkaasinchi xurumbasi ufuufi. Anino gordunni uullara ubbinota mitte beeddakko laummo; isera* qilete xullicho* fannanni qulfe uyinise. 2 Qilete xullichono* fantu; xullote widoonni, goolu giira giddonni fultanno gedee wiliile fultu; baletenni fultino wiliilenni kainohunni arrishshonna gordu tunsi. 3 Wiliilete giddonni kanchafaru fule baattote aanira dirri; kanchafareho baattote aana heeꞌranno iddira noosi gedee silxaane uyininsa. 4 Maganu sumudi albinsara nookki manna calla ikkinnina, baattote aana noo hayisso woy aye muꞌrono woy aye haqqeno gawajjitannokki gede kullinsa.
5 Kanchafaru insa shaanno gede ikkikkinni onte agana shetisannonsa gede fajjinoonni; insara mitto mancho iddu qaseenna xissannohu gede ikke xissinsa. 6 Hatte yannara mannu reyo hasiꞌranno; kayinni horonta diafiꞌranno; reyo halchanno; reyo kayinni insawiinni xooqqanno.
7 Kanchafaru olaho qixxaawino farado lawanno; uminsara culku baꞌlatto lawannori no; albinsano mannu alba lawanno; 8 dananchinsa meyate danancho lawanno. Hinkonsa doobbiichu hinko gedeete; 9 siwiilunnita labbannoti gagasu uddano noonsa. Qoollansa huuro, olaho hadaraassanno faradi-gaare huuro gedeete. 10 Qoleno iddu gede qasanno farri noonsa; farrinsarano manna onte agana gawajjitanno silxaane noonsa. 11 Insara moote noonsa; isino qilete sokkaasinchooti. Suꞌmasi Ibiraawootu Afiinni Abaadooni,* Girikete Afiinni kayinni Aphooliyooni* yinanni.
12 Mitte aanneꞌe saꞌino. Kuneeti, konni coyi gedensaanni wole lame aanneꞌe dagganno.
13 Leekki sokkaasinchi xurumbasi ufuufi. Qoleno Maganu albaanni noohu culkunni seekkinoonnihu kakkalote dargi buuddanni fultinota mitte huuro macciishshummo; 14 hatti huuro xurumba anga haaꞌre nooha leekki sokkaasincho, “Jawu Efiraaxisi Lagira usurante noore shoolenta sokkaasine tiri” yitu. 15 Mannu giddonni sayikki anga shitanno gede tenne saatera, konni barrira, konni aganiranna konni dirira qixxaabbe noori shoolenti sokkaasine tidhantu.
16 Faradaasinete olanto kiiro lame tunsote tunsooti;* kiironsano macciishshummo. 17 Ajuujatenni laummo faradinna aanansa ofoltinori togooreeti: Giirate gedeeti duume, yaakinti yinanni kinchi gede gordu kuula labbannotinna ruqanu gedeeti baqqala gagasu uddano noonsa; faradu umi doobbiichu umo lawanno; afiinsannino giira, wiliilenna ruqanu fuli. 18 Afiinsanni fulinohu kuni sasu qoomami yaano giira, wiliilenna ruqanu mannu giddonni sayikki anga shii. 19 Faradu silxaane noohu afiinsaranna farrinsaraati; farrinsa hamashsho lawannohonna umu noosiho; manna gawajjitannohuno isinniiti.
20 Ikkollana konni qoomaminni reyikkinni gatino manni angansa loosira maaro dieino; qoleno insa agaaninte, hattono laꞌꞌa, macciishshanna qaafa dandiitannokkire culkunni, birrunni, camotenni, kinchunninna haqqunni seekkinoonnita kaphu maganna magansiꞌra diagurtino. 21 Qoleno lubbo shitinotera, agaanintete loosinsara, foorrensaranna* moorinsara maaro dieꞌino.