Yohaannisi Ajuuja
12 Hakkiinni gordoho jawu malaati leelli; mitte mancho arrishsho uddidhe no; aganuno lekkasera woroonni no; umoho 12 beeddakko afidhino baꞌlatto wodhite no; 2 ise godowinni no. Ilate game amaddeennase lowo geeshsha shette raartanni no.
3 Gordoho wolu malaati leelli. Kuneeti lamalu uminna tonnu buudi noosihu, umoho lamala baꞌlatto wodhinohu duumu xiillichu jawu dhudhuufi leelli; 4 farrisi gordu beeddahe giddonni sayikki anga goshooshe uulla qole olloli. Dhudhuufuno iltanno woyite qaaqqose egemmara yee, ila rakke noo mancho albaanni uurre agare no.
5 Iseno daga baala siwiilu siqqonni gashshannoha* labbaa beetto iltu. Qaaqqoseno hawulukki assine Maganunniwanna zuufaanesiwa massini. 6 Manchono halallira xooqqu; hakkiicho 1,260 barra itissannose gede Maganu bayicho qixxeessinose.
7 Gordoho olu kai; Mikaeelinna* sokkaasinesi dhudhuufu ledo olantu; dhudhuufunna sokkaasinesino olantu; 8 ikkollana insa qeelantu;* hakkunni gedensaanni gordoho darga diafidhino. 9 Hakko daafira jawa dhudhuufa yaano alame woꞌma soꞌrisiisanni nooha Daawuloosinna Sheexaane yinanniha biꞌre hundi hamashsho uullara qolle olli; sokkaasinesino ledosi olli. 10 Gordoho togo yitannota lowo huuro macciishshummo:
“Xa gato, wolqanna Gashshootu Maganinkeha ikkino; silxaaneno isi buurinohunnita* ikkitino; Maganinke albaanni barranna hashsha kassasannonsaha roduuwinke kassasaancho woro qolle olloonni! 11 Insano Geꞌrechu mundeenninna farcidhino qaalinni kainohunni iso qeeltino; lubbonsa* nafa marartukkinni umonsa reyote sayisse uyitino. 12 Hakko daafira gordunna giddosi heedhinanniri baalu hagiidhe! Baattotenna baaraho kayinni aanneꞌe; korkaatuno, Daawuloosi shiima yanna calla gattinosita afe lowo hanqinni kiꞌnewa dirrino.”
13 Dhudhuufuno uullara qolle olloonnisita afiti, labbaa beetto iltino mancho waadi. 14 Ikkollana mancho halalla qixxeessinoonnise bayicho buubbe haꞌra dandiitanno gede, jawu allamurchiha lame qoola uyinise; hakkiicho hamashshu albinni xeertidhe sase dironna darate* itinsannase heedhanno.
15 Hamashshuno mancho lagu giddo itantanno gede afiisinni fulinoha lagu geeshshi waa badheseenni duni. 16 Ikkollana baatto mancho kaaꞌlituse; baatto afoose fante dhudhuufu afiisinni tufino waa egemmitu. 17 Dhudhuufuno manchote lowo geeshsha hanqe, Maganu hajajo agadhitannorinna Yesuusi daafira farciꞌrate loosi noonsari sirchise* giddonni gattinori ledo olamara haꞌri.