Maatewoosi Wongeella
28 Sambatu saihu gedensaanni, lamalate umi barra* duuꞌmo saaqqanna Megidelitte Maariyaaminna wole Maariyaami waamma laꞌꞌara dayi.
2 Hatte yannara Yihowa* sokkaasinchi iiminni dirrino daafira, baatto lowo geeshsha huxidhu; sokkaasinchuno daye kincho gongoꞌmishe aanaho ofolli. 3 Danisi belequ gede xawanno; uddanosino kaadete gede waajjote. 4 Agaraasine sokkaasincho waajjite qece yite reyino manchi gede ikkitu.
5 Sokkaasinchu meento togo yii: “Waajjitinoonte, hasidhinanni heedhinoonnihu haqqaho suntiha Yesuusa ikkinota afoommona. 6 Isi kowiicho dino; balaxe coyiꞌrinonte gede reyotenni kaino. Amme, madaarroonnisi darga laꞌe. 7 Rakkine martine isi reyotenni kainota rosaanosira kulle. ‘Isi kiꞌne balaxe Galiila saꞌꞌanno. Hakkiicho laꞌinannisi’ yitine kullensa. Kulummoꞌnere habbinoonte.”
8 Hakko daafira, meentu waajjillunninna lowo hagiirrinni rosaanosira kulara waammatewiinni rahe dodanni haꞌri. 9 Yesuusi insanni xaade “Keeru kiꞌne ledo ikko!” yiinsa. Insano shiqqi yee lekkasi amade ayirrinye uyisi.* 10 Hakkiinni Yesuusi togo yiinsa: “Waajjitinoonte! Hadhine, Galiila saꞌanno gede roduuwiꞌyara kullensa; hakkiicho laꞌannoena.”
11 Meentu haꞌranni doogo heeꞌreenna, agaraasinete giddo mitu katama marte ikkinore baala kakkalaanote roorrootira kultu. 12 Kakkalaanote roorrootino, cimeeyyete ledo gamba yite amaalantuhu gedensaanni waamma agartino olantora lowota birru saantuwa* uyite 13 togo yitu: “‘Hashsha ninke gonxe heeꞌneenna rosaanosi dagge reeshsha moortino’ yiiyye. 14 Kuni duduwi gashshaanchunniwa iilliro, iso ninke ammansiinseemmona kiꞌne yaaddinoonte.” 15 Konnira insa birru saantuwa adhite hajanjoonninsa gede assitu; tenne xagge techo barri geeshsha Ayihudete manni shaa asse hasaawanno.
16 Tonaamittunku rosaano kayinni, Yesuusi ledo xaaddara isi kulinonsawa Galiilaho noo ilaala hadhu. 17 Rosaanosi iso laꞌuti ayirrinye uyitusi;* mitu kayinni huluullantu. 18 Yesuusino insawa shiqqi yee togo yiinsa: “Silxaane baala gordohono baattoteno uyinoonnie. 19 Konnira hadhine, daga baalante giddonni manna rosaanoꞌya asse; Annu, Beettunna qullaawu ayyaani suꞌminni cuuꞌensa; 20 hajajoommoꞌnere baala agadhitanno gedeno rosiissensa. Kuneeti ani alamete* gumulo geeshsha barru baala kiꞌne ledo noommo.”